ޕޮޒިޓިވްވާ މީހަކާ ކޮންޓެކްޓް ވިޔަސް އެކަހެރިވާން ނުޖެހޭ ގޮތަށް އިނގިރޭސިވިލާތުން ނިންމަނީ

ކޮވިޑް-19 އަށް ޕޮޒިޓިވްވެފައިވާ މީހަކާ ޑައިރެކްޓް ކޮންޓެކްޓް ވީ ނަމަވެސް، އެކަހެރިވާން (ސެލްފް އައިސޮލޭޓްވާން) ނުޖެހޭ ގޮތަށް ނިންމުމަށް އިނގިރޭސިވިލާތު ސަރުކާރުން ނިންމައިފި އެވެ.

ރޮއިޓަރސްގައި ރިޕޯޓް ކޮށްފައިވާ ގޮތުން ހޯމަ ދުވަހުން ފެށިގެން އެގޮތަށް އަމަލު ކުރުމަށް ނިންމާފައިވާއިރު، ޑައިރެކްޓް ކޮންޓެކްޓުން އަމަލު ކުރަން ޖެހޭ ވަކި އުސޫލެއް ވަނީ ކަނޑައަޅާފައެވެ. އެގޮތުން ޕޮޒިޓިވްވެފައިވާ މީހަކާ ޑައިރެކްޓް ކޮންޓެކްޓް ވެއްޖެނަމަ، މެދުނުކެނޑި 7 ދުވަސް ވަންދެން ޓެސްޓްތަކެއް ހަދަން ޖެހެއެވެ. އަދި އެ މުއްދަތުގެ ތެރޭގައި އައިސޮލޭޓް ނުވެވެސް އުޅެވޭނެ ކަމަށް ރޮއިޓަރސްގައި ރިޕޯޓް ކޮށްފައިވެ އެވެ.

އޭގެ އިތުރުން، ޕައިލެޓް ޕްރޮގްރާމެއް ގޮތުގައި ހިންގާ މި މަރުޙަލާގެ ނަތީޖާތައް ކާމިޔާބުވެއްޖެނަމަ، އެ ޤައުމުގައި ލާޒިމު ކޮށްފައިވާ 14 ދުވަހުގެ ހޯމް ކަރަންޓީނުގެ މުއްދަތު އަންނަ އަހަރުގެ ޖެނުއަރީ މަހުން ފެށިގެން މުޅިން އުވާލެވޭނެ އެވެ.

އޭގެ އިތުރުން، ކޮވިޑް-19 ގެ ސަބަބުން އިނގިރޭސިވިލާތުގައި އިއުލާނު ކޮށްފައިވާ ލޮކްޑައުން ޑިސެމްބަރު މަހުގެ ދެ ވަނަ ދުވަހު އުވާލާނެ ކަމަށް އެގައުމުގެ ބޮޑުވަޒީރު ބޮރިސް ޖޯންސަންސް ވަނީ ވިދާޅުވެފައެވެ،

ބޮރިސްގެ އޮފީހުން މައުލޫމާތުދޭ ގޮތުން، ލޮކްޑައުން އުވާލުމަށްފަހު ސަރުކާރުން ދެން ފިޔަވަޅުތައް އަޅަމުން ގެންދާނީ ސަރަހައްދުތަކަށް ވަކިވަކިންނެވެ. އެގޮތުން ކޭސްތަކުގެ އަދަދު ގިނަ ސަރަހައްދުތަކުގައި ހަރުކަށި ފިޔަވަޅުތައް އަޅާއިރު، ކޭސްތައް މަދު ސަރަހައްދުތަކަށް ލުއި ދެވިގެންދާނެ އެވެ.

އިނގިރޭސިވިލާތުން މިހާތަނަށް 1،500،000 (އެއް މިލިއަން ފަސް ލައްކަ) އަށް ވުރެ ގިނަ މީހުން ވަނީ ކޮވިޑް-19 އަށް ޕޮޒިޓިވްވެފަ އެވެ.