ޔާމިންގެ މަރުގެ މިނިވަން ތަހްޤީގެއް ކުރުމަށް އެމްޑީޕީން ކުއްލި މައްސަލައެއް މަޖިލީހަށް ހުށަހަޅައިފި
25 އެޕްރީލު 2017 | އަންގާރަ 21:39ޔާމިންގެ މަރަކީ ފުލުހުންގެ އިހުމާލުން ހިނގާފައިވާ ކަމެއް ކަމަށް ޤަބޫލުކުރެވޭ
ޔާމީން ރަޝީދު
ސޯޝަލް މީޑިއާ އެކްޓިވިސްޓް އަދި ބްލޮގާ ޔާމިން ރަޝީދުގެ މަރުގެ ތަޙްޤީޤް މިނިވަން ފަރާތްތައް މެދުވެރިކޮށް ކުރިއަށް ގެންދިޔުމަށް ގޮވާލާ އެމްޑީޕީން މަޖިލީހަށް ކުއްލި މައްސަލައެއް ހުށަހަޅައިފި އެވެ.
މިމައްސަލަ އެމްޑީޕީގެ ފަރާތުން މަޖިލީހަށް ހުށަހެޅީ ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެމްބަރު އަލީ ނިޒާރު އެވެ. މިއީ ސ.ފޭދޫ ޗަނބޭލީގެ، 29 އަހަރުގެ ޔާމިން ރަޝީދު އަނިޔާވެރި ގޮތަކަށް މަރާލުމާއި ގުޅިގެން އޭނާއަށް ތަކުރާރުކޮށް މަރުގެ އިންޒާރު ބަޔަކު ދެމުންދާ ކަން ފުލުހުންނަށް ރިޕޯޓްކޮށްފައިވާއިރު މިކަމާއި ގުޅިގެން ފުހުން އެއްވެސް ޖަވާބެއް ދީފައި ނުވާ ކަމަށް މަޖިލީހަށް ހުށަހެޅި މައްސަލައެކެވެ.
އިންޒާރުތަކާ ގުޅިގެން އެއްވެސް ފިޔަވަޅެއް އަޅާފައިނުވާ ކަމަށް ޔާމީންގެ ޓުވީޓްތަކުން ހާމަވާއިރު، ފާޅުކަން ބޮޑު ގޮތެއްގައި ސަރުކާރަށް ނިސްބަތްވާ މީހުން ސޯޝަލް މިޑިޔާ މެދުވެރިކޮށް ފުލުހުންގެ ރަސްމީ ޓްވިޓާ އެކައުންޓް ޓެގްކޮށް ޔާމީނަށް މަރުގެ އިންޒާރު ދީފައިވާއިރުވެސް ޕޮލިސްއިން މިކަން ތަޙްޤީޤްކޮށްފައި ނުވާ ކަމަށާއި އެހެންކަމުން ޔާމީންގެ މަރަކީ ފުލުހުންގެ އިހުމާލުން ހިނގާފައިވާ ކަމެއް ކަމަށް ޤަބޫލު ކުރުމުގެ ޖާގަ އޮތް ކަމަށް އެމްޑީޕީން ހުށަހެޅި މައްސަލައިގައި ބުނެ އެވެ.
ރިލްވާން ފަދަ އެތައް ބަޔަކަށް ސޯޝަލް މީޑިޔާ މެދުވެރިކޮށް އިންޒާރު ދެމުންދާއިރު ރައްޔިތުންގެ މަޖިލީހުގެ އެތައް މެމްބަރުންނާއި އަދި ސިޔާސީ އެތައް ފަރާތްތަކަށާއި ނޫސްވެރިންނަށް މިފަދަ އެތައް އިންޒާރުތައް ލިބި، ފުލުހުންނަށް ރިޕޯޓް ކުރުމާ ގުޅިގެންވެސް ފުލުހުންނަށް އެއްވެސް ކަމެއް ބަލާފައި ނުވާ ކަމަށް އެމްޑީޕީން ބުނެ އެވެ.
އެހެންކަމުން ޔާމިންގެ މަރުގެ ތަޙްޤީޤް އެންމެ ފުރިހަމަ ގޮތުގައި މޯލްޑިވްސް ޕޮލިސް ސަރވިސްއަށް ހިންގިދާނެ ކަމަށް ޤަބޫލު ނުކުރެވޭތީ ޑރ.އަފްރާޝީމްއާއި ނޫސްވެރިޔާ ރިލްވާންގެ ވަގަށް ނެގި މައްސަލަވެސް މިހާތަނަށް ފުރިހަމަ ތަޙްޤީޤެއް ހިންގިފައި ނުވާތީ ޔާމީން ރަޝީދުގެ މަރުގެ ތަޙްޤީޤް މިނިވަން ފަރާތްތައް މެދުވެރިކޮށް ކުރިއަށްގެންދިޔުމަށް އެދި މަޖިލީހުގެ 145 ވަނަ މާއްދާގެ ދަށުން ކުއްލި މައްސަލަ މަޖީލަށް ވަނީ ހުށަހަޅާފައެވެ.
