ގދ. ކާޑެއްދޫ އެއަރޕޯޓުގެ މެނޭޖްމަންޓުން ގދ. މާވަރުލު އެއަރޕޯޓުގައި ގަސް އިންދުމުގެ ހަރަކާތެއް ކުރިއަށް ގެންގޮސްފިއެވެ.

މާވަރުލު އެއަރޕޯޓުގައި ގަސް އިންދުމުގެ ހަރަކާތް ކުރިއަށްގެންގޮސްފައި ވަނީ ބުރާސްފަތި ދުވަހު އެވެ. އެގޮތުން އެއަރޕޯޓުގެ ގޯތި ތެރޭގައާއި އެއަރޕޯޓަށް ވަންނަން އޮންނަ މަގުގައި ވަނީ ގިނަ އަދަދެއްގެ ގަސް އިންދާފައެވެ. މީގެ ތެރޭގައި ހިމެނެނީ ބަނބުކެޔޮ ގަހާއި، ބޮޑެތި ހިޔާދޭ ގަސްތަކުގެ އިތުރުން ފަތް ނުވެރޭ ޒާތުގެ ގަހާއި، މެލޭޝިއާ ރުއްތަކެއްގެ އިތުރުން ޒީނަތްތެރި ކުރުމަށް ބޭނުންވާ ބަގީޗާ ގަހެވެ.

ރާއްޖެއެމްވީ އަށް މައުލޫމާތު ދެއްވަމުން ކާޑެއްދޫ އެއަރޕޯޓުގެ ޑިރެކްޓަރ މުހައްމަދު ޝަރީފް ވިދާޅުވީ، މާވަރުލު އެއަރޕޯޓުގައި ކުރިއަށްގެންދިޔަ ގަސް އިންދުމުގެ ހަރަކާތަކީ އެ އެއަރޕޯޓުގައި މަސައްކަތްކުރާ މުވައްޒަފުންނާއި ބައްދަލުކުރުމަށާއި އެތަނަށް ބޭނުންވާ ކަންކަން ހޯދައި ދެނެގަތުމަށް ކުރެއްވި ޒިޔާރަތުގެ ތެރެއިން ކުރެވިގެންދިޔަ މަސައްކަތެއް ކަމަށެވެ.

ޝަރީފް ވިދާޅުވީ، މާވަރުލު އެއަރޕޯޓުގައި ގަސް އިންދުމުގެ ޕްރޮގްރާމު ކުރިއަށްގެންދިއުމާއި ގުޅިގެން އެ އެއަރޕޯޓާއި ކައިރި ރަށްތަކުގެ ކައުންސިލާއި އާންމު ފަރުދުންގެ އެދުމުގެ މަތިން އިތުރު ދުވަސްތަކެއްގައި ގަސް އިންދުމުގެ ޕްރޮގްރާމެއް ކުރިއަށްގެންދިއުމަށް ހަމަޖެހިފައިވާ ކަމަށެވެ.

ކާޑެއްދޫ އެއަރޕޯޓުގެ ފޭސްބުކް ޕޭޖުގައި ކޮށްފައިވާ ޕޯސްޓެއްގައި ބުނެފައި ވަނީ ހުވަދު އަތޮޅަކީ ދުނިޔޭގައި އޮތް އުފެދުމުގައިވެސް އެންމެ ޖަޒީރާ ގިނަ އެންމެ ބޮޑު މުރަކައިގެ އަތޮޅު ކަމަށާއި، އެ އަތޮޅުގެ ޤުދުރަތީ ޢަޖައިބެއްފަދަ ރީތި، މުއްސަނދި ގޮނޑުދޮށްތަކުގެ ފައިދާ އޭގެ އެންމެ މަތީ މިންވަރަށް ރައްޔިތުންނަށް ހޯދައިދޭނީ ހަމަ އެ އަތޮޅުގެ ރައްޔިތުން ކަމަށެވެ.

މީގެ އިތުރުން އެ ޕޯސްޓުގައި ވަނީ ސީދާ ގޮތުންނާއި ނުސީދާ ގޮތުން އަތޮޅަށް ފަތުރުވެރިން ވެއްދޭނެ ވަރަށް އެ އަތޮޅުގައި އެއަރޕޯޓް ތަރައްޤީ ކުރެވޭނެ ކަމަށާއި، އެކަން ކުރާނީވެސް އަތޮޅު އެންމެން އެކުގައި ގުޅިގެން ކުރެވޭ މަސައްކަތްތަކުގެ ތެރެއިން ކަމަށެވެ.

މާވަރުލު އެއަރޕޯޓަށް މިއަހަރު ކުރީކޮޅުން ފެށިގެން ފްލައިޓްތައް އޮޕަރޭޓް ކުރަމުންދާއިރު، އެތަނަށް ދާއިމީ މުވައްޒަފުން ނެގި، އެތަނުގައި ވަޞީލަތްތައް ޤާއިމް ކުރެވެންދެން އެތަން ހިންގުމަށް ކާޑެއްދޫ އެއަރޕޯޓުގެ މުވައްޒަފުންގެ އެއްބާރުލުން ލިބެމުންދާކަމީ އެކުވެރިކަމުގެ ލާމަސީލު މިސާލެއްގެ ގޮތުގައި ދެކޭ ކަމަށް ވެސް މި ޕޯސްޓުގައި ބުނެފައިވެއެވެ.

މި ޕޯސްޓުގައި އިތުރަށް ބުނެފައި ވަނީ، ކާޑެއްދޫ އެއަރޕޯޓުގެ ޚިދުމަތް ތަރައްޤީ ކުރުމަށް އެތަކެއް ޤުރުބާނީއެއް ވަމުންވެސް، 1 މަސް ދުވަހުގެ ޓާރމްތަކަށް އެކި މުވައްޒަފުންނަށް ބަހާލައިގެން އާއިލާއާއި މާދުރަށްގޮސް މާވާރުލުގައި ހަރަކާތްތެރިވާ ކާޑެއްދޫގެ މުވައްޒަފުން ވަމުންދާ ޤުރުބާނީއަށް ޝުކުރު ހައްގު ކަމަށެވެ.

ޚިދުމަތްދޭތާ 27 އަހަރުފުރޭ ކާޑެއްދޫ އެއަރޕޯޓުގެ މުވައްޒަފުންނާއި، މާވާރުލު އެއަރޕޯޓަށް އަލަށް ނެގެމުންދާ މުވައްޒަފުން އެއްކޮށް ގުޅިގެން މާވާރުލުގައި ކުރަމުންދާ މަސައްކަތުގެ ތެރެއިން އެ އަތޮޅުގައި ގިނަ އެއަރޕޯޓުތަކެއް ހެދިގެން ދިއުން ވާނީ އެއިން ކޮންމެ އެއަރޕޯޓަކަށްވެސް ލިބިގެންދާނެ ފައިދާއަކަށްވާއިރު، އެއަރޕޯރޓުތައް ތަރައްޤީ ކުރުމުގައި ދެމިތިބި ވަރަކަށް އެ އަތޮޅުގެ ފަތުރުވެރިކަމަށް އޮންނަ ބޭނުންތެރިކަން ބޮޑުވެ، އެހެނިހެން ޞިނާޢަތްތައްވެސް އުފެދި ކުރިއަރައިދާނެ ކަމަށްވެސް ކާޑެއްދޫ އެއަރޕޯޓުން ކޮށްފައިވާ ޕޯސްޓުގައި ބުނެފައިވެއެވެ.