ޗެނަލް 13ން ދޮގު މައުލޫމާތު ބްރޯޑްކާސްޓްކުރި މައްސަލާގައި ކޮމިޓީން އަންގަންޖެހޭކަމެއް ނެތް
މިމައްސަލަ ސަލާމަތީ ޚިދުމަތްތަކާއި ބެހޭ ކޮމިޓީއަށް ހުށަހަޅުއްވާފައިވަނީ މެދުހެންވޭރު ދާއިރާގެ މެމްބަރ އަލީ އާޒިމް
ބްރޯޑްކޮމް އިން ޗެނަލް 13 އާ ބައްދަލުކުރަނީ
ޗެނަލް 13ން ރައްޔިތުންގެ މެދުގައި ނުތަނަވަސްކަން އުފެދޭގޮތަށް ދޮގު މައުލޫމާތު ބްރޯޑްކާސްޓް ކުރި މައްސަލަ ބްރޯޑްކާސްޓިންގ ކޮމިޝަންގެ ފަރާތުން ތަހުގީގުކުރުމަށްފަހު މި މައްސަލައާއި ގުޅިގެން އަޅަންޖެހޭ ފިޔަވަޅުތައް އަޅާފައިވާކަމަށް ފުލުހުން އަންގާފައިވާތީ މިކަމުގައި ކޮމިޓީން އަންގަންޖެހޭ އިތުރު ކަމެއް އޮތްކަމަށް ނުފެންކަމަށް މަޖިލީހުން ފާސްކޮށްފިއެވެ.
މި މައްސަލައަކީ އާންމު ސިއްހަތުގެ ކުއްލި ނުރައްކަލުގެ ހާލަތު އިއުލާންކޮށްފައިވަނިކޮށް ޗެނަލް 13ން ރައްޔިތުންގެ މެދުގައި ނުތަނަވަސްކަން އުފެދޭގޮތަށް ފަތުރައި ކޮންޓެންޓް ބްރޯޑްކާސްޓްކުރި މައްސަލަ ބެލުމަށް ސަލާމަތީ ޚިދުމަތްތަކާއި ބެހޭ ކޮމިޓީއަށް ހުށަހެޅުމާއި ގުޅިގެން ކޮމިޓީން ބަލާފައިވާ މައްސަލައެކެވެ.
މި މައްސަލަ ސަލާމަތީ ޚިދުމަތްތަކާއި ބެހޭ ކޮމިޓީއަށް ހުށަހަޅުއްވާފައިވަނީ މެދުހެންވޭރު ދާއިރާގެ މެމްބަރ އަލީ އާޒިމްއެވެ. މި މައްސަލައަކީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ހަށިކޮޅުގައި ރޯކޮށްލުމަށް މީހަކު ޗެނަލް 13 ގެ ލައިވް ޕްރޮގްރާމެއްގައި ބުނި ވާހަކައެއް ބްރޯޑްކާސްޓް ކުރި މައްސަލައެވެ.
ކޮމިޓީން މި މައްސަލަ ކުރިޔަށް ގެންދިޔުމުގައި މިމައްސަލަޔާއި ގުޅޭ އެއްވެސް ތަހުގީގެއް ފުލުހުން ކުރިޔަށް ގެންގޮސްފައިވޭތޯ އާއި އޭގެ ތަފްސީލުތައް ކޮމިޓީން ބަލާފައިވާކަމަށް ކޮމިޓީ ރިޕޯޓްގައި ބުނެފައިވެއެވެ. އަދި ފުލުހުން ކޮމިޓީއަށް ފޮނުވި މައުލޫމާތުތަކަށް ބެލުމަށްފަހު ކޮމިޓީން 5 ހޯދުމެއްވަނީ ހޯދާފައެވެ.
ކޮމިޓީން ހޯދާފައިވާ އެއް ކަމަކީ އާންމު ސިއްހަތުގެ ކުއްލި ނުރައްކަލުގެ ހާލަތު އިއުލާންކޮށްފައިވަނިކޮށް ޗެނަލް 13ން ރައްޔިތުންގެ މެދުގައި ނުތަނަވަސްކަން އުފެދޭފަދަ ދޮގު މައުލޫމާތު ފަތުރައި ކޮންޓެންޓް ބްރޯޑްކާސްޓްކުރަމުންދާ މައްސަލަ ފުލުހުންގެ ސަމާލުކަމަށް އައިސްފައިވާކަމަށެވެ. އަދި މި މައްސަލައަކީ ރަޖިސްޓްރީ ކޮށްފައިވާ މީޑިޔާއަކުން ބްރޯޑްކާސްޓް ކުރުމުގެ ޤާނޫނާއި އެ ޤާނޫނުގެ ދަށުން ހެދިފައިވާ ގަވާއިދުތަކާއި ޚިލާފަށް އަދި ބްރޯޑްކާސްޓުކުރުމުގެ ކޯޑް އޮފް ކޮންޑަކްޓް އާ ޚިލާފަށް ކޮންޓެންޓެއް ބްރޯޑްކާސްޓްކުރުމުގެ މައްސަލައަކަށްވާތީ އެމައްސަލަ މޯލްޑިވްސް ބްރޯޑްކާސްޓިންގ ކޮމިޝަންގެ ސަމާލުކަމަށް ފުލުހުން މެދުވެރިގެން ގެނެސްފައިވާކަމަށެވެ.
މި މައްސަލައަކީ ބްރޯޑްކާސްޓިންގ ކޮމިޝަނުގެ ފަރާތުން ތަހުގީގުކުރުމަށްފަހު އެމައްސަލައާ ގުޅިގެން ފިޔަވަޅު އަޅަންޖެހޭ ފަރާތްތަކަށް ފިޔަވަޅު އަޅާފައިވާ ފުލުހުން ކޮމިޝަނަށް އަންގާފައިވެއެވެ. އަދި ކޮމިޓީން މިމައްސަލަ ބަލައި ދިރާސާކުރުމުން އެމައްސަލައިގައި ފުލުހުން އަމަލުކޮށްފައިވާ ގޮތަށް ބަލާއިރު އެމައްސަލައިގައި އެ ސަރވިސްއިން ބަލަންޖެހޭ ކަންކަން ބަލައި ފިޔަވަޅު އަޅާފައިވާކަން އެނގެން އޮންނަކަމަށެވެ.
އެހެންކަމުން މިކަމުގައި ކޮމިޓީން އިތުރު ފިޔަވަޅެއް ނުވަތަ އެންގުމެއް އަންގަންޖެހޭ ތަނެއް އޮތްކަމަށް ނުފެންނަކަމަށް ކޮމިޓީންވަނީ ނިންމާފައެވެ. މި ރިޕޯޓް ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 58 މެމްބަރުންގެ ވޯޓުންނެވެ.
