އަލަށް ޓެކްސީ ހުއްދަ ހޯދުމުގެ ފުރުސަތު މުއްދަތެއް ނެތްގޮތަށް އިތުރުކޮށްފި
ފުރުސަތު އިތުރުކުރީ ގިނަބަޔަކު އެދެމުންދާކަމަށް ބުނެ
ޓެކްސީ: މިހާރު ވަނީ ހުއްދައަށް އެދުމުގެ ފުރުސަތު އިތުރު ކޮށްފައި
މިހާރު ޓެކްސީ ކުރަމުންދާ ޓެކްސީތަކުގެ އިތުރުން އިތުރު ކާރުތަކަށް ޓެކްސީ ކުރުމުގެ ހުއްދަ ދޫކުރުމަށް ޓްރާންސްޕޯޓް އޮތޯރިޓީން ހުޅުވާލި ފުރުސަތު މުއްދަތެއް ނެތްގޮތަށް އިތުރުކޮށްފިއެވެ.
އެއޮތޯރިޓީން މިދިޔަ އާދީއްތަ ދުވަހު ކުރި އިއުލާނެއްގައި ބުނެފައިވަނީ މާލޭގައި ދުއްވާ ޓެކްސީގެ އަދަދު މަދުވުމާ ގުޅިގެން އެ ޚިދުމަތް އެންމެ އެދެވޭ ގޮތަށް އާންމުންނަށް ނުދެވޭތީ، އެކަން ހައްލު ކުރުމުގެ ގޮތުން ޓެކްސީ ކުރުމުގެ ޝަރުތުތައް ފުރިހަމަވާ އުޅަނދުތަކަށް ޓެކްސީ ހުއްދަ ދޭގޮތަށް ފުރުސަތު ހުޅުވާލާ ކަމަށެވެ.
އެ އޮތޯރިޓީން އެދުވަހު ކުރި އިއުލާނުގައި ބުނެފައި ވަނީ މި މަހުގެ 26 ވަނަ ދުވަހުގެ ކުރިން ޓެކްސީ ކުރުމުގެ ހުއްދައަށް އެދި ހުށަހަޅަން ވާނެ ކަމަށެވެ. ނަމަވެސް ބުރާސްފަތި ދުވަހު އެއޮތޯރިޓީން ވަނީ އިއުލާނެއް ނެރެ އެފުރުސަތު ވަކި މުއްދަތެއް ނެތްގޮތަށް އިތުރުކޮށްފައެވެ.
އެއޮތޯރިޓީން ބުނީ އެގޮތަށް ނިންމީ ގިނަ އަދަދެއްގެ ބަޔަކު ޓެކްސީ ހުއްދައަށް އެދެމުންދާތީ ގިނަ ފަރާތްތަކަކަށް ފުރުސަތު ދިނުމުގެ ގޮތުން ކަމަށެވެ.
ޓެކްސީ ގަވާއިދުގައިވާ ގޮތުންނަމަ، ޓެކްސީ ކުރާ އުޅަނދުގައި “TAXI” މިގޮތަށް ލިޔެފައިވާ ބޯޑެއް މޯލްޑިވްސް ޓްރާންސްޕޯޓް އޮތޯރިޓީން ކަނޑައަޅާފައިވާ ގޮތަށް ދިއްލޭ ގޮތަށް ޓެކްސީގެ ކުރިމަތިން ފެންނަން ހުންނަ ގޮތަށް ހަރުކޮށްފައި ހުންނަން ވާނެއެވެ. އަދި އެ އުޅަނދަކީ އުފެއްދި ތާރީޚުން ފެށިގެން 10 އަހަރު ނުވާ ހަތަރު ފުރޮޅުލީ ޖާގައިގެ ގޮތުން ތަނަވަސް ޑިކީ ހުރި ކާރު ކަމުގައި ވެސް ވާން ޖެހެ އެވެ.
އަލަށް އެކުލަވާލި ޓެކްސީ ގަވާއިދުގައިވާ ގޮތުގައި ޓެކްސީ ކުރުމުގެ ހުއްދައިގެ އަގަކީ 50،000 ރުފިޔާ އެވެ.
ޓެކްސީ ޤަވާއިދަށް ގެނައި ބަދަލުގެ ސަބަބުން ޓެކްސީ ކުރުމުގެ ހުއްދައިގެ އަގު ބޮޑުވުމާއި ގުޅިގެން ބައެއް ޑްރައިވަރުން ވަނީ ފާޑު ކިޔާފައެވެ.
މިހާރު ވަނީ ސައިކަލް ޓެކްސީވެސް ތައާރަފްކޮށް އެޚިދުމަތް ލިބޭނޭގޮތް ހަދާފައެވެ
