މަގާމުގެ މަސްއޫލިއްޔަތުން ކައުންސިލުން އެކަހެރި ކުރަނީ އެކަމަށް ހެދިފައި އޮންނަ އުސޫލުގެ ތެރެއިން ކަމަށް ކައުންސިލްތަކުގެ ބެލެނިވެރި ފަރާތް ލޯކަލް ގަވަރމެންޓް އޮތޯރިޓީ (އެލްޖީއޭ) އިން ބުނެފިއެވެ.
ރާއްޖެޓީވީގެ ''ފަލަސުރުހީ'' ޕްރޮގްރާމްގައި ވާހަކަ ދައްކަވަމުން އެލްޖީއޭގެ ޑިރެކްޓަރ ޖެނެރަލް އާދަމް ޝަރީފް ވިދާޅުވީ، އަލަށް ކައުންސިލްތައް އުފެދިގެންއައިއިރު ކައުންސިލްތައް މަސައްކަތް ކުރަންވީ ގޮތާ, ސުލޫކީ ކަންތައްތައް ބައްޓަން ކުރަންވީ ގޮތަކީ ކުރިން ރޭވި އިންތިޒާމު ކުރެވިފައި ހުރި ކަންތައްތަކެއް ނޫން ކަމަށެވެ. ހަމައެއާއެކު ކައުންސިލަަރުންނަށް ވެސް އިމުގެ ތެރޭގައި އެންމެ ރަނގަޅަށް ކަންތައް ކުރަންވީ ގޮތްތައް ފަހުމްވެފައި ނެތީމާ މައްސަލަތައް ދިމާވެފައި ހުރިކަން ފާހަގަކުރައްވަމުން އާދަމް ޝަރީފް ވިދާޅުވީ، ކައުންސިލަރަކު މަގާމުން އެކަހެރިކުރަން ވާނީ އޮންނަ އުސޫލުތަކުގެ ތެރެއިން ރަނގަޅު ތަހުގީގެއް ހިންގުމަށްފަހު ކަމަށެވެ. ނަމަވެސް ބައެއް ފަހަރު ކައުންސިލަރުން ސަސްޕެންޑް ކޮށްފައިވަނީ އެންމެ ރަނގަޅު ތަހުގީގު ހިންގައިގެންކަމާއި މެދު ސުވާލު އުފެދޭ ކަމަށް އޭނާ ވިދާޅުވި އެވެ.
އާދަމް ޝަރީފް ވިދާޅުވީ، އުސޫލުތަކަށް ބަދަލު އަންނަ ކަމަށާއި، އެ އުސޫލަކީ އެންމެ ފުރިހަމަ އުސޫލަށް ނުވެދާނެ ކަމަށެވެ. ނަމަވެސް ގާނޫނުގައި ކައުންސިލަރުން ސަސްޕެންޑް ކުރެވޭނެ ގޮތްތައް ބަޔާންކޮށްފައިވާ ކަމަށެވެ.
އެހެން މިހާރު ގާނޫނުގައި ސާފު ބަހުން ސަސްޕެންޑް ކުރެވޭނެ ގޮތްތައް އެބަހުރި ލިޔެވިފައި. އުސޫލުގެ ތެރެއިން އެކަން ކުރެވެމުންދަނީ.އާދަމް ޝަރީފް - އެލްޖީއޭގެ ޑިރެކްޓަރ ޖެނެރަލް
ގަދާބާރުން ވެރިކަން ކުރެއްވި ކުރީގެ ރައީސް އަބްދުﷲ ޔާމީންގެ ވެރިކަމުގައި، އެލްޖީއޭއިން ވަނީ ކައުންސިލަރުންނާ މެދު ފިޔަވަޅުއެޅުމާއި ސަސްޕެންޑް ކުރުމާއި އިންޒާރު ދިނުމަށް 2016 ވަނަ އަހަރު އުސޫލެއް އެކުލަވާލާފަ އެވެ. އެ އުސޫލްގެ ދަށުން ޔާމީންގެ ވެރިކަމުގައި ގިނަ ކައުންސިލްތަކަކާއި ކައުންސިލަރުންނަށް އެކިއެކި ފިޔަވަޅުތަކާއި ސަސްޕެންޑްކުރުން ފަދަ ޖަރީމާތައް ވަނީ ހިންގާފައެވެ. ނަމަވެސް ހައި ކޯޓުން ވަނީ އެ އުސޫލު ބާތިލްކޮށްފައެވެ.
