އިންސާނީ ވަގުފާރީގެ ކުށްތައް މާނަކުރުން ފުޅާވާގޮތަށް ހުށަހެޅި އިސްލާހު ކޮމިޓީއަށް
1 ޑިސެމްބަރު 2020 | އަންގާރަ 10:50ބިލް ބަލައިގަތުމަށް 59 މެމްބަރުން ވަނީ ވޯޓު ދެއްވާފައި
ރައްޔިތުންގެ މަޖިލީހުގެ ޖަލްސާގެ ތެރެއިން
މިހާރު އަމަލުކުރަމުން އަންނަ މީހުން ޓްރެފިކްކުރުން ހުއްޓުވުމުގެ ޤާނޫނުގައި ކަނޑައަޅާފައިވާ މީހުން ޓްރެފިކްކުރުމުގެ ކުށާއި ކުޑަކުދިން ޓްރެފިކްކުރުމުގެ ކުށާއި އެކްސްޕްލޮއިޓޭޝަންގެ އަމަލު ހިންގުމުގެ މާނަ އެއަށްވުރެ ފުޅާވާ ގޮތަށް އެ ޤާނޫނަށް ހުށަހެޅި އިސްލާހު މަޖިލީހަށް ބަލައިގަނެ ދިރާސާ ކުރުމަށް ޤައުމީ ސަލާމަތާއި ޚާރިޖީ ގުޅުންތަކުގެ ކޮމިޓީއަށް ފޮނުވައިފިއެވެ.
ސަރުކާރުގެ ފަރާތުން އެ ބިލް ރައްޔިތުންގެ މަޖިލީހަށް ހުށަހެޅުއްވީ ހިންނަވަރު ދާއިރާގެ މެމްބަރ ޖީހާން މަހުމޫދެވެ. މި ބިލު ބަލައިގަތުމަށް ނެގުނު ވޯޓުގައި ބައިވެރިވެވަޑައިގެންނެވި 59 މެމްބަރުންގެ އިއްތިފާގުން ވަނީ ބިލް ބަލައިގަތުމަށް ފާސްވެފައެވެ. ބިލް ހުށަހަޅުއްވަމުން ޖީހާން ވިދާޅުވީ މި ބިލް ހުށަހަޅުއްވާ މައިގަނޑު ތިން މަގްސަދެއްވާ ކަމަށެވެ.
އޭގެ ތެރެއިން އެއް މަގްސަދަކީ ޓްރެފިކްކުރުމުގެ ކުށާއި އެކްސްޕްލޮއިޓޭޝަންގެ އަމަލު ހިންގުމުގެ މާނަ ރާއްޖެއިން ބައިވެރިވެފައިވާ ބައިނަލްއަގްވާމީ މުއާހަދާއެއް ކަމުގައިވާ "ޔުނައިޓެޑް ނޭޝަންސް ކޮންވެންޝަން އަގެއިންސްޓް ޓްރާންސްނެޝަނަލް އޯގަނައިޒްޑް ކްރައިމް" ގެ ޕްރޮޓޮކޯލްއެއް ކަމުގައިވާ "ޕްރޮޓޮކޯލް ޓު ޕްރިވެންޓް، ސަޕްރެސް އެންޑް ޕަނިޝް ޓްރެފިކިންގ އިން ޕަރސަންސް އެސްޕެޝަލީ ވިމެން އެންޑް ޗިލްޑްރަން" އާ އެއްގޮތް ކުރުމަށްޓަކައި ޤާނޫނަށް އިސްލާހު ގެނައުން ކަމަށެވެ. އަދި އެ އިސްލާހުތަކާއި ގުޅިގެން އެ ޤާނޫނުގެ އެހެން މާއްދާތަކަށް ގެންނަން ޖެހޭ އިސްލާހުތައް ގެނައުން ކަމަށް ޖީހާން ވިދާޅުވިއެވެ.
ޖީހާން ވިދާޅުވީ މިހާރު ޓްރެފިކްކުރުން މާނަކޮށްފައި އޮތްގޮތުން ޓްރެފިކްކުރުމުގެ އަމަލުގެ ތެރޭގައި ރެކްރޫޓްކުރުމާއި ގެންގުޅުމާއި ރިސީވްކުރުން ނުހިމެނޭ ކަމަށެވެ. އެގޮތުން ހިމެނިފައި ނުވުމުގެ ސަބަބުން މިކުށްކުށަކީ ޤާނޫނީ ކުށަކަށް ނުހެދޭ ކަމަށާއި އެހެންކަމުން މި އަމަލުތައް ހިންގާ މީހުން ޤާނޫނީ ގޮތުން ޒިންމާދާރު ނުކުރެވޭކަމަށް ޖީހާން ވިދާޅުވިއެވެ.
އެހެންކަމުން މިހާރު ބިލް ހުށަހަޅާފައިވަނީ އެ ހުރިހާ ކަމެއްވެސް ހިމެނޭގޮތަށް ކަމަށް ޖީހާން ވިދާޅުވިއެވެ. މީގެ އިތުރުން މި ބިލް ސަރުކާރުން ހުށަހަޅާ ދެ ވަނަ މަގްސަދަކީ ޓްރެފިކްކުރުމުގެ އަމަލެއް ހިންގުމަށް ބޭނުންކުރާ މުދަލާއި ފައިސާ އާއި ކުށުގެ އަމަލުން ހޯދާފައިވާ މުދަލާއި ފައިސާ ދައުލަތަށް ނެގުމުގެ ބާރު މިޤާނޫނަށް ގެންނަ އިސްލާހުން ލިބިދިނުން ކަމަށްވެސް ޖީހާން ވިދާޅުވިއެވެ.
މި ޤާނޫނަށް ސަރުކާރުން ހުށަހަޅާ ތިން ވަނަ ސަބަބަކީ ޓްރެފިކް ކުރެވޭ މީހުންނަށް ލިބޭ ގެއްލުމުގެ ބަދަލުގެ ގޮތުގައި ކޯޓަށް ނަގައިދެވޭ ގެއްލުމުގެ ބާވަތްތައް ކަނޑައެޅުން ކަމަށް ޖީހާން ވިދާޅުވިއެވެ. ސަރުކާރުގެ ފަރާތުން މި ޤާނޫނަށް 12 އިސްލާހެއް ވަނީ ހުށަހަޅާފައެވެ.
