ކޮވިޑް މެނޭޖްކުރެވުނީ ތަމްރީނުވެފައި ތިބި ސިއްހީ ހިދުމަތްތެރިން ތިބުމުން: ޑރ. އިބްރާހިމް ހަސަން

ރާއްޖޭގައި ކޮވިޑް-19 ގެ ހާލަތު މެނޭޖް ކުރެވުނީ ތަމްރީނުވެފައި ތިބި ސިއްހީ ހިދުމަތްތެރިން ތިބުމުން ކަމަށް ވިދާޅުވެ, ހަޔަރ އެޑިއުކޭޝަން މިނިސްޓަރު ޑރ. އިބްރާހިމް ހަސަން (ޗަބީ) ސިއްހީ ހިދުމަތްތެރިންނަށް ތައުރީފް ކުރައްވައިފިއެވެ.

ރާއްޖެޓީވީގެ ''ފަލަސުރުހީ'' ޕްރޮގްރާމް ގައި ޑރ. އިބްރާހިމް ހަސަން ވިދާޅުވީ، މީހުން ބިނާކުރަން ރައީސް އިބްރާހިމް މުހައްމަދު ސޯލިހުގެ ސަރުކާރުންދޭވަރު އަހަންމިއްޔަތެއް އެހެން އެއްވެސް ސަރުކާރުން ނުދޭ ކަމަށާއި، ކޮވިޑް-19 ގެ ހާލަތާއި ގުޅިގެން މީހުން ބިނާކުރުމަށް ސަރުކާރުން ދޭ މުހިއްމުކަން ހާމަވެފައިވާ ކަމަށެވެ.

Advertisement

އެހެން ވިދާޅުވެ މިނިސްޓަރު ވަނީ ރައީސް ސޯލިހު އަށް ވަރަށް ބޮޑަށް ތައުރީފް ކުރައްވާފައެވެ.

މީހުން ބިނާކުރަން ރައީސް އަހައްމިއްޔަތުކަން ދެއްވާ ވާހަކަ އަށް މިނިސްޓަރު ބާރުދެއްވީ، ކޮވިޑާ ގުޅިގެންވެސް ސަރުކާރުން ދެމުންދާ ލޯނުގެ އެހީތަކާއި، ސްކޯލާޝިޕްތައް މެދުކެނޑުމެއް ނެތި ކުރިޔަށް ގެންދިޔުމެވެ.

ޑރ. އިބްރާހިމް ހަސަން ވިދާޅުވާ ގޮތުގައި، ރައީސްގެ އެ ނިންމެވުމުގެ މައިގަނޑު ސަބަބަކީ، ކޮވިޑުގެ ހާލަތުން އަަރައިގަތުމުގައި މަސައްކަތް ކުރުމުގައި ހަރަކާތްތެރިވި ފަރާތްތަކަކީ ސިއްހީ ދާއިރާއިން ތަމްރީނު ލިބިފައިވާ ފަރާތްތަކަށް ވާތީއެވެ. އެހެންކަމުން މީހުން ބިނާކުރުމުގައި ކޮންމެ ހާލަތެއްގައިވެސް މުހިއްމު ކަމެއްކަން މިނިސްޓަރު ފާހަގަކުރެއްވިއެވެ.

އެއަށް ބާރު ދެއްވަމުން ޑރ. އިބްރާހިމް ހަސަން ވިދާޅުވީ، އެންމެ މަތީ ވަނަ ހޯދާ ދަރިވަރަކަށް ރައީސް ދެއްވާ ހާއްސަ ސްކޯލާޝިޕް އާއި ހައި އެޗީވާސް ސްކޯލަޝިޕްގެ އިތުރުން މި އަހަރު ކުރީކޮޅު ލޯނުގެ ފުރުސަތު ކުރިޔަށް ގެންދާވާނެ ކަމަށް ރައީސް ނިންމެވި ނިންމުން ކަމަށެވެ. އެއީ މީހުން ބިނާކުރުމަށް އާދަޔާ ހިލާފު ފޯރިއެއް ލިބިގެން ދިޔަ ކަމެއް ކަމަށެވެ.

ކޮވިޑް-19 ގެ ސަބަބުން ހަޔާ އެޑިއުކޭޝަން މިނިސްޓްރީގެ މުވައްޒަފުން ގޭގައި މަސައްކަތްކުރަން ޖެހުމާއި ގުޅިގެން ބޮޑެތި ގޮންޖެހުންތަކެއްް ދިމާވި ކަމަށް މިނިސްޓަރު ވިދާޅުވިއެވެ.

އެގޮތުން ރާއްޖޭގެ އިތުރުން ރާއްޖެއިން ބޭރުގެ އެކި ތަންތަނުގައި ތިބި ދަރިވަރުންނަށް އެހީތެރިކަން ފޯރުކޮށް ދިނުމުގެ މަސައްކަތް ކުރިޔަށް ދިޔަ ކަމަށާއި، ކޮވިޑުގެ ހާލަތާ ގުޅިގެން ދިމާވި އިގްތިސާދީ ގޮންޖެހުންތަކާއި ގުޅިގެން ކިޔަވަން ތިބި ދަރިވަރުންނަށް ކުއްލިއަކަށް ދިމާވި ދަތިތަކުން އަރައިގަތުމަށް މާލީ އެހިތެރިކަން ފޯރުކޮށް ދިނުން ކަމަށް ޑރ. އިބްރާހިމް ހަސަން ވިދާޅުވިއެވެ. އެގޮތުން 220 ދަރިވަރަކަށް ދެ މަސް ދުވަހަށް 3.3 މިލިއަން ރުފިޔާ ސަރުކާރުން ހަރަދު ކޮށްފައިވާކަން ފާހަގަކުރެއްވިއެވެ.