ޓެރަރިޒަމްގެ އަމަލު ރޭވުމުގެ ތުހުމަތުގައި ހައްޔަރުކުރި މީހުންގެ ބަންދަށް މުއްދަތު ޖަހައިފި
މި މައްސަލައިގައި ބަންދުކުރި 18 އަހަރުގެ މީހާގެ ބަންދަށް ޖެހީ ފަސް ދުވަސް
މާލެ ތެރޭގައި އެމްއެންޑީއެފްގެ ބޮމްބް ޑިފިއުޒަލް ސްކޮޑުން ހަރަކާތްތެރި ވަނީ (ފައިލް ފޮޓޯ)
ޓެރަރިޒަމްގެ އަމަލެއް ރާވަމުން ދިޔަ ބަޔަކު ހުއްޓުވަން ފުލުހުން ހިންގި އޮޕަރޭޝަނުގައި ހައްޔަރުކުރި ހަ މީހުންގެ ބަންދަށް މުއްދަތު ޖަހައިފިއެވެ.
ފުލުހުންގެ މީޑިއާއިން ހިއްސާކުރި މެސެޖެއްގައި ބުނެފައި ވަނީ، މި މައްސަލައިގައި ހައްޔަރުކުރި ހަ މީހުންގެ ތެރޭގައި ހިމެނޭ 18 އަހަރުގެ މީހާ ފިޔަވައި ދެން ތިބި އެންމެންގެ ބަންދުގެ މުއްދަތު 15 ދުވަހަށް އިތުރުކޮށްފައިވާ ކަމަށެވެ. 18 އަހަރުގެ މީހާގެ ބަންދަށް ޖަހާފައި ވަނީ ފަސް ދުވަހެވެ.
ފުލުހުން ކުރިން ހިއްސާކުރި މައުލޫމާތަށް ބަލާއިރު، މި މައްސަލައިގައި ހައްޔަރުކޮށްފައި ވަނީ 20 އަހަރުގެ މީހަކާއި، 21 އަހަރުގެ މީހަކާއި، 31 އަހަރުގެ މީހަކާއި، 34 މީހެއްގެ އިތުރުން 18 އަހަރުގެ މީހެކެވެ.
ހަރުކަށި ފިކުރުގެ ބަޔަކު ރާވައިގެން ހިންގަން އުޅުނު ޓެރަރިޒަމްގެ އަމަލެއް ހުއްޓުވަން ފުލުހުން ކުރިއަށް ގެންދިޔަ އޮޕަރޭޝަން ހިންގަމުންދަނީ މާލެ އަތޮޅު ކަނޑުމަތީގައި އަދި ތ. ތިމަރަފުށީގައެވެ. މިހާތަނަށް މި އޮޕަރޭޝަނާއި ގުޅިގެން ފުލުހުން އިތުރު މައުލޫމާތުތަކެއް ހިއްސާކޮށްފައެއް ނުވެއެވެ.
