ޑިމޮކްރަސީ، އިންސާނީ ހައްގުތައް ނެގެހެއްޓުމަށް އދ އިން ގޮވާލައިފި
ރާއްޖޭގައި ޑިމޮކްރަސީ ދެމެހެއްޓުމަށާއި އިންސާނީ ހައްގުތައް ދެމެހެއްޓުމަށް އދ އިން ރާއްޖޭގެ ސަރުކާރަށް ގޮވާލި
އދ. ގެ ޖެނެރަލް އެސެމްބްލީ: ރާއްޖޭގެ ހާލަތާ މެދު ވަނީ ކަންބޮޑުވުން ފާޅުކޮށްފައި
ރާއްޖޭގެ ކަންކަން ކައިރިން ބަލަމުންދާ ކަމަށާއި ރާއްޖޭގައި ޑިމޮކްރަސީ ދެމެހެއްޓުމަށާއި އިންސާނީ ހައްގުތައް ދެމެހެއްޓުމަށް އދ. އިން ރާއްޖޭގެ ސަރުކާރަށް ގޮވާލައްވައިފި އެވެ.
އދ. އިން މިހެން ގޮވާލީ މިއަދު ބޭއްވި ބްރީފިންގަ އެވެ.
އދ. ގެ ސެކެޓްރީ ޖެނެރަލް އެންޓޯނިއޯ ގުޓެރެޒްގެ ތަރުޖަމާނު ސްޓެފާން ދުޔާރިކް ވިދާޅުވީ ރާއްޖޭގެ ހާލަތު ވަރަށް ކައިރިން ބައްލަވަމުން ގެންދަވާ ކަމަށާއި ރާއްޖޭގައި ޑިމޮކްރަސީ ދެމެހެއްޓުމަށާއި ގާނޫނީ ހަމަތަކާއި އިންސާނީ ހައްގުތައް, ގައުމުގެ ގާނޫނު އަސާސީގައި ބަޔާންކޮށްފައިވާ ގޮތަށް ދެެމެހެއްޓުމަށް ބޭނުންވާ ކަންކަން ފުރިހަމަކުރުމަށް ސަރުކާރަށް ގޮވާލައްވާ ކަމަށެވެ.
މީގެ އިތުރުން ކުރިއެކޭ އެއްފަދައިން ގައުމުގެ ކަންކަން ހައްލުކުރުމަށް މަޝްވަރާތަކުގައި ބައިވެރިވުމަށް ހުރިހާ ސިޔާސީ ފަރާތްތަކަށް ވެސް އދ. އިން ވަނީ ގޮވާލާފަ އެވެ.
އދ. ގެ އިތުރުން، ކެނެޑާ، އެމެރިކާ، އިގިރޭސިވިލާތް، ޔޫރަޕިއަން ޔޫނިއަން އަދި ޖަރުމަނީ އިން ވެސް ވަނީ ރާއްޖޭގެ ހާލަތާ މެދު ކަންބޮޑުވުން ފާޅުކޮށްފަ އެވެ. އެގޮތުން ޖުމްހޫރީ ޕާޓީގެ ލީޑަރު ގާސިމް އިބްރާހީމް ހައްޔަރުކުރުމާ ގުޅިގެން ޖަރުމަނާއި އިނގިރޭސި ވިލާތުން ވެސް ވަނީ ކަންބޮޑުވުން ފާޅުކޮށްފައެވެ.
