ޑިސެމްބަރު 7 ވަނަ ދުވަހަށް މިއަހަރުގެ ތިންވަނަ ދައުރު ދިގު ދައްމާލުމަށް ރައްޔިތުންގެ މަޖިލީހުން ފާސްކޮށްފިއެވެ.
މިގޮތަށް ފާސްކޮށްފައިވަނީ 48 މެމްބަރުންގެ ވޯޓާއި އެކުއެވެ. ދައުރު ދިގު ދައްމާލަން ނުފެންނަ ކަމަށް 1 މެންބަރަކު ވޯޓު ދެއްވިއިރު، ވަކި ގޮތަކަށް ވޯޓު ނުދެއްވާ 1 މެންބަރަކު ވެސް ހުންނެވިއެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެފައިވަނީ މުހިއްމު މަސައްކަތްތައް ނިންމާލުމުގެ ގޮތުން މި ދައުރު ދިގު ދައްމާލުމަކީ ބޭނުންތެރިކަމެއް ކަމަށެވެ. އެގޮތުން އަންނަ އަހަރަށް ލަފާކުރާ ދައުލަތުގެ ބަޖެޓުގެ މަސައްކަތާއި، ފުލުހުންގެ ގާނޫނަށް އިސްލާހު ގެނައުމުގެ ބިލުގެ މަސައްކަތް ނިންމަން ޖެހޭ ކަން ފާހަގަކުރެއްވިއެވެ.
މީގެއިތުރުން، ޓުއަރިޒަމްގެ ގާނޫނަށް ހުށައެޅިގައިވާ އިސްލާހުތައް، މުޅި މަޖިލީހުގެ ކޮމިޓީން އަންނަނީ ދިރާސާ ކުރަމުންނެވެ. ބަހުސްގެ މަރުހަލާގައި ގިނަ މެންބަރުންގެ އިސްލާހުތަކެއް ލިބިފައިވާއިރު، އެ ބިލުގެ މަސައްކަތްތައްވެސް ދަނީ ވަޒީރުން ހާޒިރުކޮށްގެން ކުރަމުންނެވެ.
