ތައިފޫން ފައިޓަރ ޖެޓް ގަތުމަށް ގަތަރުން އިނގިރޭސިންނާއެކު 8 ބިލިއަން ޑޮލަރުގެ އެއްބަސްވުމަކަށް
ޓައިފޫން މަރުކާގެ ހަނގުރާމަމަތީ 24 ބޯޓް ގަންނާނެ
ގަތަރުގެ ޑިފެންސް މިނިސްޓަރ ޚާލިދު ބިން މުހައްމަދު އަލް އަތިއްޔާ އަދި އިނގިރޭސިވިލާތުގެ ޑިފެންސް މިނިސްޓަރ ގޭވިން ވިލިއަމްސަން
ގަލްފުގެ ގައުމުތަކުން މަތީ ފަންތީގެ ޓެކްނޮލޮޖީގެ ހަތިޔާރު ގަނެ އެއްކުރަމުންދާއިރު، 8 ބިލިއަން އެމެރިކާ ޑޮލަރު ޚަރަދު ކޮށްގެން ޓައިފޫން މަރުކާގެ ހަނގުރާމަމަތީ 24 ބޯޓް ގަތުމަށް ގަތަރުން ނިންމައިފިއެވެ.
އިނގިރޭސި ވިލާތާއެކު ވެވުނު އެއްބަސްވުމުގައި ގަތަރުގެ ފަރާތުން އެ ގައުމުގެ ޑިފެންސް މިނިސްޓަރ ޚާލިދު ބިން މުހައްމަދު އަލް އަތިއްޔާ ސޮއިކުރެއްވިއިރު އިނގިރޭސިވިލާތުގެ ފަރާތުން ސޮއިކުރައްވާފައި ވަނީ އެ ގައުމުގެ ޑިފެންސް މިނިސްޓަރ ގޭވިން ވިލިއަމްސަންއެވެ.
މިއީ ނިމިދިޔަ ދިހަ އަހަރަށް ވުރެ ދިގު މުއްދަތެއްގައި ޓައިފޫން ޖެޓް ގަތުމަށް ދެވުނު އެންމެ ބޮޑު އޯޑަރެވެ.
ވިލިއަމްސަން ވިދާޅުވީ މި ބޯޓްތަކުގެ ސަބަބުން، ދެ ގައުމުންވެސް ބޭނުންވާ ގޮތަށް ސަރަހައްދުގެ ހަމަޖެހުމާ އަދި ގަތަރުގެ ސަލާމަތަށް އަސްކަރިއްޔާއިން ހިންގާ މިޝަންތަކުގައި ދިމާވާ ގޮންޖެހުންތަކަށް ހައްލެއް ލިބި އަސްކަރިއްޔާއަށް ކުރިއެރުމެއް ލިބިގެންދާނެ ކަމަށެވެ.
ޓައިފޫން ޖެޓްގެ އެއްބަސްވުމުގެ ތެރޭގައި ގަތަރުގެ ވައިގެ ސިފައިންނަށް ތަމްރީނު ދިނުން ވެސް ހިމެނޭ ކަމަށް އެގައުމުން ނެރުނު ބަޔާނެއްގައިވެއެވެ.
މީގެ އިތުރުން ގަތަރުގެ ވައިގެ ސިފައިންނާ އިނގިރޭސި ވިލާތުގެ ރޯޔަލް އެއަރ ފޯސް ގުޅިގެން ޖޮއިންޓް އޮޕަރޭޝަން ސްކޮޑްރަން އެއް ފެށުމަށް ވެސް ވަނީ އެއްބަސްވެފައެވެ.
ޖޮއިންޓް އޮޕަރޭޝަން ސްކޮޑްރަންގެ ތެރެއިން 2022 ވަނަ އަހަރުގެ ވަރލްޑް ކަޕްގައި އޮޕަރޭޝަނަލް ކަވަރޭޖް އަދި ވައިގެ މަގުން ސަލާމަތީ ކަންކަން ބެލެހެއްޓުމުގައި މުހިއްމު ދައުރެއް އަދާކުރާނެކަމަށް ބުނެއެވެ.
އިނގިރޭސި ވިލާތާއެކު ވެވުނު އެއްބަސްވުމުގެ އިތުރުން އެއް ބިލިއަން ޑޮލަރުގެ އެއްބަސްވުމެއްގެ ދަށުން ފްރާންސްގެ ވައިގެ ދަތުރުފަތުރާ ބެހޭ ކުންފުންޏަކުން ޑަސަލްޓް ރަފައެލް ހަނގުރާމަމަތީ މަތިންދާ ބޯޓްގެ 12 ބޯޓް ގަތުމަށް ނިންމާފައިވާކަމަށް ވެސް ބުރާސްފަތި ދުވަހު ޤަތަރުންވަނީ ބުނެފައެވެ.
