އެމެރިކާގައި އަންގާރަ ދުވަހު އެކަނިވެސް ކޮވިޑް-19 ޖެހިގެން 2،000 ވުރެ ގިނަ މީހުން މަރުވެފައިވާ ކަމަށް ތަފާސް ހިސާބުން ދައްކައިފި އެވެ.

އެމެރިކާގެ ކަމާބެހޭ ފަރާތްތަކުން ބުނެފައިވަނީ، އަންގާރަ ދުވަހަކީ، މިއަހަރުގެ މެއި މަހުގެ ފަހުން ކޮވިޑް ބަލީގައި އެއް ދުވަހެއްގައި މަރުވި މީހުންގެ އަދަދު 2،000 އިން މައްޗަށް އެރި ފުރަތަމަ ދުވަސް ކަމަށެވެ.

އެމެރިކާގެ އެކި ހިސާބުތަކުގައި ހުރި ހޮސްޕިޓަލްތައް ވެސް ބަލި މީހުންނާއިގެން މިހާރު ފުރި ބާރުވެފައިވާ ކަމަށް، ރިޕޯޓްތައް ބުނެއެވެ.

ކުރިއަށްއޮތީ އެމެރިކާގެ ޗުއްޓީ މޫސުންކަމުން، މީހުންތައް ތަންތަނަށް ދަތުރުކުރަން ފެށުމުން ބަލީގެ ހާލަތު އިންތިހާއަށް ގޯސްވެގެން ދާނެކަމަށް ސިއްހީ މާހިރުން ގެންދަނީ އިންޒާރު ކުރަމުންނެވެ.

ޖޯންސް ހޮޕްކިންސް ޔުނިވާސިޓީގެ ތަފާސް ހިސާބު ދައްކާ ގޮތުން އެމެރިކާއިން އެއްދުވަހުގެ ތެރޭ 2،000 ވުރެ ގިނަ މީހުން މީގެ ކުރިން މަރުވެފައިވަނީ މެއި މަހުގެ ތެރޭގައެވެ. މިހެންކަމުން އިތުރަށް މިބަލި އަނެއްކާވެސް އެމެރިކާގައި ފެތުރެން ފަށަައިފައިވާކަމަށް އެ ފަރާތުން ހާމަކުރެއެވެ.

ކޮވިޑް-19 ގެ ބަލީގައި އަންގާރަ ދުވަހު އެމެރިކާއިން 2،157 މީހުން މަރުވެފައި ވެއެވެ. އަންގާރަ ދުވަހު އެކަނިވެސް 170،000 މީހުން އަލަށް ޕޮޒިޓިވް ވެފައިވެ އެވެ. އަދި އިތުރު 87،000 މީހުން ހޮސްޕިޓަލްތަކުގައި އެޑްމިޓް ކޮށްފައިވެ އެވެ.

އެމެރިކާގެ 50 ސްޓޭޓްގެ ތެރެއިން 30 ސްޓޭޓުންވަނީ، ކޮވިޑާ ގުޅުންހުރި ބަލިތަކުގައި އެ ސްޓޭޓްތަކުން މިމަހުގެ ތެރޭގައި ރެކޯޑު އަދަދަކަށް މީހުން އެޑްމިޓް ކުރަންޖެހިފައިވާ ކަމަށް ބުނެފަ އެވެ.

ދުނިޔޭގައި ކޮވިޑްބަލީގެ ހާލަތު އެންމެ ގޯސްވެފައި ވަނީ ވެސް އެމެރިކާގަ އެވެ.