ވެކްސިން އެންމެ ފުރަތަމަ ލިބޭ ގައުމުތަކުގެ ތެރޭގައި ކެނެޑާ ނުހިމެނޭނެ: ބޮޑުވަޒީރު ޖަސްޓިން

ކޮވިޑް-19 އަށް އުފައްދާ ވެކްސިން އެންމެ ފުރަތަމަ ލިބޭ ގައުމުތަކުގެ ތެރޭގައި ކެނެޑާ ނުހިމެނޭނެ ކަމަށް އެގައުމުގެ ބޮޑުވަޒީރު ޖަސްޓިން ޓްރޫޑޯ ވިދާޅުވެއްޖެ އެވެ.

އަންގާރަ ދުވަހު ބޮޑުވަޒީރު ޖަސްޓިން ވަނީ ކެނެޑާ އަކީ އަމިއްލަ ވެކްސިން އުފެއްދުމުގެ މަސައްކަތްކުރާ ގައުމެއް ނޫން ކަމާއި ކެނެޑާއަށް ވެކްސިން ލިބޭނެ ކަމަށް ގަބޫލުކުރެވެނީ ވެކްސިން އުފައްދާ ގައުމުތަކުގެ ރައްޔިތުންނަށް ވެކްސިން ދެވެން ފެށުމަށްފަހު ކަމަށެވެ.

ކޮންމެ ކުންފުންޏަކުންވެސް އެންމެ ފުރަތަމަ ވެކްސިން ދޭން ބޭނުންވާނީ އެ ކުންފުންޏެއްގެ ގައުމުގެ ރައްޔިތުންނަށްކަން ގަބޫލުކުރެވޭ ކަމަށާއި، ވެކްސިންދޭން ފެށޭތާ ކުޑަ ދުވަސްކޮޅެއްގެ ތެރޭގައި ކެނެޑާއަށް ވެސް އަދި އެހެން ގައުމުތަކަށް ވެވިފައިވާ އެއްބަސްވުންތަކާއި އެއްގޮތަށް ވެކްސިން ފޯރުކޮށްދޭން ފެށޭނެކަމަށެވެ.

އެގޮތުން ކެނެޑާއިން ވެސް މިހާރު ގިނަ ކުންފުނިތަކަކާއި އެކު އެއްބަސްވުންތައް ވެފައިވާ ކަމަށް ބޮޑުވަޒީރު ފާހަގަކުރެއްވިއެވެ. ކެނެޑާއަށް ވެކްސިން ލިބޭނެ ކަމަށް އަންދާޒާ ކުރެވެނީ 2021 ވަނަ އަހަރުގެ ކުރީ ކޮޅުކަމަށް ބޮޑުވަޒީރު ވިދާޅުވިއެވެ.

ބޮޑުވަޒީރު އިތުރަށް ވިދާޅުވީ ކެނެޑާއިން ވަނީ މިހާރުވެސް ކުންފުނިތަކުން މިލިއަނެއްހާ ޑޯޒް ގަނެފައި ކަމަށާއި މިގޮތަށް ކުރިއާލައި ވެކްސިން ގަނެފައި ހުރުމުން ވެކްސިންތަކަށް ހުއްދަ ދެވުމާއިއެކު ފަސޭހައިން އަވަހަށް ކެނެޑާއަށް ވެކްސިން ލިބިގެންދާނެ ކަމަށެވެ.

ކެނެޑާގެ ބޮޑުވަޒީރު މިގޮތަށް ވާހަފުޅުދައްކަވާފައިވާ އިރު، އެގައުމުން ކޮވިޑް-19 އަށް ޕޮޒިޓިވްވި މީހުންގެ ޖުމްލަ އަދަދު ވަނީ މިހާރު 342,000 އަށް ވުރެ މައްޗަށް އަރާފަ އެވެ.