މިދިޔަ ދެ ހަފްތާތެރޭ ބަންގްލަދޭޝްއަށް ހިޖުރަކުރި ރޮހިންޖާ މުސްލިމުންގެ އަދަދު 270000 އަށް އަރައިފި

މިޔަންމާގެ އަސްކަރިއްޔާއިން އެގައުމުގެ ރޮހިންޖާ މުސްލިމުންނާ ދެކޮޅަށް ހިންގަމުންދާ ލާއިންސާނީ އަމަލުތަކުން ސަލާމަތްވުމުގެ ގޮތުން މިދިޔަ ދެ ހަފްތާ ތެރޭ ބަންގްލަދޭޝްއަށް ހިޖުރަކުރި މީހުންގެ އަދަދު 270000 މީހުންނަށް އަރައިފި ކަމަށް އެސޯސިއޭޓެޑް ޕްރެސްއިން ރިޕޯޓްކޮށްފިއެވެ.

އދގެ ރެފިއުޖީ އޭޖެންސީއާ ހަވާލާދީ އެސޯސިއޭޓެޑް ޕްރެސްއިން ރިޕޯޓްކުރި ގޮތުގައި މިދިޔަ ދެހަފްތާތެރޭ އެކަނިވެސް 270000 މީހުން ބަންގްލަދޭޝްއަށް ވަނީ ހިޖުރަކޮށްފައެވެ. މިއީ މިދިޔަ އޮގަސްޓް މަހުގެ 25 ހާ ހަމަޔަށް އެ ގައުމަށް އެތެރެވި ރޮހިންޖާ މުސްލިމުންގެ 146000 މީހުންނަށްވުރެ މާ ބޮޑުތަންވެސް އިތުރު އަދަދެކެވެ.

ބަންގްލަދޭޝްއަށް ހިޖުރަކުރަމުން އަންނަ ރޮހިންޖާ މުސްލިމުންގެ އަދަދު ދުވަހެއް ދުވަހަކަށް އިތުރުވަމުން އަންނައިރު އެ މީހުންނަށް ފޯރުކޮށްދޭން ޖެހޭ އެހީ އެންމެ ފުރިހަމަ ގޮތުގައި ފޯރުނުކޮށްދެވޭ ކަމަށް އދ.ގެ ރެފިއުޖީ އޭޖެންސީއިން ހާމަކުރިއެވެ.

މިޔަމަންމާގެ މުސްލިމުންނާ ދެކޮޅަށް އެގައުމުގެ ސަރުކާރުން ބާރުދީގެން، އަސްކަރިއްޔާއިން ދަނީ ބާރުގެ ބޭނުންކޮށް، މުސްލިމުން ގެދޮރުން ފައްސާލައި، ބައެއް މީހުން މަރާ އަދި އަންހެން ކުދިންގެ އިއްފަތް ފޭރިގަންނަމުންނެވެ. މިޔަންމާ މީހުން ދެކޭ ގޮތުގައި ރޮހިންޖާ މުސްލިމުންނަކީ އެގައުމުގެ މީހުންނެއް ނޫނެވެ. އެއީ ބަންގްލަދޭޝް އިން ވަގަށް އެތެރެވެގެން އުޅޭ ބައެއް ކަމަށް ބުނެ އެމީހުން އެކަހެރިކޮށް، އެންމެ އަސާސީ ހައްގުތަކުންވެސް އެމީހުން ވަނީ މަހްރޫމް ކުރެވިފައެވެ.

މިޔަންމާގެ އަސްކަރިއްޔާގެ މި ލާއިންސާނީ އަމަލުތަކާ މެދު މުޅި ދުނިޔޭގެ ފާޑުކިޔުން އަމާޒުވަމުން އަންނަ އިރު އެ އަމަލްތަށް ހުއްޓާލުމުގެ އެއްވެސް ނިޝާނެއް ނުފެނެއެވެ.