އާސަންދަ މޮބައިލް އެޕްލިކޭޝަންގެ އައިއޯއެސް ވަރޝަން ތަޢާރަފްކޮށްފި
8 ޑިސެމްބަރު 2020 | އަންގާރަ 08:16މިއަދުން ފެށިގެން އެޕް ސްޓޯރުންވެސް މި އެޕް ޑައުންލޯޑް ކުރެވޭނެ
އާސަންދަ މައި އޮފީސް
އާސަންދައި މޮބައިލް އެޕްލިކޭޝަންގެ އައިއޯއެސް ވަރޝަން ތަޢާރަފްކޮށްފިއެވެ.
މިކަމާއި ގުޅިގެން އާސަންދައިން ނެރުނު ބަޔާނެއްގައި ބުނީ، 'އާސަންދަ' ނަމުގައި 27 ސެޕްޓެމްބަރުގަ ޕްލޭ ސްޓޯރުގަ އެންޑްރޮއިޑް ވަރޝަން ތައާރަފްކުރުމަށްފަހު މިއަދުން ފެށިގެން އެޕް ސްޓޯރުންވެސް މި އެޕް ޑައުންލޯޑް ކުރެވޭނެ ކަމަށެވެ. އެޕް އަމާޒުކޮށްފައިވަނީ އާސަންދަ ސްކީމްގެ ޚިދުމަތް ހޯދާ ދިވެހި ރައްޔިތުންނަށެވެ.
ކޮންމެ ދިވެހި ރައްޔިތަކަށްވެސް މި އެޕްގައި ރަޖިސްޓަރވެވޭއިރު އެޕް ޑައުންލޯޑްކޮށް ރެޖިސްޓަރވުމުން، އާސަންދަ ސްކީމްގެ ދަށުން ޚިދުމަތް ފޯރުކޮށްދޭ ތަންތަނުގެ ތެރެއިން އާސަންދައިގެ އައު އޮންލައިން ޕޯޓަލް "ވިނަވި" ބޭނުންކުރާ ހުރިހާ ތަނަކުން، އެމީހަކު ހޯދާ ޚިދުމަތްތަކުގެ ތަފްޞީލު ފެންނަން ހުންނާނެއެވެ.
ޑޮކްޓަރުން ލިޔެދެއްވާ އީ-ޕްރިސްކްރިޕްޝަން ނުވަތަ އިލެކްޓްރޯނިކް ބޭސް ސިޓީތައްވެސް އެޕް މެދުވެރިކޮށް ބަލާލެވޭނެއެވެ. އަދި، ނުހޯދާ ޚިދުމަތެއް ލިސްޓްކޮށްފަ ވާނަމަ އެޕް މެދުވެރިކޮށް އެކަން ރިޕޯޓްކުރުމުން އާސަންދައިން އެކަން ތަޙުޤީޤުކުރާނެކަމަށްވެސް ބަޔާނުގައިވަނީ ބުނެފައެވެ.
އާސަންދައިން ބުނީ، އެޕް ތަޢާރަފްކުރުމުގެ އެންމެ ބޮޑު މަޤްޞަދަކީ އާސަންދަ ސްކީމްގެ ކަންކަން ވީހާވެސް ދެފުށްފެންނަ ގޮތަކަށް ކުރިއަށް ގެންދިއުމަށްކަމަށެވެ. މި އެޕްލިކޭޝަންގެ މަޤްޞަދު އެންމެ ފުރިހަމަ ގޮތުގައި ޙާޞިލުވާނީ، އާސަންދަ ސްކީމްގެ ޚިދުމަތްދޭ ހުރިހާ ތަންތަނުން ހޯދާ ޚިދުމަތްތަކުގެ ތަފްޞީލު ފެންނަން ހުރުމުންކަމަށާއި، އާސަންދައިގެ ޚިދުމަތް ފޯރުކޮށްދޭ ބައެއް ތަންތަނުގައި "ވިނަވި" ޕޯޓަލް އަދި ބޭނުންކުރަން ނުފަށާތީ، އެތަންތަނުން ހޯދާ ޚިދުމަތްތަކުގެ ތަފްޞީލު އާސަންދަ އެޕުން ފެންނަން ނުހުންނާނެކަމަށެވެ.
ނަމަވެސް، އަވަސް މުސްތަޤުބަލެއްގައި އާސަންދައިގެ ޚިދުމަތް ފޯރުކޮށްދޭ ހުރިހާ ތަނެއްގައި "ވިނަވި" ޕޯޓަލް ބޭނުންކުރަން ފަށައި، އާސަންދަ ސްކީމްގެ ދަށުން ރައްޔިތުމީހާ ހޯދާ ހުރިހާ ޚިދުމަތެއްގެ ތަފްޞީލު، އަތުގައި އޮންނަ މޯބައިލް ފޯނުން ބަލައިލެވޭނެކަމަށް އާސަންދައިން ބުނެއެވެ.
