ކެންޔާގެ ރިޔާސީ ރޭހުން އިދިކޮޅު ކެންޑިޑޭޓް ރައިލާ އޮޑިންގާ ވަކިވެވަޑައިގަންނަވައިފި އެވެ.

ކެންޔާގެ ރިޔާސީ އިންތިޚާބު އޮކްޓޯބަރު  މަހުގެ ތެރޭގައި އަލުން ބޭއްވުމަށް ތާވަލް ކޮށްފައިވަނިކޮށް، އިންތިޚާބުގައި ބައިވެރިވެވަޑައިނުގަތުމަށް އިދިކޮޅު ކެންޑިޑޭޓް ރައިލާ އޮޑިންގާ ނިންމެވީ، އެގައުމުގެ އިލެކްޓޯރަލް ކޮމިޝަނުން ވޯޓުގެ އިންތިޒާމްތައް ފުރިހަމަ ކުރުމަށް ގެންނަން ޖެހޭ ބަދަލުތަކަށް ވަގުތު ދިނުމާއި، އެންމެންނަށްވެސް ބަލައިގަނެވޭނެ ފަދަ އިންތިޚާބެއް ބޭއްވުމަށް ގެންނަން ޖެހޭ އިސްލާހުތައް ގެނައުމަށް ފުރުޞަތު ދިނުމުގެ ގޮތުން ކަމަށް ވިދާޅުވެ އެވެ.

ކެންޔާގައި 2017 ވަނަ އަހަރު އޯގަސްޓް މަހު ބޭއްވި ރިޔާސީ އިންތިޚާބު އެގައުމުގެ ސުޕްރީމް ކޯޓުން ބާތިލު ކޮށްފައިވާއިރު އެ ނިންމުން ސްޕްރީމް ކޯޓުން ނިންމީ އިންތިޚާބުގައި ނަހަމަ ކަންކަން ހިނގާފައި ވާތީ ކަމަށް ބުނެއެވެ. ސުޕްރީމް ކޯޓުން ބާތިލް ކުރި އިންތިޚާބުގެ ނަތީޖާ ދައްކާ ގޮތުން، އިންތިޚާބު ކާމިޔާބު ކުރެއްވީ އެޤައުމުގެ ވެރިކަމުގައި ހުންނަވި އުހުރު ކެންޔައްޓާ އެވެ. 

އޮޑިންގާ އިންތިޚާބުގައި ބައިވެރިވެވަޑައިނުގަންނަވާނެ ކަމަށް ވިދާޅުވެފައިވާއިރު އޭނޭ އިތުރަށް ވިދާޅުވީ 26 އޮކްޓޯބަރު ގައި ބާއްވަން ތާވަލުކޮށްފައިވާ އިންތިޚާބު، ކުރިން ބާއްވައިފައިވާ އިންތިޚާބަށް ވުރެ ގޯސްވާނެ ކަމަށް ބެލެވޭ ކަމަށެވެ. 

ކެންޔާގެ އިންތިޚާބާއި ދިމާކޮށް އިންތިޚާބާއި ބެހޭ ގާނޫނަށް ބަދަލުތަކެއް ގެންނަން މަސައްކަތް ކުރަމުންދާއިރު ގާނޫނު ހަދާ މަޖިލީހުގެ އިދިކޮޅު މެމްބަރުން ވިދާޅުވަމުން ގެންދަވަނީ ގާނުނު ހަދާ މަޖިލިސް ބޯއިކޮޓް ކުރާނެ ކަމަށެވެ. 

