އެތައް މަހަކަށް ފަހު އިންޑިއާގައި ކޮވިޑް ޖެހޭ މީހުންގެ އަދަދުތައް 30،000 އިން ދަށަށް

މި އަހަރުގެ ޖުލައި މަހުގެ 11 ވަނަ ދުވަހަށް ފަހު، ފުރަތަމަ ފަހަރަށް އިންޑިއާއިން ދުވާލެއްގެ މައްޗަށް ރިޕޯޓްކުރި ކޮވިޑް ކޭސްތަކުގެ އަދަދު 30،000 އިން ދަށަށް ގޮސްފިއެވެ.

1.3 ބިލިއަން މީހުންގެ އާބާދީއެއް އޮންނަ އިންޑިޔާގައި ހޯމަ ދުވަހު ޕޮޒިޓިވްވެފައިވަނީ 28،555 މީހުންނެވެ. މި އަދަދާ އެކު އިންޑިޔާއިން ކޮވިޑަށް ޕޮޒިޓިވްވި މީހުންގެ ޖުމްލަ އަދަދު ވަނީ 8.8 މިލިއަންއަށް އަރާފައެވެ.

އިންޑިޔާއަކީ ފާއިތުވި ދެމަހެއްހާ ދުވަސް ތެރޭގައި އެންމެ ހަލުވި ކަމާއެކު ކޮވިޑް-19 ފެތުރެމުން ދިޔަ ގައުމެވެ. ނަމަވެސް ނޮވެމްބަރ މަސް ފެށުނު ފަހުން ކޮވިޑް ފެތުރޭ މިންވަރު ކޮންމެވެސް ވަރަކަށް މަަޑުޖެހި، ރިޕޯޓްކުރާ ކޭސްތަކުގެ އަދަދުތައް ވަނީ ދަށަށް ދާން ފަށާފައެވެ.

އޭގެ އިތުރުން އިންޑިއާގައި މި ބަލި ޖެހިގެން މަރުވާ މީހުންގެ އަދަދުތައް ވެސް ވަނީ ދަށަށް ދާން ފަށާފައެވެ. އެގޮތުން މި އަދަދުތައް ހާހުން މަތީގައި އުޅުމަށް ފަހު މިހާރު ރިޕޯޓްކުރާ އަދަދުތައް ވަނީ އެވަރެޖްކޮށް 500 އަށް ތިރިވެފައެވެ.

ކޮވިޑްގެ ކޭސްތައް ދަށަށް ދާން ފެށި ނަމަވެސް ސިއްހީ މާހިރުންދޭ އިރުޝާދުތަކަށް ލުއިތައްދޭން ފަށައިފިނަމަ ޔޫރަޕުގެ ގައުމުތަކަށް ދިމާވި ފަދައިން އަނެއްކާވެސް ކޮވިޑްގެ އިތުރު ރާޅެއް އައުން އެކަށީގެން ވާކަމަށް ގިނަ ތަޖުރިބާކާރުން ދެކެއެވެ.