އަލަށް އިމާރާތްކުރި ދެ މިސްކިތެއް ހުޅުވައިފި
މަގޫދޫގެ މިސްކިތަށް ބަޖެޓުން 4.1 މިލިއަން ރުފިޔާ ހަރަދުކުރި
ނ. ފުނަދޫގައި އަލަށް އިމާރާތް ކުރެވުނު މިސްކިތް އިސްލާމިކް މިނިސްޓަރު ހުޅުވައިދެއްވަނީ
ށ. ފުނަދޫ އަދި ނ.މަގުދޫ ގައި އަލަށް އިމާރާތް ކުރެވުނު ދެ މިސްކިތް ހުޅުވައިފިއެވެ.
ބުދަ ދުވަހު މި ދެ މިސްކިތް ހުޅުވައިދެއްވީ އިސްލާމިކް މިނިސްޓަރު ޑރ. އަހްމަދު ޒާހިރު އަލީއެވެ.
މަގޫދޫގެ މިސްކިތަކީ ސަރުކާރުގެ ބަޖެޓުން ޖުމްލަ 4.1 މިލިއަން ރުފިޔާ ހަރަދުކޮށްގެން އިމާރާތްކޮށްފައިވާ މިސްކިތެކެވެ. މިސްކިތުގެ މަސައްކަތް ކުރިއަށް ގެންގޮސްފައިވަނީ ހައިމަން ކޮންސްޓްރަކްޝަން ޕްރައިވެޓް ލިމިޓެޑްގެ ފަރާތުންނެވެ.
"މަސްޖިދުލް އިސްރާ" ގެ ނަމުން ނަންދީފައިވާ މި މިސްކިތަކީ 300 މީހުންގެ ޖާގައިގެ މިސްކިތެކެވެ. މިސްކިތް އިމާރާތް ކުރަން ފަށާފައިވަނީ މި އަހަރުގެ ޖެނުއަރީ މަހުގެ 9 ވަނަ ދުވަހުއެވެ. އަދި މަސައްކަތް އެއްކޮށް ނިންމާލައިފައިވަނީ ސެޕްޓެމްބަރު މަހުގެ 30 ވަނަ ދުވަހުއެވެ.
ސަރުކާރުގެ ބަޖެޓުން ޖުމްލަ 4.5 މިލިއަން ރުފިޔާ ހަރަދުކޮށްގެން އިމާރާތްކޮށްފައިވާ ފުނަދޫ މިސްކިތުގެ މަސައްކަތް ކުރިއަށް ގެންގޮސްފައިވަނީވެސް ހައިމަން ކޮންސްޓްރަކްޝަން ޕްރައިވެޓް ލިމިޓެޑްގެ ފަރާތުންނެވެ. "މަސްޖިދުލް ރިލްވާން" ގެ ނަމުން ނަންދީފައިވާ އެ މިސްކިތަކީ 500 މީހުންގެ ޖާގައިގެ މިސްކިތެކެވެ.
މިސްކިތް އިމާރާތް ކުރަން ފަށާފައިވަނީ މިދިޔަ އަހަރުގެ ނޮވެމްބަރު މަހުގެ 17 ވަނަ ދުވަހުއެވެ. އިސްލާމިކް މިނިސްޓްރީން ބުނީ މިސްކިތުގެ މަސައްކަތް އެއްކޮށް ނިންމާލެވިފައިވަނީ މި އަހަރުގެ ސެޕްޓެމްބަރު މަހުގެ 30 ވަނަ ދުވަހު ކަމަށެވެ.
މި ދެ މިސްކިތަކީ އިސްލާމިކް މިނިސްޓްރީން އަލަށް ގާއިމްކުރާ ނުވަ މިސްކިތުގެ ތެރެއިން ދެ މިސްކިތެވެ.
