ކޮވިޑް-19 އާލަމީވަބާގެ ސަބަބުން އިންޑޮނޭޝިއާގައި ހާލުގައި ޖެހުނު ފަރާތްތަކަށް އެހީ ފޯރުކޮށްދޭން ހަވާލުކުރި ދެ ކޮންޓްރެކްޓަރެއްގެ އަތުން ރިޝްވަތު ނެންގެވި މައްސަލައެއްގައި އެ ގައުމުގެ ސޯޝަލް އެފެއަރޒް މިނިސްޓަރު، ޖުލިއާރީ ބަޓުބަރާ ހައްޔަރުކޮށްފިއެވެ.

ބޭރުގެ މީޑިއާ ރިޕޯޓްތައް ބުނާގޮތުން، އިންޑޮނޭޝިއާގެ އެންޓި ކޮރަޕްޝަން އޮފިޝަލުންވަނީ އާދިއްތަ ދުވަހުގެ ވަގުތެއްގައި ޖަކާޓާގައި ހުންނަ ކޮރަޕްޝަން އިރެޑިކޭޝަން ކޮމިޝަނުގެ ހެޑްކުއާޓަރަށް ހާޒިރުކޮށް، ސުވާލުކޮށްފައެވެ.

އޭނާ ހައްޔަރުކޮށްފައިވަނީ އެ ކޮމިޝަނުގެ ފަރާތުން ހިންގި ހާއްސަ އޮޕަރޭޝަނަކަށް ފަހުއެވެ. އެ އޮޕަރޭޝަންގައި ބަޓުބަރާގެ ދަށުން މަސައްކަތްކުރާ މިނިސްޓްރީގެ ދެ އޮފިޝަލަކާއި، ޕްރައިވެޓް ކޮންޓްރެކްޓަރުންތަކެއް ހައްޔަރުކޮށްފައިވާއިރު، އެ މީހުންގެ ގެތަކުން އެތައް މިލިއަން ޑޮލަރެއްގެ ނަގުދު ފައިސާ ހޯދާފައިވެއެވެ.

ކޮރަޕްޝަން އިރެޑިކޭޝަން ކޮމިޝަނުން ތުހުމަތުކުރާ ގޮތުގައި، މި ފައިސާއަކީ ބަޓުބަރާއަށް ލިބެންހުރި ފައިސާއެވެ. އެ ކޮމިޝަނުން މިހެން ތުހުމަތުކުރާ ސަބަބު ބަޔާންކޮށް މީޑިއާތަކުން ރިޕޯޓްކޮށްފައިވަނީ، އެ ދެ ކުންފުންޏާ މަސައްކަތް ހަވާލުކުރަން ނިންމީ ސީދާ ބަޓުބަރާގެ ބެލުމުގެ ދަށުންކަމަށް ވާތީއެވެ.

މި ދެ ކުންފުންޏަކީ ކޮވިޑާ ގުޅިގެން އިންޑޯނޭޝިއާގައި ހާލުގައި ޖެހުނު 10 މިލިއަން އާއިލާއަށް އެހީތެރިވުމަށް، ފައިސާ އާއި އަސާސީ ބޭނުންތައް ފުއްދަން ބޭނުންވާ ސާމާނު ފޯރުކޮށްދޭން ހަވާލުކުރެވުނު ދެ ކުންފުންޏެވެ. މި ކޮންޓްރެކްޓްތައް އެވޯޑް ކުރުމުން ބަޓުބަރާއަށް ރިޝްވަތުގެ ގޮތުގައި، 1.2 މިލިއަން ޑޮލަރު ލިބިފައިވާކަމަށް އެންޓި ކޮރަޕްޝަން އޮފިޝަލުން ތުހުމަތުކުރެއެވެ.

މި މައްސަލައާ ގުޅޭ މައުލޫމާތު ދެއްވަމުން ކޮރަޕްޝަން އިރެޑިކޭޝަން ކޮމިޝަނުގެ ޗެއަރމަން ފިރްލީ ބަހުރީ ވިދާޅުވީ، މި މައްސަލަތައް ބަޓުބަރާގެ މައްޗަށް ސާބިތުވެއްޖެނަމަ އޭނާއަށް ގާނޫނުން ދެވެން އޮތް އެންމެ ހަރުކަށި އަދަބު ދޭނެކަމަށެވެ. ސަބަބަކީ ބަލިމަޑުކަމެއްގެ ތެރޭގައި ނާޖައިޒު ފައިދާތަކެއް ނަގަން އުޅުމެވެ.

ބަޓުބަރާއަކީ އިންޑޮނޭޝިއާގެ ރައީސް ޖޯކޯ ވިޑޯޑޯގެ ކެބިނެޓުގައި ހިމެނިވަޑައިގަންނަވާ ވަޒީރުންގެ ތެރެއިން ކޮރަޕްޝަންގެ މައްސަލައެއްގައި ހައްޔަރުކުރެވުނު ދެވަނަ ވަޒީރެވެ. މީގެ ކުރިން ރިޝްވަތު ނެގުމުގެ މައްސަލައެއްގައި ހައްޔަރުކުރެވުނީ ފިޝަރީޒް މިނިސްޓަރު އެދީ ޕްރަބޯވޯއެވެ.