ސަދާން އެފްރިކާ ގައުމެއް ކަމުގައިވާ ނަމެބިއާ އިން ކޮވިޑް-19 ގެ ވެކްސިން ގަތުމަށް ގްލޯބަލް ވެކްސިން ސްކީމް ކޮވެކްސް އާއިއެކު އެއްބަސްވުމުގައި ސޮއި ކޮށްފިއެވެ.

ނަމެބިއާއިން ވަނީ ކޮވިޑްގެ ވެކްސިން ގަތުމަށް ގްލޯބަލް ވެކްސިން ސްކީމް ކޮވެކްސް އާއިއެކު 1.7 މިލިއަން ޑޮލަރުގެ އެއްބަސްވުމެއްގައި ސޮއި ކޮށްފައެވެ.

މި އެއްބަސްވުމުގެ ދަށުން އަންނަ އަހަރުގެ ފުރަތަމަ ކުއާޓާގެ ތެރޭގައި އެގައުމުގެ 20 އިންސައްތަ މީހުންނަށް ކޮވިޑްގެ ވެކްސިން ލިބޭނެ ކަމަށް ނަމެބިއާގެ އޮފިޝަލުން ބުނެއެވެ.

ނަމެބިއާގެ އޮފިޝަލަކު ބުނީ ކޮވެކްސް އާއިއެކު އެއްބަސްވުމަކަށް އައީ ކޮވެކްސް އިން ފޯރުކޮށްދޭ ވެކްސިންގެ ކޮލެޓީ ބެލުމަށްފަހު ކަމަށާއި، އުންމީދަކީ މުޅި އާބާދީގެ ދެބައި ކުޅަ އެއްބަޔަށް އަންނަ އަހަރު ނިމުމުގެ ކުރިން ވެކްސިން ފޯރުކޮށްދިނުން ކަމަށެވެ.

ފަތުރުވެރިކަމަށް އަދި މައިނިންގ ބަރޯސާވެފައިވާ ނަމެބިއާ އަކީ މެދު ފަންތީގެ ގައުމެކެވެ.

އެފްރިކާގެ އެހެން ގައުމުތަކާއި ހިލާފަށް ނަމެބިއާ އިން ކޮވިޑަށް ޕޮޒިޓިވްވާ މީހުންގެ އަދަދު މަދުކަމަށް ރިޕޯޓްތައް ބުނެއެވެ. އެގޮތުން އެގައުމުން މިހާތަނަށް ކޮވިޑަށް ޕޮޒިޓިވްވެފައިވަނީ 14،000 މީހުންނެވެ. އަދި މި ބަލީގައި އެގައުމުން 147 މީހަކު ވަނީ މަރުވެފައެވެ.