އޮފީސްތަކުގައި އާންމުހާލަތުގައި ކުރިގޮތަށް މަސައްކަތް ކުރުމަކީ ނުރައްކަލެއް!
16 ނޮވެމްބަރު 2020 | ހޯމަ 02:42ހަމައެކަނި އޮފީހަށް އަންނަ ގަޑީގައި ޓެމްޕަރޭޗަރ ބަލައިލުމަކުން ނުފުދޭކަމަށް ވިދާޅުވި
އޮފީސް މާހައުލުގައި މާސްކު އެޅުމަށާއި، ގައިދުރުކަން ބެހެއްޓުމަށް އެޗްޕީއޭއިން ވަނީ އިލްތިމާސްކޮށްފައި
އޮފީސްތަކުގައި އާންމު ހާލަތާއި އެއްގޮތަށް މި ދުވަސްވަރު މަސައްކަތް ކުރުމަކީ ނުރައްކާތެރި ކަމެއް ކަމަށް ހެލްތް އިމަރޖެންސީ އޮޕަރޭޝަން ސެންޓަރ (އެޗްއީއޯސީ) އިން ބުނެފިއެވެ.
އާދިއްތަ ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވީ ރާއްޖެއިން ކޮވިޑް ފިލައިގެން ދިޔައީ ކަމަށް ދެކި އޮފީސްތަކުގައި މަސައްކަތްކުރާ ފަރާތްތަކުން އާންމު ހާލަތުގައި މަސައްކަތް ކުރަމުންދިޔަ ގޮތަށް މަސައްކަތްކުރުމަކީ މި ވަގުތު ވަރަށް ނުރައްކާތެރި ކަމެއް ކަމަށެވެ.
ނަޒްލާ ވިދާޅުވީ ހަމައެކަނި އޮފީހަށް އަންނަ ގަޑީގައި ޓެމްޕަރޭޗަރ ބަލައިލުމުން ކޮވިޑުން ރައްކާތެރި ވެވުނީ ކަމަށް ހީކުރުމަކީ ވަރަށް ބޮޑު ގެއްލުމެއް ލިބިގެންދާނެ ކަމެއް ކަމަށާއި ކަނޑައަޅާފައިވާ ގައިޑްލައިންތަކާއި އެއްގޮތަށް ކަންކަން ކުރިއަށް ގެންދިއުމަކީ މުހިއްމު ކަމެއް ކަމަށެވެ. ޚާއްސަކޮށް ގިނަ މުވައްޒަފުން ގެންގުޅޭ ތަންތަނުން ގައިޑްލައިންތައް އިމްޕްލިމެންޓް ކުރުމަށް ހާއްސަ ސަމާލުކަމެއް ދޭން ޖެހޭ ކަން ފާހަގަކުރެއްވިއެވެ.
ގައިޑްލައިންގައި ބުނެފައިވާ ގޮތަށް ޝިފްޓްތަކަށް ބަހާލައިގެން މަސައްކަތްކުރާ ތަންތަނުގައި، އެއް ޝިފްޓް އަނެއް ޝިފްޓާއި ދިމާނުވާގޮތަށް ކަންތައްތައް ރޭވުމާއި އެ ޝިފްޓެއްގައި ތިބޭ ބަޔަކު ހަމަ އެ ހަފްތާގައި ވެސް އެއްކޮށް މަސައްކަތްކުރާ ގޮތަށް ހެދުމަކީ މުހިއްމު ކަމެއް ކަމަށް ނަޒްލާ ވިދާޅުވިއެވެ.
މީގެ އިތުރުން މާސްކު އެޅުމާއި، މާސްކު ނާޅާ ތިބޭ ވަގުތުތަކުގައި ގައިދުރުކަން ބެހެއްޓުމާއި، މާސްކް އަޅައިގެން ތިބި ނަމަވެސް، ގައިދުރުކަން ބެހެއްޓޭނެ ގޮތަށް މަސައްކަތުގެ މާހައުލުގައި ކަންކަން ރޭވިފައި ހުންނަން ޖެހޭނެ ކަމަށް ވިދާޅުވިއެވެ. އަދި ގައިޑްލައިނާއި އެއްގޮތަށް އަމަލު ނުކުރެވޭނަމަ އެންމެ މީހަކަށް ނުވަތަ ދެ މީހަކަށް ކޮމިއުނިޓީ ތެރެއިން ބަލި ޖެހުނުކަމުގައި ވިޔަސް އޮފީސް ތެރޭގައި ބަލި ފެތުރުމުގެ ފުރުސަތު ބޮޑުވެގެންދާނެ ކަމަށެވެ.
ޑރ. ނަޒްލާ އިތުރަށް ވިދާޅުވީ އޮފީސްތަކުގައި މަސައްކަތުގެ މާހައުލުގައި އެޗްޕީއޭގެ ގައިޑްލައިންތަކާއި އެއްގޮތަށް އަމަލުކުރުމުންދޭތޯ ބެލުމަށް މިހާރުވެސް އިންސްޕެކްޝަންތައް ކުރިއަށްދާ ކަމަށެވެ. އެގޮތުން މިހާތަނަށް ސަރުކާރުގެ 133 އޮފީހާއި، 42 ޕްރައިވެޓް އޮފީސް، (ބައެއް މީޑިއާތަކާއި ބޭންކްތަކާއި)، 20 ސްކޫލް އަދި ކޮލެޖް، 35 މެޑިކަލް ފެސިލިޓީސް އަދި ފެރީ ޓާރމިނަލްތައް ވަނީ އިންސްޕެކްޓް ކުރެވިފައެވެ.
