ގޯލްޑަން ބޯއި އެވޯޑް ހާލަންޑަށް

އިޓަލީގެ ކުޅިވަރު ނޫސް "ތުއްތޮސްޕޯޓް" އިން ހޮވާ ޔޫރަޕިއަން ގޯލްޑަން ބޯއި އެވޯޑް ބޮރޫޝިއާ ޑޯޓްމުންޑަށް ކުޅެމުން އަންނަ ނޯވޭގެ ޒުވާން ތަރި އާލިން ހާލަންޑް ހޯދައިފިއެވެ.

ޔޫރަޕުގެ 21 އަހަރުން ދަށުގެ އެންމެ މޮޅު ފުޓްބޯޅަ ކުޅުންތެރިއާއަށް ދޭ މި އެވޯޑް ހާލަންޑް ހޯދީ ބާސެލޯނާއަށް ކުޅެމުން އަންނަ ސްޕެއިނުގެ ޒުވާން ތަރި އަންސޫ ފަޓީ އާއި، ޑޯޓްމުންޑަށް ކުޅެމުން އަންނަ އިންގްލެންޑުގެ ފޯވާޑް ޖޭޑަން ސަންޗޯ އާއި، ބަޔާން މިއުނިކަށް ކުޅެމުން އަންނަ ކެނެޑާގެ ޒުވާން ޑިފެންޑަރު އަލްފަންސޯ ޑޭވިސްގެ އިތުރުން މެންޗަސްޓާ ޔުނައިޓެޑުގެ އިންގްލެންޑުގެ ފޯވާޑް މޭސަން ގްރީންވުޑާ ވާދަކޮށް ކުރިހޯދައިގެންނެވެ. މި އެވޯޑް ލިބޭ ކުޅުންތެރިއާ ހޮވަނީ 30 ނޫސްވެރިންގެ ޕެނަލަކުންނެވެ.

މި އެވޯޑް ހޯދި އުމުރުން 20 އަހަރުގެ ހާލަންޑް އަންނަނީ މިދިޔަ ޖެނުއަރީ މަހު ސާލްޒްބާގުން ޑޯޓްމުންޑަށް ބަދަލުވެ ތަފާތު މޮޅު ކުޅުމެއް ދައްކަމުންނެވެ. އެގޮތުން މިދިޔަ ސީޒަނުގައި އޭނާ ވަނީ ސާލްޒްބާގާއި ޑޯޓްމުންޑަށް ކުޅެދިން 40 މެޗުގައި 44 ލަނޑު ޖަހާފައެވެ. އަދި މިދިޔަ ސީޒަނުގެ ޔުއެފާ ޗެމްޕިއަންސް ލީގުގައި އޭނާ ވަނީ ކުޅުނު އަށް މެޗުގައި 10 ލަނޑު ޖަހާފައެވެ.

މި ސީޒަނުގައި މިހާތަނަށްވެސް ހާލަންޑް މޮޅު ކުޅުމެއް ދައްކާފައިވާއިރު، އޭނާ ވަނީ މިހާތަނަށް ކުޅުނު 11 މެޗުގައި 11 ލަނޑު ޖަހާފައެވެ.