ކޮވިޑް-19އާއި އެކު ރާއްޖޭގެ ފަތުރުވެރިކަމަށް ހުއްޓުމެއް އައި ނަމަވެސް އަލުން ބޯޑަރު ހުޅުވާލިފަހުން ރާއްޖެ އަންނަ ފަތުރުވެރިންގެ އަދަދު ދަނީ އެއްދުވަހުން އަނެއް ދުވަހަށް އިތުރުވާން ފަށައިފި އެވެ.

ބޯޑަރު ހުޅުވާލި ފުރަތަމަ 15 ދުވަހު ރާއްޖެއަށް 1,701 ފަތުރުވެރިން އައިސްފައިވާއިރު، އޮގަސްޓް މަހު ރާއްޖެ އައި ފަތުރުވެރިންގެ އަދަދު ވަނީ 7,628 އަށް އިތުރުވެފަ އެވެ. އަދި ސެޕްޓެމްބަރ މަހު އެ އަދަދު 9,538 އިތުރުވެފައިވާ އިރު، އޮކްޓޫބަރ މަހު ރާއްޖެ އައި ފަތުރުވެރިންގެ އަދަދު ވަނީ 21,515 ފަތުރުވެރިންނަށް އިތުރުވެފައެވެ. އަދި ނިމިދިޔަ ނޮވެމްބަރ މަހު 35,759 ފަތުރުވެރިން ވަނީ ރާއްޖެ އައިސްފަ އެވެ.

ޑިސެމްބަރ މަހު ރާއްޖޭގެ ފަތުރުވެރިކަމުގެ ހައި ސީޒަން ފެށިފައިވާއިރު، ފުރަތަމަ ފަސް ދުވަހު އެކަނިވެސް ރާއްޖެ އަށް 9,705 ފަތުރުވެރިން ވަނީ އައިސްފަ އެވެ. އެގޮތުން ޑިސެމްބަރ އެއް ވަނަ ދުވަހު 2,031 ފަތުރުވެރިން އައިސްފައިވާ އިރު، ދެ ވަނަ ދުވަހު އައިސްފައި ވަނީ 1,455 ފަތުރުވެރިންނެވެ. އަދި ތިން ވަނަ ދުވަހު 1,613 ފަތުރުވެރިން ރާއްޖެ އައިސްފައިވާ ކަމަށް ޓޫރިޒަމް މިނިސްޓްރީގެ ތަފާސްހިސާބުތައް ދައްކާއިރު، ޑިސެމްބަރ ހަތަރު ވަނަ ދުވަހު ރާއްޖެ އައިސްފައި ވަނީ 1,682 ފަތުރުވެރިންނެވެ.

ޑިސެމްބަރ ފަސް ވަނަ ދުވަހު ރާއްޖެ އަށް މިހާތަނަށް އެންމެ ގިނަ އަދަދެއްގެ ފަތުރުވެރިން އެއްދުވަހާ އައިސްފައިވާ އިރު، ފަސް ވަނަ ދުވަހު 2,924 ފަތުރުވެރިން ވަނީ ރާއްޖެ އައިސްފަ އެވެ.

ރާއްޖެ އަންނަ ފަތުރުވެރިންގެ އަދަދު އިތުރުވަމުން އަންނަ އިރު، މިހާތަނަށް އެންމެ ގިނަ އަދަދެއްގެ ފަތުރުވެރިން ރާއްޖެ އައިސްފައި ވަނީ ރަޝިއާއިންނެވެ. އެގޮތުން އެގައުމުން 18,937 ފަތުރުވެރިން ވަނީ ރާއްޖެ އައިސްފަ އެވެ.

މީގެ އިތުރުން ރާއްޖޭގެ ފަތުރުވެރިކަން އަލުން ފަށައިގަނެފައިވާ އިރު، ފަތުރުވެރިންނަށް ހިދުމަތްދޭ 395 ފެސިލިޓީއެއް ވަނީ މިހާރު އޮޕަރޭޓްކުރަން ފަށާފައެވެ. އެއީ 135 ރިސޯޓާއި، ފަސް ހޮޓަލްގެ އިތުރުން، 123 ސަފާރީ އަކާއި 132 ގެސްޓްހައުސް އެވެ.

ރާއްޖޭގެ ބޯޑަރު ތިން މަސް ދުވަހަށްވުރެ ގިނަ ދުވަހު ބަންދުކޮށްފައި އޮތުމަށް ފަހު އަލުން ހުޅުވާލާފައި ވަނީ ގިނަ މަޝްވަރާތަކަކަށްފަހު ސަލާމަތީ ގޮތުން އަޅަންޖެހޭ ގިނަ ފިޔަވަޅުތަކެއް އަޅައިގެންނެވެ. އެހެން ނަމަވެސް މިހާލަތުގައިވެސް ފަތުރުވެރިންގެ މެދުގައި ރާއްޖެ އަށް އޮތް ޑިމާންޑް އިތުރުވުމާއި ގުޅިގެން ގިނަ އެއަރލައިން ތަކަކުން ވަނީ ރާއްޖެއަށް ކުރާ ދަތުރުތައް އިތުރުކޮށްފައެވެ. އެގޮތުން މިހާރު 19 އެއަރލައިނަކުން އަންނަނީ ރާއްޖެއަށް ދަތުރުތައް ކުރަމުންނެވެ. އަދި ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިމަހުގެ ތެރޭގައި އިތުރު ހަތް އެއަރލައިނަކުން ދަތުރުތައް ފެށުމަށް ވަނީ ހަމަޖެހިފަ އެވެ.

ބަލިމަޑުކަމުގެ ތޭރަގައިވެސް ރާއްޖެއަށް އަންނަ ފަތުރުވެރިންގެ އަދަދު އިތުރުވަމުން އަންނައިރު، ފެތުރުވެރިންގެ މެދުގައި ރާއްޖެއާއި މެދު އޮތް އިތުބާރު ވަނީ ހިފެހެއްޓިފައެވެ. އަދި މިސިނާއަތުގައި މަސައްކަތްކުރާ ފަރާތްތަކުގެ މަސައްކަތްތަކުގެ ސަބަބުން ރާއްޖެއަށް ވަނީ ފަތުރުވެރިކަމުން ލިބޭ އެންމެ ޝަރަފުވެރި އެވޯޑްކަމަށްވާ ވޯލްޑް ޓްރެވަލް އެވޯޑްސްގެ ވޯލްޑްސް ލީޑިން ޑެސްޓިނޭޝަން 2020 ލިބިފަ އެވެ.