އެކި މަރުޙަލާތަކަށް ބަހާލައިގެން ސިންގަލް ޔޫސް ޕްލާސްޓިކްގެ ބާވަތްތަކުގެ ލިސްޓް އާންމުކުރާގޮތަށް ބަދަލުކޮށްފި
މިބިލް ފާސްކޮށްފައިވަނީ 60 މެމްބަރުންގެ ވޯޓުން
މާލެސިޓީގެ މޫދުގައި ޕްލާސްޓިކް ކުނި ޖަމާވެފައި
އެކި މަރުޙަލާތަކަށް ބަހާލައިގެން ރާއްޖެއަށް އެތެރެކުރުން މަނާއެއް ފަހަރު ބޭނުންކުރުމަށްފަހު އުކާލާ ޕްލާސްޓިކްގެ ބާވަތްތަކުގެ ލިސްޓް އާންމުކުރާގޮތަށް އެކްސްޕޯޓް އިމްޕޯޓްގެ ޤާނޫނަށް އިސްލާހު ގެނެސްފިއެވެ.
ސަރުކާރުގެ ފަރާތުން، ދިއްގަރު ދާއިރާގެ މެންބަރު އިކްރާމް ޙަސަން ހުށަހެޅުއްވި މިއިސްލާހުގެ ބިލް ދިރާސާކޮށްފައިވަނީ މުޅި މަޖިލީހުގެ ކޮމިޓީންނެވެ. މި ބިލް ފާސްކުރުމަށް ނެގުނު ވޯޓުގައި ބައިވެރިވެވަޑައިގެންނެވި 60 މެމްބަރުންގެ އިއްތިފާގުންވަނީ މި ބިލް ފާސްކޮށްފައެވެ.
މިހާރު އަމަލުކުރަމުން އަންނަ އިމްޕޯޓް އެކްސްޕޯޓްގެ ޤާނޫނުގައި ބުނެފައިވަނީ ޕްލާސްޓިކާއި ޕްލާސްޓިކުން ތައްޔާރުކޮށްފައި ހުންނަ އެއްޗެހީގެ ތެރެއިން ސިންގަލް ޔޫސް ޕްލާސްޓިކްގެ ގޮތުގައި ރައީސުލްޖުމްހޫރިއްޔާ ކަނޑައަޅާ ބާވަތްތައް އަންނަ އަހަރުގެ ޖެނުއަރީ މަހުގެ 1 ވަނަ ދުވަހުން ފެށިގެން ރާއްޖެއަށް އިމްޕޯޓްކުރުމަކީ މަނާކަމެއްކަމަށެވެ.
އެހެންކަމުން މިބިލް ހުށަހަޅާފައިވަނީ ކޮވިޑް-19 އާ ގުޅިގެން ދިވެހިރާއްޖޭގެ އިޤްތިޞާދަށާއި ވިޔަފާރިތަކަށް އަސަރުކޮށްފައިވާއިރު 2021 ގައި ގިނަ އަދަދެއްގެ ސިންގަލް-ޔޫސް ޕްލާސްޓިކްގެ ބާވަތްތައް އެކީ އެއްފަހަރާ ރާއްޖެއަށް އެތެރެކުރުން މަނާކުރުމުގެ ބަދަލުގައި، އެކި މަރުޙަލާތަކަށް ބަހާލައިގެން އެކި މުއްދަތުތަކުގައި ސިންގަލް-ޔޫސް ޕްލާސްޓިކް ދިވެހިރާއްޖެއަށް ގެނައުން މަނާކުރުމުގެ ފުރުޞަތު ދިނުމުގެ މަގުސަދުގައެވެ.
މިހާރު ރައްޔިތުންގެ މަޖިލީހުން ފާސްކުރި އިސްލާހުގެ ބިލްގައި ބުނެފައިވަނީ ޕްލާސްޓިކާއި ޕްލާސްޓިކުން ތައްޔާރުކޮށްފައި ހުންނަ އެއްޗެހީގެ ތެރެއިން ސިންގަލް ޔޫސް ޕްލާސްޓިކްގެ ގޮތުގައި ރައީސުލްޖުމްހޫރިއްޔާ ކަނޑައަޅާ ބާވަތްތައް ރާއްޖެއަށް އެތެރެކުރުމަކީ މަނާކަމެއްކަމަށެވެ. އަދި ރައީސް ކަނޑައަޅާ ސިންގަލް ޔޫސް ޕްލާސްޓިކްގެ ބާވަތްތަކުގެ ލިސްޓް އެކި މަރުހަލާތަކަށް ބަހާލައިގެން ކަނޑައެޅުމުގެ އިޚުތިޔާރު ރައީސަށް ލިބިގެންވާކަމަށް ވަނީ ބަޔާންކޮށްފައެވެ. އަދި މިބިލް ޤާނޫނަކަށްވެ އަމަލުކުރަން ފެށުމާއެކު ރައީސް ކަނޑައަޅާ ފުރަތަމަ ލިސްޓް އަންނަ އަހަރުގެ ޖެނުއަރީ މަހުގެ 1 ވަނަ ދުވަހުގެ ކުރިން ކަނޑައަޅައި ސަރުކާރުގެ ގެޒެޓްގައި ޝާއިއުކުރަންވާނެ ކަމަށްވެސް ވަނީ ބަޔާންކޮށްފައެވެ.
އެއްފަހަރު ބޭނުންކޮށްފައި އުކާލާ ޒާތުގެ ޕްލާސްޓިކް ކުނީގެ ދުވަހުންދުވަހަށް ބޮޑުވަމުން އަންނައިރު، 2023 ވަނަ އަހަރުގެ ކުރިން ރާއްޖެއިން އެއް ފަހަރު ބޭނުންކޮށްފައި އުކާލާ ޒާތުގެ ޕްލާސްޓިކް ބޭނުންކުރުން މަނާކުރަން ސަރުކާރުންވަނީ ޕްލޭނެއް އެކުލަވާލާފައެވެ.
