ސާމްޕަލްތަކުގެ އަދަދު ހާމަކުރުމުގައި ރައްޔިތުންނަށް ފޮރުވާނެ އެއްޗެއް ނެތް: ޑރ ނަޒްލާ
ކޮންމެ ދުވަހެއްގައި ވެސް އެދުވަހެއްގައި ޓެސްޓުކުރުވޭ ސާމްލަތަކުގެ އަދަދު ހާމަކުރަމުންދަނީ
ހެލްތު އިމަރޖެންސީ އޮޕަރޭޝަން ސެންޓަރ (އެޗްއީއޯސީ)ގެ ތަރުޖަމާން ޑރ ނަޒްލާ ރަފީގް
ދުވަހުން ދުވަހަށް ޓެސްްޓުކުރާ ސާމްޕަލްތަކުގެ އަދަދު ހާމަކުރުމުގައި، އެއްވެސް ފޮރުވުމެއް ނޯންނާނެ ކަމަށް ހެލްތު އިމަރޖެންސީ އޮޕަރޭޝަން ސެންޓަރ (އެޗްއީއޯސީ)ގެ ތަރުޖަމާން ޑރ ނަޒްލާ ރަފީގް ވިދާޅުވެއްޖެއެވެ.
ކޯވިޑް-19 ގެ ސަބަބުން އާންމުކޮށް ނަގަމުން އަންނަ ސާމްޕަލްތަކާއި ރަށްތަކާއި، ރިސޯޓުތަކުން ލިބޭ ސާމްޕަލްތަކުގެ އަދަދު ސައްޙަ ގޮތުގައި ހާމަކުރަމުން ނުދާ ކަމަށް ބުނެ، ބައެއް ރައްޔިތުން ކުރަމުންދާ ސުވާލުތަކަށް ޖަވާބު ދެއްވަމުން ޑރ ނަޒްލާ ވިދާޅުވީ، ކޮންމެ ދުވަހެއްގައި ވެސް އެދުވަހެއްގައި ޓެސްޓުކުރުވޭ ސާމްލަތަކުގެ އަދަދު ހާމަކުރަމުންދަނީ އެއްވެސް ފޮރުވުމެއް ނެތި، އެހެން ދުވަހަކަށް ބަހައްޓައިގެން ނޫން ކަމަށެވެ.
އެގޮތުން އެންއީއޯސީ އިން ފެށިގެން ވެސް އަމަލުކުރަން ފެށި އުސޫލާއެކު، މިއަދު ސައްހަ މައުލޫމާތު ރައްޔިތުންނަށް ފޯރުކޮށްްދިނުމަށް ކުރެވޭ މަސައްކަތް ޔަގީންވާ ކަމަށް އޭނާ ވިދާޅުވިއެވެ.
ކޯވިޑް-19 ކޮންޓްރޯލް ކުރުމަށް އަޅާ ފިޔަވަޅުތަކަށް ލުއި ދިނުމުގެ ގޮތުން އެއް ރަށުން އަނެއް ރަށަށް ދަތުރު ކުރުމުގައި ކަރަންޓީނުވާން ޖެހޭ މުއްދަތަކީ 10 ދުވަސް ކަމަށް ކަނޑައަޅާފައިވާއިރު، މި ލިބޭ ލުއިތަކަކީ "ތިމާ އާއި އަނެކާ"ގެ ސަލާމަތަށް ވިސްނާ، ހެދިފައިވާ ގަވައިދުތަކަށް އިތުރަށް ސަމާލުވާންޖެހޭ ކަން ކަމެވެ. ލިބިދޭ ލުއިތަކުގެ ތެރެއިން އާންމުންގެ ތެރެއަށް ނުކުމެ އުޅުމުގައާއި އެއް ރަށުން އަނެއް ރަށަށް ދިއުމުގައި ވެސް ހެދިފައިވާ ގަވައިދުތަކަށް ފުރިހަމައަށް އިހިތުރާމް ކުރަންޖެހޭނެ އެވެ.
ކޯވިޑް-19 އާއި ގުޅިގެން ރާއްޖޭގައި ހެދިފައިވާ ގަވައިދުތަކާއި، އާންމުކޮށްފައިވާ ކުއްލި ނުރައްކަލުގެ ހާލަތަށް ލުއިތައް ދިނުމާ ގުޅޭގޮތުން ވާހަކަ ދައްކަވަމުން ޑރ ނަޒްލާ ވިދާޅުވީ، އެފަދަ ލުއިތައް ދިނުމުގައި އެންމެ ފުރަތަމަ ބަލަނީ މާލެ ސަރަހައްދުގައި ކޭސްތަކުގެ އަދަދު ހުރި ވަރަކަށް ކަމަށެވެ. އަދި ލުއިތައް ދިނުމުގައި ހަމައެކަނި ކޭސްތައް ފެންނަ އަދަދަށް ބެލުމަށްފަހު، ކޮންމެ ހަފްތާއަކުން ހަފްތާއަކަށް ބަލަމުން އަންނަ މުހިންމު ކަންކަމުގެ މައްޗަށް ރިއާޔަތްކުރެވި، އެކަން ކަން ބެލިގެން ނޫން ގޮތަކަށް ލުއި ދެވެން ނޯންނަ ކަމަށް ވެސް އޭނާ ވިދާޅުވިއެވެ.
ޑރ ނަޒްލާ ވިދާޅުވީ، ކޮވިޑާއި ގުޅިގެން ރާއްޖޭގެ ކޮންމެ ހިސާބަކަށްވެސް ލުއި ދެވެނީ އެކަމަށް ކަނޑައެޅިފައި އޮންނަ ޓެކްނިކަލް ޓީމުގެ ލަފާގެ މަތިން ވަކި ޕޮލިސީއެއްގެ ތެރެއިން ކަމަށެވެ.
