މުހިއްމު ތިން މަޝްރޫއެއް އިފްތިތާހުކުރެއްވުމަށް ރައީސް ސޯލިޙު ލާމު އަތޮޅަށް!

މުހިއްމު މަޝްރޫއުތަކެއް އިފްތިތާޙުކޮށްދެއްވުމަށް ހައްދުންމަތީ ކައްދޫ އަދި ގަމަށް ކުރައްވާ ދަތުރުފުޅެއްގައި ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙު ފުރާވަޑައިގެންފިއެވެ.

މި ދަތުރުފުޅަށް ރައީސް ފުރާވަޑައިގެންނެވީ ބުރާސްފަތި ދުވަހުގެ މެންދުރުފަހުއެވެ. އެކަމާ ގުޅޭގޮތުން ރައީސް އޮފީހުން ބުނީ، ރައީސުލްޖުމްހޫރިއްޔާގެ މި ދަތުރުފުޅުގައި މިއަދު ކައްދުއަށް ވަޑައިގެން މޯލްޑިވްސް ނެޝަނަލް ޑިފެންސް ފޯސްގެ ސެންޓްރަލް އޭރިއާގެ މަރުކަޒުގައި ކުރިއަށްގެންދިއުމަށް ހަމަޖެހިފައިވާ ތަމްރީނުތަކެއްގެ ޑެމޯ ބައްލަވާލެއްވުމަށް ހަމަޖެހިފައިވާކަމަށެވެ. އަދި އެއަށްފަހު ލ. ގަމަށް ވަޑައިގަންނަވާ، އެ ރަށުގެ ރައްޔިތުންނާ ބައްދަލު ކުރައްވާނެކަމަށް ރައީސް އޮފީހުން މައުލޫމާތުދެއެވެ.

އޭގެ އިތުރުން، ލ. ގަމުގެ މަރުކަޒީ އިންޖީނުގެ އެއް ވިއުގައަކުން ގުޅާލުން އިފްޠިތާހު ކޮށްދެއްވުމަށްވެސް ހަމަޖެހިފައިވާކަން ރައީސް އޮފީހުން ފާހަގަކޮށްފައިވެއެވެ. އަދި ގަމުގައި ތަރައްޤީކޮށްފައިވާ ޒޯން ސްޓޭޑިއަމްގެ ފުޓުބޯޅަ ދަނޑު ހުޅުއްވައިދެއްވުމަށާއި، އެ ރަށުގެ ހޮސްޕިޓަލުގައި އަލަށް ތަޢާރަފުކުރުމަށް ހަމަޖެހިފައިވާ ސީޓީ ސްކޭންގެ ޚިދުމަތް ފައްޓަވައިދެއްވުމަށްވަނީ ހަމަޖެހިފައެވެ.

މި ދަތުރުފުޅުގައިވެސް ގިނަ މަޝްރޫއުތަކެއް އިފްތިތާހުކުރުމަށް ނިންމާފައިވާއިރު، މި ސަރުކާރު އައުމަށްފަހު ރައްޔިތުންނަށް މަންފާ ކުރާނެ ގޮތަކަށް ތަރައްޤީޤެ މަޝްރޫއުތައް ދަނީ ބައްޓަން ކުރަމުންނެވެ. އެގޮތުން ކޮވިޑުގެ މި ޙާލަތުގައިވެސް ސަރުކާރުން ގެންދަނީ ތައްޔިތުންނަށް ކޮންމެހެން ބޭނުންވާ ޚިދުމަތްތައް ފޯރުކޮށްދިނުމާ ގުޅޭ ތަރައްޤީގެ މަޝްރޫއުތައް މެދުކެނޑުމެއްނެތި ކުރިއަށް ގެންދާކަމަށް ރައީސް އޮފީހުން މައުލޫމާތުދެއެވެ.