ފާޑުކިޔުންތަކަށް ރައްދެއް ނުދޭނަން، ރައްޔިތުންނަށް އެނގޭނެ ކޮށްދޭ ކަންކަން: ޒަހާ
ދެ އަހަރު ތެރޭގައި ގިނަ މަސައްކަތްތަކެއް ކުރެވުނު: ޒަހާ
ފިޝަރީޒް މިނިސްޓަރު ޒަހާ ވަހީދު ރަށަކަށް ކުރެއްވި ޒިޔާރަތެއްގެ ތެރެއިން
ފިޝަރީޒް މިނިސްޓްރީއަށް އެކަށީގެންވާ ވަރަށް މަސައްކަތް ނުކުރެވޭ ކަމަށް ބުނާ ބުނުމަށް ރައްދު ދެއްވަން ބޭނުންނުވާ ކަމަށާއި، ކޮށްދޭ ކަންތައްތައް ރައްޔިތުންނަށް އެނގޭނެ ކަމަށް ފިޝަރީޒް މިނިސްޓަރު ޒަހާ ވިދާޅުވެއްޖެއެވެ.
ރާއްޖެޓީވީން ގެނެސްދޭ ''ބަޖެޓް 2021'' ޕްރޮގްރާމްގައި އާދިއްތަ ދުވަހުގެރޭ ވާހަކަ ދައްކަވަމުން ޒަހާ ވިދާޅުވީ، ސަރުކާރުން މަސައްކަތް ކުރަމުން މިދަނީ މަސްވެރިކަމުގެ ސިނާއަތުގައި ހައްލު ނުކުރެވި ހުރި ބޮޑެތި މައްސަލަތައް ހައްލު ކުރުމަށް ކަމަށާއި، ސަރުކާރުންވެފައިވާ ވައުދުތައް ފުއްދާނެ ކަމަށެެވެ.
ޒަހާ ވިދާޅުވީ، ކުރީ ސަރުކާރުން ފާސްކޮށްފައި އޮތް ބަޖެޓަކީ ބޭނުންވާ ކަންތައް ހާސިލްކުރެވޭ ގޮތަށް ފާސްކޮށްފައި އޮތް ބަޖެޓެއް ނޫން ކަމަށެވެ. އަދި ކޮވިޑް-19 ހާލަތާއި ގުޅިގެން އިގްތިސާދު ހީނަރުވެގެން ދިޔުމުން މިނިސްޓްރީއަށް ކަނޑައަޅާފައި އޮތް ބަޖެޓުންވެސް ގިނަ ކަންތައްތައް ނުކުރެވޭ ކަމަށެވެ.
ފާޑުކިޔާ ފަރާތްތަކުން މިނިސްޓްރީއަށް އެންމެ އެކަށީގެންވާ ވަރަށް މަސައްކަތް ނުކުރެވޭ ކަމަށް ބުނާ ބުނުމަށް އިޝާރާތް ކުރައްވާ ޒަހާ ވިދާޅުވީ، މިނިސްޓްރީން ކުރާ މަސައްކަތްތައް ރައްޔިތުންނަށް ފެންނާނެ ކަމަށާއި، މުޅި ސަރުކާރުގެ އަމާޒަކީ މަސްވެރިކަމުގެ ސިނާއަތަށް ހައްލެއް ގެނައުން ކަމަށެވެ.
ޒަހާ ވިދާޅުވީ، ސަރުކާރަށް ދެ އަހަރު ދުވަހުގެ ތެރޭގައި މިނިސްޓްރީން ގިނަ މަސައްކަތްތަކެއް ކުރެވިފައިވާ ކަމަށް ގަބޫލުކުރައްވާ ކަމަށެވެ. އެގޮތުން އެންމެ މުހިއްމު ކަންތައްތަކުގެ ތެރޭގައި ޒަހާ ފާހަގަކުރެއްވި މަހުގެ ފިކްސްޑް ރޭޓް ދޫކޮށްލުމުގެ އިތުރުން، މަސްވެރިކަމަށް ވަންނަން އެކި ފަރާތަކަށް ފުރުސަތު ހުޅުވާލުމެވެ. މިފްކޯގެ ހިންގުން ހަރުދާނު ކުރުމާއި، މަސްވެރިންނާ ބޭނުންވާ އައިސްޕްލާންޓް ގާއިމްކުރުމުގެ އިތުރުން އާރްއެސްޑަބްލިއު ސިސްޓަމަށް ލޯނުގެ ފުރުސަތުތައް ފަހިކޮށްދިނުން ފާހަގަކުރެއްވިއެވެ.
ކުރިއާއަޅާއި ބަލާއިރު އުމްރާނީ ގޮތުން މަސްވެރިކަމުގެ ސިނާއަތަށް ގިނަ ބަދަލުތަކެއް ގެނެވިފައިވާކަން ފާހަގަކުރައްވަމުން ޒަހާ ވިދާޅުވީ، ސަރުކާރުން ގެންނަ ބަދަލުތަކާއި އެކު ކަންތައްތައް ރަނގަޅުވަމުން ދާނެ ކަމަށެވެ.
ޒަހާ ވިދާޅުވި ގޮތުގައި ސަރުކާރާ ހަވާލުވިއިރު އެންމެ ބޮޑު އެއް ގޮންޖެހުމެއްގެ ގޮތުގައި އޮތީ ގާނޫނުތަކާއި ގަވާއިދާ ހިލާފަށް މަސްވެރިކަން ކުރަމުންދާތީ އީޔޫ އިން ރާއްޖެ އަށް އަޅާފައިވާ ފިޔަވަޅުތަކެވެ. އެކަމަކު އީޔޫއިން މިހާރު ފިޔަވަޅު އަޅާނެ ކަމުގެ ބިރެއް ނެތް ކަމަށް ވިދާޅުވިއެވެ. އަލަށް އެކުލަވާލެވުނު މަސްވެރިކަމުގެ ގާނޫނާ އެކު ހަދަން ޖެހޭ ގަވާއިދުތައް ހަދައި މެނޭޖްމެންޓް ޕްލޭންތައް ނިންމާލެވިފައިވާކަން ޒަހާ ހާމަ ކުރެއްވިއެވެ.
މިނިސްޓްރީއަށް ދިމާވެފައި އޮތް އެންމެ ބޮޑު އެއް ގޮންޖެހުމެއްގެ ގޮތުގައި ޒަހާ ފާހަގަކުރެއްވީ، ފަންނީ ބޭފުޅުން މަދުވުމެެވެ.
މިހާރު ވެސް ފިޝަރީޒް މިނިސްޓްރީގެ ދަށުން އަންހެންވެރިން މަސައްކަތް ކުރަމުންދާއިރު، މި ދާއިރާގައި އަންހެނުންނަށް ވެސް ފުރުސަތު އެބައޮތްކަން ޒަހާ ފާހަގަކުރެއްވިއެވެ.
