''އަމާޒަކީ ކޮންމެ ކުއްޖަކީ ވެސް ރައްކާތެރި މާހައުލެއްގައި ބޮޑުވާ ކުއްޖެއްކަން ކަށަވަރުކުރުން''
20 ނޮވެމްބަރު 2020 | ހުކުރު 14:42އެ އަމާޒު ކާމިޔާބުކުރެވޭނީ ދައުލަތުގެ ހުރިހާ އިދާރާއަކާއި، މުޖުތަމައުގެ ހުރިހާ ފަރުދުންގެ އެހީތެރިކަމާ އެކުގައި
ނައިބް ރައީސް ފައިސަލް ނަސީމް ހޮސްޕިޓަލަށް ކުރެއްވި ޒިޔާރަތެއްގެ ތެރެއިން
ސަރުކާރުގެ އަމާޒަކީ ކޮންމެ ކުއްޖަކަށް ވެސް ރައްކާތެރި މާހައުލެއް ކަށަވަރުކޮށްދީ، އަމިއްލަޔަށް އިސްނަގައިގެން ދިރިއުޅެވޭނެ ފަދަ އުޖާލާ މުސްތަގުބަލެއް ހޯދައިދިނުން ކަމުގައި ނައިބު ރައީސް ނަސީމް ވިދާޅުވެއްޖެ އެވެ.
އެ އަމާޒު ކާމިޔާބުކުރެވޭނީ ދައުލަތުގެ ހުރިހާ އިދާރާއަކާއި، މުޖުތަމައުގެ ހުރިހާ ފަރުދުންގެ އެހީތެރިކަމާ އެކުގައި ކަމަށް ވިދާޅުވެ ނައިބް ރައީސް ވާހަކަފުޅު ދައްކަވާފައި މިވަނީ ހުކުރު ދުވަހު ފާހަގަކުރަމުންދާ ދުނިޔޭގެ ކުޑަކުދިންގެ ދުވަހުގެ މުނާސަބަތުގައި ދެއްވި ވީޑިއޯ މެސެޖެއްގަ އެވެ.
ނައިބު ރައީސްގެ މެސެޖުގައި، ރައީސް ސޯލިހު، ކުޑަކުދިންގެ ހައްގުތައް ރައްކާތެރިކުރުމުގެ ގާނޫނާއި، ކުޑަކުދިންގެ އަދުލުގެ ގާނޫނު ތަސްދީގުކުރެއްވީ ކުޑަކުދިންނަކީ އަމިއްލަ ހައްގުތަކުގެ ދިފާއުގައި ނުވަތަ އަމިއްލަ ނަފްސުގެ ރައްކާތެރިކަން ހޯދުމަށް ބަސްބުނެވޭ ފަދަ މަގާމެއްގައި ތިބި ބައެއް ނޫން ކަމުގައި ވާތީ، ކުޑަކުދިންނަށް އެ ހައްގުތައް ކަށަވަރު ކޮށްދިނުމުގެ މަގު ކޮށައިދިނުމުގެ ގޮތުންކަމުގައި އެމަނިކުފާނު ވިދާޅުވި އެވެ.
އަދި، ސަރުކާރުންނާއި ދައުލަތުގެ ބާރުތަކުން އިސްނަގައިގެން އެ ކުދިންގެ ހައްގުތަކުގެ ދިފާއުގައި ބަސްބުނެ، އެ ކުދިންގެ އަބުރަށާއި ކަރާމާތައް އުނިކަމެއް އައުން ނުވަތަ އެ ކުދިންގެ ދުޅަހެޔޮ ކަމަށް ގެއްލުމެއް ވެދާނެ ކަމަށް ހުޝިޔާރުވެ ސަމާލުވާން ޖެހޭ ކަމަށް ރައީސަށް ފެނިވަޑައިގަންނަވާތީ ކަމަށް ވިދާޅުވި އެވެ.
