ޒިމްބާބްވޭގެ ރައީސްކަމުން އިސްތިއުފާދެއްވި ރޮބާޓް މުގާބޭ އިސްތިއުފާ ދެއްވުމަށް ފަހު ދެން އެގައުމަށް އަންނަ ސަރުކާރަކުން އިންސާނީ ހައްގުތަކަށް އިހްތިރާމް ކުރާ "ބާބެއް" ހުޅުވާލަން ޖެހޭނެ ކަމަށް އެމްނެސްޓީ އިންޓަނޭޝަނަލް ގެ ސެކްރެޓަރީ ޖެނެރަލް ސަލިލް ޝެޓީ ވިދާޅުވެއްޖެއެވެ.
ޒިމްބާބްވޭގޭ ރައީސް ކަމުން އަންގާރަ ދުވަހު ރޮބާޓް މުގާބޭ އިސްތިއުފާ ދެއްވުމާ ގުޅިގެން އެމްނެސްޓީ އިންޓަނޭޝަނަލްގެ ސެކްރެޓަރީ ޖެނެރަލް ސަލިލް ޝެޓީ ވިދާޅުވީ 30 އަހަރަށްވުރެ ގިނަ ދުވަސްވީ އަނިޔާވެރިވެރިކަމުން ގައުމު ސަލާމަތްވެފައިވާއިރު ދެން ގައުމަށް އޮތް ގޮތަކީ ގާނޫނީ ހުކޫމާތަށް އިހްތިރާމް ކުރާ ބަޔަކު ވެރިކަމަށް އައުން ކަމަށާއި ކުށްތައް ކޮށްފައިވާ ފަރާތްތައް ޒިންމާދާރުވެސް ކުރަން ޖެހޭނެ ކަމަށެވެ.
ޝެޓީ ވިދާޅުވީ މުގާބޭގެ 37 އަހަރުވީ ޒައާމަތުގައި އެތައްހާސް ބަޔަކަށް އަނިޔާ ދީފައިވާ ކަމަށާއި، ގަސްތުގައި ގެއްލުވާފައިވާ ކަމަށާއި އަދި މަރާލާފާވާ ކަމަށެވެ. މުގާބޭ އަކީ ޖިނާއީ ކުށްތަކަށް ހިތްވަރުދެއްވި ފަރާތެއް ކަމަށާއި ޒިމްބާބްވޭގެ ރައްޔިތުންނަށް ފެނިގެންދިޔަ ވެރިކަމަށްވުރެ ރަނގަޅު ވެރިކަމެއް ހައްގުކަމަށެވެ. ދެންއަންނަ ވެރިން ގާނޫނު އަސާސީ އަށް އަމަލު ކުރަން ޖެހޭނެ ކަމަށްވެސް ޝެޓީ ވިދާޅުވިއެވެ.
ޒިމްބާބްވޭގެ ރައީސް ރޮބަޓް މުގާބޭ އަންގާރަ ދުވަހު އިސްތިއުފާ ދެއްވީ އެ މަނިކުފާނު އަޒުލްކުރުމުގެ މަސައްކަތް ގާނޫނު ހަދާ މަޖިލީހުން ފަށާފައި ވަނިކޮށެވެ. މުގާބޭ އިސްތިއުފާ ދެއްވާފައިވަނީ، ޒިމްބާބްވޭގެ ވެރިކަމުގެ ބާރުތައް އެގައުމުގެ އަސްކަރިއްޔާ އިން ނެގުމަށްފަހު، އެގައުމުގެ ސިޔާސީ މަސްރަހަށް އައި ބަދަލުތަކަށްފަހުއެވެ.