ނަހަމަ ކަންކަން ހިންގާފައި ވާތީ ކަމަށް ބުނެ ސުޕްރީމް ކޯޓުން އިންތިޚާބު ބާތިލުކުރި އިރު، ސުޕްރީމް ކޯޓުން ވަނީ 60 ދުވަހުގެ ތެރޭގައި އާ އިންތިޚާބެއް ބޭއްވުމަށް އަމުރުކޮށްފައެވެ. އެގޮތުން ކެންޔާގައި އަލުން ބާއްވާ އެގައުމުގެ ރިޔާސީ އިންތިޚާބު އޮކްޓޯބަރު 17 ވަނަ ދުވަހު ބާއްވަން އެގައުމުގެ އިލެކްޓޯރަލް ކޮމިޝަނުން ނިންމިއެވެ. ކެންޔާގެ އިލެކްޓޯރަލް ކޮމިޝަނުން ބުނެފައި ވަނީ އަލުން އިންތިޚާބު ބާއްވަނީ އެގައުމުގެ ސުޕްރީމް ކޯޓުގެ ނިންމުމަށް އަމަލުކުރުމުގެ ގޮތުން ކަމަށެވެ. މީގެ އިތުރުން އެ ކޮމިޝަނުން ބުނެފައި ވަނީ ވޯޓު ކަރުދާސްކޮޅުގައި އޮންނާނީ މިހާރުގެ ރައީސް އުހުރު ކެންޔައްޓާގެ ނަންފުޅާއި މައި އިދިކޮޅު ކެނޑިޑޭޓް ރައިލާ އޮޑިންގާގެ ނަންފުޅާއި، ދެ ކެނޑިޑޭޓުންގެ ރަނިންމޭޓުންގެ ނަންފުޅު ކަމަށެވެ. 

އެހެންނަމަވެސް ފަހުން އަޑުއިވިގެން ދިޔައީ ކެންޔާގައި އަލުން ބާއްވަން ތާވަލު ކުރި ރިޔާސީ އިންތިޚާބު އޮކްޓޯބަަރު 26 އަށް ފަސްކުރި ވާހަކައެވެ. ކެންޔާގެ އިލެކްޓޯރަލް ކޮމިޝަނުން ބުނާ ގޮތުން ރިޔާސީ އިންތިޚާބު އޮކްޓޯބަރު 26 އަށް ފަސްކުރީ ސުޕްރީމް ކޯޓުން އިންތިޚާބާ ގުޅޭ ގޮތުން ނެރުނު ރޫލިންގ އަށް އަމަލު ކުރުމަށް އިތުރަށް ވަގުތު ބޭނުން ވާތީއެވެ. 

އޯގަސްޓް މަހު ކެންޔާގައި ބޭއްވި ރިޔާސީ އިންތިޚާބު ކާމިޔާބު ކުރެއްވި ކަމަށް އެގައުމުގެ އިލެކްޝަން ކޮމިޝަނުން އިއުލާންކޮށްފައި ވަނީ މިހާރުގެ ރައީސް އުހުރު ކެންޔައްޓާ އެވެ. އިލެކްޝަން ކޮމިޝަނުން އިއުލާން ކޮށްފައިވާ ނަތީޖާގައި، އިދިކޮޅު ކެނޑިޑޭޓް އޮޑިންގާ އަށް ވުރެ އިތުރަށް، 1.4 މިލިއަން ވޯޓު ރައީސް އުހުރު ކެންޔައްޓާ އަށް ލިބިވަޑައިގެންފައިވެއެވެ.

ކެންޔާ ވެފައި ވަނީ އެފްރިކާ ގައުމުތަކުގެ ތެރެއިން ރިޔާސީ އިންތިޚާބެއް ބާތިލު ކުރި ފުރަތަމަ ގައުމަށް ކަމަށް ރިޕޯޓުތައް ބުނެއެވެ. އެފްރިކާ ބައްރުގައި ބާއްވާ ރިޔާސީ އިންތިޚާބުތަކުގައި އާންމު ގޮތެއްގައި މިފަދަ ބޮޑެޓި މައްސަލަތައް ޖެހެއެވެ. އަދި އެއިރެއްގައި ހުންނަ ވެރިއެއްގެ ކޮޅަށް މައްސަލަތައް ނިންމުން އެއީ އާއްމު ކަމެކެވެ. އެހެންކަމުން ކެންޔާގެ މި މައްސަލަ ވެސް ފަހު ވަގުތު ނިމިގެންދާނީ ކެންޔައްޓާ ކޮޅަށް ކަމަށް ބެލެވެއެވެ.