ރައީސް ސޯލިހުގެ ދިފާއުގައި އެ މަނިކުފާނުގެ އެންމެ ގާތް އެކުވެރިޔާ!

ކޮވިޑް-19 ގެ ހާލަތުގައި ރައީސް އިބްރާހިމް މުހައްމަދު ސޯލިހުގެ ހިކުމަތްތެރިކަން ފެނިވަޑައިގެންފައިވާ ކަމަށް ވިދާޅުވެ އެ މަނިކުފާނުގެ އެންމެ ގާތް އެކުވެރިޔާ އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ރައީސަށް ތައުރީފް ކުރައްވައިފިއެވެ.

އަންގާރަ ދުވަހު އެމްޑީޕީ ހަރުގޭގައި ވާހަކަދައްކަވަމުން ރައީސް ނަޝީދު ވަނީ ކޮވިޑާއި ގުޅިގެން ރައީސް ސޯލިިހުގެ ސަރުކާރުން ގެންގުޅުއްވާފައިވާ ސިޔާސަތުތަކަށް ވަރަށް ބޮޑަށް ތައުރީފް ކުރައްވާފައެވެ.

Advertisement

އެގޮތުން ކޮވިޑާއި ގުޅިގެން މުޅި ދުނިޔޭގެ އިގްތިސާދާއި އެކު ރާއްޖޭގެ އިގްތިސާދުވެސް ހުއްޓިގެން ދިޔައިރު މިއީ މީގެކުރިން އެއްވެސް ބަޔަކަށް ތަޖުރިބާ ކުރެވިފައިވާ ކަމެއް ނޫން ކަމަށް އެ މަނިކުފާނު ވިދާޅުވިއެވެ. އަދި ރާއްޖޭގެ ފަތުރުވެރިކަން ހުއްޓި، ވިޔަފާރިތައް ހުއްޓާލަން ޖެހުނުއިރު އެ ފަދަ ހިތާމަވެރި ދުވަސްތަކެއް ރާއްޖޭގެ އެއްވެސް ވެރިއަކަށް ކުރިމަތި ނުވާ ކަމަށް ރައީސް ނަޝީދު ވިދާޅުވިއެވެ.

ކޮވިޑުގެ ކޮމިއުނިޓީ ސްޕްރެޑް މާލެ ސިޓީން ފެނުނު ދުވަހު ގައުމާ މުހާތަބު ކުރައްވާ ރައީސް ކީރިތި ކުރެއްވުމުން އެކަމާ ގުޅިގެން ބައެއް ފަރާތްތަކުގެ މަލާމާތް ރައްދުވިކަން ފާހަގަކުރައްވާ ރައީސް ނަޝީދު ވަނީ އެ މަނިކުފާނުގެ އެންމެ ޒަމާންވީ ގާތް އެކުވެރިޔާ ދިފާއުކުރައްވާފައެވެ.

މި ޕެންޑެމިކްގައި ސަރުކާރު މުވައްޒަފެއްގެ މުސާރައިން އެންމެ ލޯލާރިއެއް ވެސް އުނިކޮށްފައި ނުވާނެ ކަމަށާއި ވަޒީފާ ނެތް މީހުންނަށް ދެވެން އޮތް މިންވަރަކަށް އެހީ ފޯރުކޮށްދެމުން ދާކަން ފާހަގަކުރައްވާ ރައީސް ނަޝީދު ވިދާޅުވީ އިގްތިސާދު އަލުން ހުޅުވާލުމަށް ސަރުކާރުން ގިނަ މަސައްކަތްތަކެއް ކުރި ކަމަށެވެ. އަދި ކޮވިޑާއި ގުޅޭ ހުރިހާ ކަންކަމެއް ރައީސް ސޯލިހުގެ ބެއްލެވުމުގެ ދަށުން ކުރިއަށް ގެންދެވިއިރު އެއީ އެއްވެސް ރައްޔިތެއްގެ ހިތުން ފިލައިގެން ނުދާނެ ކަމެއް ކަމަށް ވިދާޅުވިއެވެ.

ދުނިޔޭގެ އެހެން ގައުމުތަކުގެ ހާލަތުގެ ވާހަކަ ދައްކަވަމުން ރައީސް ނަޝީދު ވަނީ އެހެން ގައުމުތަކާއި ހިލާފަށް ރާއްޖޭގެ އިގްތިސާދީ ހާލަތު ރަނގަޅުވަމުން އަންނަނީ މި ސަރުކާރުގެ ހިކުމަތްތެރި ސިޔާސަތުތަކުގެ ސަބަބުން ކަން ފާހަގަކުރައްވާފައެވެ.