އީރާނާ އެކު ހަދާފައިވާ ނިއުކްލިއަރ ޑީލުން އެމެރިކާ ބޭރު ވާނީތޯ ނުވަތަ ނޫންތޯ އަންގާރަ ދުވަހު ނިންމަވާ އިއުލާނު ކުރައްވާނެ ކަމަށް އެމެރިކާގެ ރައީސް ވިދާޅުވުމާ ގުޅިގެން، ކޮންމެ ގޮތަކަށް އެމެރިކާ އިން ނިންމިޔަސް އީރާނުން ކަންބޮޑު ނުވާނެ ކަމަށް އީރާނުގެ ރައީސް ވިދާޅުވެއްޖެއެވެ.
އީރާނުގެ ރައީސް ހަސަން ރޫހާނީ ވިދާޅުވީ، މިކަމުން ކޮންމެ ކަމެއް ކުރިމަތި ވިޔަސް ކުރިއަށް އޮތް ދުވަސް ތަކުގެ ތެރޭގައި އެކަމުން އީރާން އަރައިގަންނާނެ ކަމަށެވެ.
އެމެރިކާގެ ރައީސްގެ ވާހަކަފުޅަށް ރައްދު ދެއްވަމުން އަންގާރަ ދުވަހު ތެހެރާން ގައި ނޫސްވެރިންނާ ބައްދަލު ކުރައްވާ އީރާނުގެ ރައީސް ވިދާޅުވީ، އެމެރިކާ އިން ނިންމާ ގޮތަކުން ކުރިއަށް އޮތް ދެ މަސް ނޫނީ ތިން މަސް ދުވަހުގެ ތެރޭގައި ކޮންމެވެސް ދަތިތަކަކާ ކުރިމަތިލާން ޖެހުމަކީ އެކަށީގެންވާ ކަމެއް ކަމަށާއި އެހެން ނަމަވެސް އެކަމުގެ ހައްލު އީރާނުން ހޯދާނޭ ކަމަށެވެ.
ޖޮއިންޓް ކޮމްޕްރިހެންސިވް ޕްލޭން އޮފް އެކްޝަން (ޖޭސީޕީއޯއޭ) ގެ ނަން ދެވިފައިވާ ނިއުކްލިއަރ ޑީލުން އެމެރިކާ ވަކި ވުމުގެ ވާހަކަތައް ފެންމަތި ވެފައިވަނިކޮށް ރޫހާނީ ވިދާޅުވި ކަމަށް ވަނީ މި އެއްބަސްވުން އެމެރިކާ އާ ނުލާ އަދި މާ ބޮޑަށް ރަނގަޅު ވާނެ ކަމަށް ދެކެވަޑައިގަންނަވާ ކަމަށެވެ.
އެމެރިކާ އިން މި އެއްބަސްވުމުން ވަކި ވިޔަސް އީރާނުން ބުނެފައިވަނީ، އީރާނުން އެދޭ ގޮތައް ކަންކަން ވާނަމަ، ޔޫރަޕް އާއި ރަޝިޔާ އާއި ޗައިނާ އާ އެކު މި އެއްބަސްވުމާ އެއްގޮތައް ކުރިޔަށް ދާން ބޭނުންވާ ކަމަށެވެ.
މި އެއްބަސްވުމުން އެމެރިކާ ވަކިވުމުގެ ވާހަކަފުޅުތައް އެމެރިކާގެ ރައީސް ދައްކަވަމުން ގެންދަވާތީ، އެކަން ހުއްޓުވޭތޯ ޔޫރަޕުގެ ގައުމުތަކުން ގެންދަނީ މަސައްކަތް ކުރަމުންނެވެ. އަދި އެމެރިކާ އިން ވަކިވިޔަސް އެއްބަސްވުމާ އެކު ކުރިއަށް ދާން ބޭނުންވާ ކަމަށް ޔޫފަޕްގެ ގައުމުތަކުން ވަނީ ބުނެފައެވެ.
