މި ބަޖެޓަކީ އުފާ ފާގަތިކަން ގެނެސްދޭނެ ބަޖެޓެއް: ޝަރީފު
އިގްތިސޯދެއް ނަގާ ކޮޅަށް ޖެހޭނީ ބޮޑު ބަޖެޓެއް އެކުލަވައިލައިގެން
މަރަދޫ ދާއިރާގެ މެންބަރު އިބްރާހިިމް ޝަރީފް
ދައުލަތުން ހުށަހަޅާފައިވާ 2021 ވަނަ އަހަރުގެ ބަޖެޓަކީ ރައްޔިތުންނަށް އުފާ ފާގަތިކަން ގެނެސްދޭނެ ބަޖެޓެއްކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އިބްރާހިމް ޝަރީފް (މަވޯޓާ) ވިދާޅުވެއްޖެ އެވެ.
ރާއްޖެޓީވީގެ "ބަޖެޓް 2021" ޕްރޮގްރާމުގައި ވާހަކަ ދައްކަމުން ޝަރީފް ވިދާޅުވީ ބަޖެޓު ބޮޑުވުމުގެ ސަބަބުން ރައްޔިތުންގެ ކަންބޮޑުވުން އެބަހުރިކަމަށާއި ނަމަވެސް އިގްތިސޯދެއް ނަގާ ކޮޅަށް ޖެހޭނީ ބޮޑު ބަޖެޓެއް އެކުލަވައިލައިގެން ކަމަށެވެ. ފާއިތުވި އަހަރު ތަކުގައި ވެރިކަން ކުރި ރައީސުން ވެސް މަސައްކަތް ކޮށްފައިވަނީ އެގޮތަށް ކަމާށެވެ.
ބަޖެޓުގެ ސަބަބުން ދަރަނި ބޮޑުވެގެންދާނެ ކަމަށާއި ނަމަވެސް ދަރަންޔެއް ނުނަގާ މަޝްރޫއުތަށް ކުރިއަށް ނުގެންދެވޭނެ ކަމަށް ވިދާޅުވިއެވެ. އެގޮތުން 2022 ވަނަ އަހަރުގައި މި ބަޖެޓުން އެތަކެއް މަޝްރޫއެއް ހިންގޭނެ ކަމަށެވެ.
އަންނަ އަހަރަށް ލަފާކޮށް މަޖިލީހަށް ހުށައަޅާފައި ވަނީ 34.7 ބިލިއަން ރުފިޔާގެ ބަޖެޓެކެވެ. އަންނަ އަހަރު ޕީއެސްއައިޕީއަށް ހުށައަޅާފައިވާ އަދަދަކީ 8306.2 މިލިއަން ރުފިޔާއެވެ. މިއީ މި ހިނގާ 2020 ވަނަ އަހަރާ އަޅާބާލާއިރު 49.3 އިންސައްތަ އިތުުރު އަދަދެކެވެ.
އަންނަ އަހަރަށް ލަފާ ކުރާ ދައުލަތުގެ ބަޖެޓަށް ބަހުސް ކުރެވެމުން އަންނައިރު 2021 ގައި ދައުލަތުގެ އާމްދަނީގެ 53 އިންސައްތަ ހޭދަ ކުރަން ޖެހޭނީ ދަރަނިދެއްކުމަށެވެ. މިކަން ފާހަގަ ކުރައްވާ ޝަރީފް ވިދާޅުވީ ޒިންމާދާރު ދައުލަތެއްގެ އުސޫލަކީ ކިތަންމެ ކުޑަ ނަމަވެސް ނުވަތަ ބޮޑު ދަރަންޏެއް ނަމަވެސް އެދަރަނި ދެއްކުން ކަމަށެވެ.
