އަންނަ ހަފްތާ ކެނެޑާގައި ކޮވިޑް ވެކްސިން ދޭން ފަށަނީ
ކެނެޑާއިން ވަނީ ފައިޒަރ ކޮވިޑް ވެކްސިންގެ 249،000 ޑޯޒް ގަނެފައި
ކެނެޑާގެ ބޮޑުވަޒީރު ޖަސްޓިން ޓްރޫޑޯ
ހެލްތު ރެގިއުލޭޓަރުންގެ ހުއްދަ ލިބުނުހާ އަވަހަކަށް އަންނަ ހަފްތާގެ ތެރޭގައި ކެނެޑާގައި ކޮވިޑް-19ގެ ވެކްސިން ދޭން ފެށޭނެ ކަމަށް އެގައުމުން ބުނެފިއެވެ.
ކެނެޑާއަށް ވެކްސިން ލިބުން ލަސްވާތީ އެކަމުގެ ޝަކުވާތައް ގިނަވެފައި ވަނިކޮށް އެގައުމުގެ ބޮޑުވަޒީރު ޖަސްޓިން ޓްރޫޑޯ ވަނީ އެގައުމުން ފައިޒަރއިން އުފައްދާ ކޮވިޑް-19 ވެކްސިންގެ 249،000 ޑޯޒް ކެނެޑާއިން ގަނެފައިވާކަމަށް ވިދާޅުވެފައެވެ.
އެގޮތުން ޑިސެމްބަރ މަހު އެގައުމުގައި ވެކްސިން ދެވެން ފެށޭނެކަމަށް ވިދާޅުވެފައިވާއިރު، އެގައުމުން ވެކްސިން ދިނުމުގައި ހައި ރިސްކު މީހުންނަށާއި ނަރސިން ހޯމްތަކުގައި ތިބި ފަރާތްތަކާއި ހެލްތު ވޯކަރުންނަށް އިސްކަންދެވޭނެ ކަމަށް ވަނީ ވިދާޅުވެފައެވެ.
މީގެ އިތުރުން މިއީ ކެނެޑާގެ ތާރިގުގައި ފާހަގަކޮށްލެވޭނެ ކަމެއްކަމަށް ވިދާޅުވެ ބޮޑުމވަޒީރު ޓްރޫޑޯ ވަނީ ވެކްސިން ދިނުމުގެ މަސައްކަތް ކުޑަ ސްކޭލެއްގައި ފަށައި، ކުރިއަށް އޮތްތާގައި ބޮޑު ކުރަމުން ދާނެކަމަށެވެ.
ކެނެޑާއިން ވަނީ އެގައުމުގެ ހެލްތު ރެގިއުލޭޓަރުން ވެކްސިން ބޭނުންކުރުމުގެ ހުއްދަ ދޭނީ ބަލަންޖެހޭ ހުރިހާ ކަމެއް އެންމެ ފުރިހަމަ ގޮތުގައި ބެލުމަށްފަހު ކަމަށްވެސް ވިދާޅުވެފައެވެ.
ކެނެޑާއިން ފައިޒަރގެ ވެކްސިން ގަނެ އަންނަ ހަފްތާގައި ވެކްސިން ދޭން ފެށޭނެ ކަމަށް ފާހަގަކޮށްފައިވާއިރު، އިނގިރޭސިވިލާތުން ވަނީ އަންގާރަ ދުވަހު އެގައުމުގެ ރައްޔިތުންނަށް ވެކްސިން ދޭން ފަށާފައެވެ.
