އޮޅިގެން ބޯޑަރު ހުރަސްކޮށް އިންޑިއާއަށް ވަދެވުނު ޕާކިސްތާނުގެ ދެބެއިން އަނބުރާ ގައުމަށް
9 ޑިސެމްބަރު 2020 | ބުދަ 03:33މި ދެބެއިން ޕާކިސްތާނާއި ހޯމަ ދުވަހުގެ ވަގުތެއްގައި ހަވާލުކޮށްފައިވާކަމަށް އިންޑިއާ ސަރުކާރުން ބުނޭ
އޮޅިގެން ބޯޑަރު ހުރަސްކޮށް އިންޑިއާ ސަރަހައްދަށް ވަތް ޕާކިސްތާނުގެ ދެބެއިން
އޮޅިގެން ބޯޑަރު ހުރަސްކޮށް އިންޑިއާގެ ސަރަހައްދަށް ވަތް ޕާކިސްތާނުގެ ދެބެއިން އެ ގައުމާއި ހަވާލުކޮށްފިކަމަށް، އިންޑިއާއިން ހާމަކޮށްފިއެވެ.
ޕާކިސްތާނުގެ ބޯޑަރު ހުރަސްކޮށް އިންޑިއާގެ ކަޝްމީރު ސަރަހައްދަށް ވަތް ސަނާ ޒުބައިރާއި ލައިބާ ޒުބައިރު އަތުލައިގަނެފައިވަނީ ކަޝްމީރު ބޯޑަރު ބަލަހައްޓަމުންދާ އިންޑިއާގެ ސިފައިންނެވެ.
މިކަން ހާމަކުރައްވާ އިންޑިއާގެ ފޮރިން އޮފީސްގެ ތަރުޖަމާނު ވިދާޅުވީ ޕާކިސްތާނުގެ ބޯޑަރު ހުރަސްކޮށް އިންޑިއާގެ ސަރަހައްދަށް ވަތް ޕާކިސްތާނުގެ ދެބެއިން ހޯމަ ދުވަހު އެ ގައުމާ ހަވާލުކޮށްފައިވާކަމަށެވެ. އަދި މިއިން ދައްކުވައިދެނީ ދެ ގައުމު އެއްކޮށް މަސައްކަތްކޮށްގެން ދިމާވެފައިވާ މައްސަލަތައް ހައްލުކުރެވޭނެކަން ކަމުގައި ތަރުޖަމާނު ވިދާޅުވިއެވެ.
ކަޝްމީރުގެ މައްސަލައިގައި އިންޑިއާ އާއި ޕާކިސްތާނާއި ދެމެދު ޒަމާނުއްސުރެ ހިޔާލުތަފާތުވެފައިވާއިރު، މިފަހުން އިންޑިއާއިން ކަޝްމީރުގެ މައްޗަށް ގަދަވެގަންނަން އުޅޭކަމަށް ޕާކިސްތާނުން ވަނީ ތުހުމަތުކޮށްފައެވެ.
އެންމެ ފަހުން ކަޝްމީރުގެ މައްސަލަ ހޫނުވީ އިންޑިއާއިން ކޮންޓްރޯލް ކުރަމުންދާ ޖައްމޫ އެންޑް ކަޝްމީރު ސްޓޭޓް ރޫޅައިލައި، އިންޑިއާ ސަރުކާރުން އިދާރީ ދެ ޞަރަޙައްދު ޤާއިމުކޮށް އައު މެޕް މުޅި ދުނިޔެއަށް ޙިއްސާކުރުމުންނެވެ. އަދި އެ ސަރަހައްދުގެ ސަރުކާރަށް ދީފައިވާ ހާއްސަ އިމްތިޔާޒުތައްވެސް އިންޑިއާ ސަރުކާރުންވަނީ ނިގުޅައިގެންފައެވެ.
