އައު ތެލެސީމިއާ ސެންޓަރުގެ މަސައްކަތް ކުރިއަށްއޮތް 10 ދުވަހުގެ ތެރޭގައި ފަށަނީ
5 ޑިސެމްބަރު 2020 | ހޮނިހިރު 07:00ތެލެސީމިއާ ސެންޓަރު މިހާރު ހިންގަމުންދާ އިމާރާތުގައި ޖާގައިގެ ދަތިކަމާއި ވަސީލަތްތައް މަދު
ހުޅުމާލޭގައި އިމާރާތްކުރާ އައު ތެލެސީމިއާ ސެންޓަރު ހުންނަ ސަރަހައްދަށް ނައިބު ރައީސް ވަޑައިގެން ކަމާބެހޭ ފަރާތްތަކާ މަޝްވަރާ ކޮށްލައްވަނީ
ތެލެސީމިއާ ކުދިންނަށް ފަރުވާ ދިނުމަށްޓަކައި އަލަށް ތަރައްގީކުރާ މަރުކަޒުގެ މަސައްކަތް ކުރިއަށް އޮތް 10 ދުވަހުގެ ތެރޭގައި ފަށާނެ ކަމަށް ސަރުކާރުން ބުނެފި އެވެ.
ހުޅުމާލޭގައި ތަރައްގީކުރާ އާ ތެލެސީމިއާ ސެންޓަރު އިމާރާތް ކުރުމަށްވަމުންދާ ތައްޔާރީތައް ބައްލަވާލެއްވުމަށް ހުކުރު ދުވަހު ނައިބު ރައީސް ފައިސަލް ނަސީމް ވަނީ އެމަސައްކަތް ކުރިއަށްދާ ސަރަހައްދަށް ޒިޔާރާތް ކުރައްވާ ބައްލަވާ ލައްވާފަ އެވެ.
މި ޒިޔާރަތުގައި ނައިބު ރައީސް ފައިސަލް ނަސީމްގެ އަރިހުގައި މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓަރަކްޗަރ މުޙައްމަދު އަސްލަމާއި، މިނިސްޓަރ އޮފް ހެލްތު އަޙްމަދު ނަސީމާއި، ހައުސިންގ ޑިވެލޮޕްމަންޓް ކޯޕަރޭޝަން (އެޗް.ޑީ.ސީ)ގެ މެނޭޖިންގ ޑިރެކްޓަރ ސުޙައިލް އަޙްމަދު ބައިވެރިވެ ވަޑައިގެންނެވިއެވެ. އަދި، އެ ބޭފުޅުން ވަނީ ހުޅުމާލޭގައި ހިންގާ ބައެއް މަޝްރޫޢުތައް ކުރިއަށްދާ ގޮތުގައި މަޢުލޫމާތު ނައިބު ރައީސާ ޙިއްޞާ ކުރައްވާފައެވެ.
ތެލެސީމިއާ ކުދިންނަށް ފަރުވާ ދިނުމަށް ސަރުކާރުން ކަނޑައަޅާފައިވާ ތަނަކީ މާލޭ ސިއްހީ މަރުކަޒު ކުރިން ހިންގި، އިމާރާތުގެ ބައެއްގަ އެވެ. އެތަނުގައި 1994 ވަނަ އަހަރުން ފެށިގެން ތެލެސީމިއާ ސެންޓަރު ހިންގަމުންދާއިރު، އެތަނުގެ ޖާގައިގެ ދަތިކަމާއި، ވަސީލަތާއި ހިދުމަތުގެ ފެންވަރާމެދު ފަރުވާ ހޯދާ ކުދިންނާއި އެކުދިންގެ ބެލެނިވެރިންގެ ކަންބޮޑުވުންތައް އަބަދުވެސް އެއިރެއްގައި އޮންނަ ސަރުކާރުގެ ސަމާލުކަމަށް ގެންނަމުން ދެއެވެ. އެގޮތުން ތެލެސީމިއާ ކުދިންގެ ބެލެނެވެރިން ވަނީ އެފަރާތްތަކުގެ ކަންބޮޑުވުންތައް ދާދިފަހުން ހެލްތް މިނިސްޓަރު ކަމަަށް އައްޔަން ކުރެއްވި އަހުމަދު ނަސީމްއާ ވެސް ހިއްސާ ކުރައްވާފަ އެވެ.
ހެލްތް މިނިސްޓަރ ނަސީމް ވަނީ ތެލްސީމިއާ ކުދިންނަށް ބޭނުންވާ ޚިދުމަތްތައް ފުޅާކޮށް، ފަރުވާދޭ ސެންޓަރަކީ ކުދިންނާއި ގާތް ރައްޓެހި ތަނެއްގެ އިޙުސާސްކުރެވޭ ފަދަ ތަނަކަށް ހަދާނެކަމުގެ ޔަޤީންކަން ދެއްވާފައެވެ.
