ސިޔާސީ ހަމަނުޖެހުންތަކާއިއެކު ދެކުނު ކޮރެއާއިން ކޮވިޑަށް ޕޮޒިޓިވްވާ މީހުންގެ އަދަދުތައް މައްޗަށް!

ސިޔާސީ ހަމަނުޖެހުތައް ބޮޑުވެ، އެއްވެ އުޅޭ މީހުންގެ އަދަދު އިތުރުވުމާއިއެކު، ދެކުނު ކޮރެއާއިން ކޮވިޑް-19 އަށް ޕޮޒިޓިވްވާ މީހުންގެ އަދަދު އިތުރުވެއްޖެ އެވެ.

ކޮރެއާގެ ސެންޓަރ ފޯރ ޑިޒީޒް ކޮންޓްރޯލް އެންޑް ޕްރިވެންޝަން (ކޭސީޑީސީ) އިން ބުނީ ބުދަ ދުވަހުގެރެއާއި ހަމައަށް އިތުރު 288 ކޮވިޑްގެ ކޭސް ރިޕޯޓްކުރެވިފައިވާ ކަމަށާއި، ނަމަވެސް އެއީ އަންގާރަ ދުވަހަށްވުރެ މަދު އަދަދެއް ކަމަށެވެ.

ކޭސީޑީސީއިން މިހެން ބުނުމާއިއެކު ކޮރެއާގެ ވައިސް ހެލްތު މިނިސްޓަރު ކިމް ގެން ލިޕް ވިދާޅުވީ ދުވަހެއް ދުވަހަކަށް ކޮވިޑްގެ ކޭސް ފެންނަމުންދާ ވަރު އިތުރުވާނަމަ މިހާރު އެޅިފައިވާ ފިޔަވަޅުތައް ހަރުކަށި ކުރައްވާނެ ކަމަށާއި، ނޭޝަނަލް ޕެންޑަމިކަކަށް ކޮވިޑްވެފައިވާ ކަމަށެވެ.

ދެކުނު ކޮރެއާއަކީ ޗައިނާއަށްފަހު ކޮވިޑްގެ ކޭހެއް ރިޕޯޓުކުރި ފުރަތަމަ ގައުމެވެ. އެކަމަކު އެގައުމުން އެޅި ހަރުދަނާ ފިޔަވަޅުތަކާއިއެކު ކޮވިޑް ފެތުރެމުންއައިވަރު ކޮންޓްރޯލްވިނަމަވެސް އަލުން ކޮވިޑް ފެތުރެމުން އަންނަ ވަރު މިވަނީ އިތުރު ވެފައެވެ. އަދި ކޮވިޑް އިތުރަށް ފެތުރުމަށް ފުރުސަތު ނުދެއްވާނެ ކަމަށް ކިމް ގެން ލިޕް ވިދާޅުވިއެވެ.

ދެކުނު ކޮރެއާއިން މިހާތަނަށް 16،346 މީހަކު ކޮވިޑް-19 އަށް ޕޮޒިޓިވްވެފައިވާއިރު މި ބަލީގައި 307 މީހަކު ވަނީ އެގައުމުން މަރުވެފައެވެ.