އަދި، އެ ގާނޫނުތައް ވުޖޫދަށް އައުމަށްފަހު ކުޑަކުދިންގެ ހައްގުތައް ރައްކާތެރިކުރުމަށް ރާއްޖޭގައި ކުރެވޭ މަސައްކަތްތަކަށް ހަރުދަނާ އޮނިގަނޑެއް ލިބިފައިކަމަށާއި، އެ ގާނޫނުތަކުގައި ބަޔާންކޮށްފައިވާ މައިގަނޑު މަސްދަރުތަކާއި، އަސާސުތަށް ވަނީ ކުޑަކުދިންގެ ދުޅަހެޔޮކަމާއި އެ ކުދިންގެ ހައްގުތައް ރައްކާތެރިކުރެވޭނެކަން ކަށަވަރުކޮށްދީފައި ކަމުގައި ވެސް ނައިބު ރައީސް ހާމަކުރެއްވިއެވެ.
ކުޑަކުދިންގެ ހައްގުތައް ރައްކާތެރިކުރުމުގެ ގާނޫނަށް އަލިއަޅުއްވާލައްވަމުން ނައިބު ރައީސް ވަނީ ރާއްޖޭގެ ކުޑަކުދިންގެ ހައްގުތައް ރައްކާތެރިކުރުމުގެ ގާނޫނަކީ އ.ދ.ގެ ކޮންވެންޝަން އޮން ދި ރައިޓްސް އޮފް ދަ ޗައިލްޑްގައި ބަޔާންކޮށްފައިވާ އުސޫލުތަކާއި މިންގަނޑުތަކާ އެއް ގޮތަށް އެކުލަވާލާފައިވާ ގާނޫނެއްކަން ފާހަގަކުރައްވާފަ އެވެ.
އަދި ދައުލަތުގެ އިދާރާތަކުން އެ ގާނޫނަށް އަމަލުކުރާ މިންވަރު ދެނެގަނެ، އެ ހައްގުތައް ކަށަވަރުކޮށްދިނުމަށް ބާރުއެޅުމުގެ ގޮތުން ޗައިލްޑް ރައިޓްސް އޮމްބަޑްސްޕަރސަންއެއްގެ އޮފީސް ވުޖޫދަށް ގެނެސް، އެ އޮފީހުން ސަރުކާރު ޒިންމާދާރުކުރުވައި، ގައުމީ ނިޒާމުގެ ތެރެއިން ކުޑަކުދިންގެ ހައްގުތައް ރައްކާތެރިކުރެވޭނެކަން ކަށަވަރުކުރުމަށް ލާޒިމްކޮށްފައިވާ ކަމުގައި ވެސް އެ މަނިކުފާނު ވިދާޅުވި އެވެ.
ނައިބު ރައީސް ވިދާޅުވި ގޮތުގައި، ކުޑަކުދިންގެ ހައްގުތައް ރައްކާތެރިކުރުމުގެ ދާއިރާއިން މިއަދުވެސް ކުރަން ހުރި މަސައްކަތްތައް ވަރަށް ގިނައެވެ. އަދި، މި އަސާސުތައް ކަރުދާހަށް ތިރިކުރުމާއި މި އަސާސުތައް ހަގީގަތުގައި ތަންފީޒުކުރުމަކީ ތަފާތު ދެ ކަމެއްކަމުގައި އެމަނިކުފާނު ވިދާޅުވި އެވެ.
އަދި، ފަހުގެ ތާރީޚަށް ބެލިކަމުގައިވިޔަސް ވަރަށް ގިނައިން ނޫސްތަކުގެ ސުރުހީތަކުން ކުޑަކުދިންގެ ހައްގުތައް ނިގުޅައިގަނެ އެ ކުދިންގެ ކަރާމާތައް އަރައިގަތުމާގުޅޭ ހިތާމަވެރި ހާދިސާތަކުގެ ވާހަކަ އިވެމުންދާކަމަށް ވިދާޅުވެ، މިއީ ކުރިމަތިލާން ޖެހިފައިވާ ހަޑިމުޑުދާރު ހަގީގަތެއްކަމުގައި އެމަނިކުފާނު ފާހަގަކުރެއްވި އެވެ.
