މި އަހަރުގެ އިންޑިއަން ޕްރިމިއާ ލީގު (އައިޕީއެލް) ކްރިކެޓް މުބާރާތުގެ ޗެމްޕިއަންކަން މުމްބާއިީ އިންޑިއަންސްއިން ހޯދައިފިއެވެ.

އައިޕީއެލްގެ ޗެމްޕިއަންކަން މުމްބާއީ އިންޑިއަންސްއިން ހޯދީ އަންގާރަ ދުވަހުގެރޭ ކުޅުނު ފައިނަލް މެޗުގައި ދިއްލީ ކެޕިޓަލްސް އަތުން ފަސް ވިކެޓުން މޮޅުވެގެންނެވެ. މިއީ މި މުބާރާތުގެ ޗެމްޕިއަންކަން މުމްބާއީ އިންޑިއަންސްއިން ހޯދި ފަސްވަނަ ފަހަރެވެ.

ދުބާއި އިންޓަނޭޝަނަލް ސްޓޭޑިއަމުގައި ކުޅުނު ފައިނަލް މެޗުގައި ޓޮސް ދިމާވުމުން ދިއްލީ ކެޕިޓަލްސްއިން ގަސްތުކުރީ ކުޅުމަށެވެ. އެ ޓީމު ކުޅެން އަރާ 20 އޯވަރު ހަމަވިއިރު، ހަތް ކުޅުންތެރިން ނުބައިވެގެން ހެދުނީ 156 ލަނޑެވެ. ދިއްލީ ކެޕިޓަލްސްއިން އެންމެ ރަނގަޅަށް ކުޅުނީ 50 ބޯޅައިން 65 ލަނޑު ހެދި ޝްރެޔާސް އިޔާއެވެ.

ޖަވާބުގައި މުމްބާއީ އިންޑިއަންސް ކުޅެން އަރާ 18.4 އޯވަރުގެ ތެރޭގައި ފަސް ކުޅުންތެރިން ނުބައިވެގެން 157 ލަނޑު ހަދާ މެޗު ކާމިޔާބުކުރިއެވެ. އެޓީމުން އެންމެ ރަނގަޅަށް ކުޅުނީ 51 ބޯޅައިން 68 ލަނޑު ހެދި ރޯހިތު ޝަރްމާއެވެ.

ކޮވިޑް-19 އާ ގުޅިގެން ޔުނައިޓެޑް އަރަބި އެމިރޭޓްސް (ޔޫއޭއީ) ގައި މިއަހަރުގެ މުބާރާތް ކުރިއަށްދިޔައިރު، މެޗުތައް ކުރިއަށް ގެންގޮސްފައިވަނީ ސަޕޯޓަރުން ދަނޑަށް ނުވައްދައެވެ.

މިއަހަރުގެ މުބާރާތް ޔޫއޭއީގައި ކުރިއަށްދިޔައިރު، މި މުބާރާތް މީގެ ކުރިންވެސް ވަނީ ޔޫއޭއީގައި ބާއްވާފައެވެ. އެގޮތުން 2014 ވަނަ އަހަރުގެ މުބާރާތުގެ އެއްބައި ވަނީ ޔޫއޭއީގައި ކުޅެފައެވެ. އަދި 2009 ވަނަ އަހަރު މި މުބާރާތް ވަނީ ސައުތު އެފްރިކާގައި ބާއްވާފައެވެ. އޭރު މުބާރާތް ސައުތު އެފްރިކާއަށް ބަދަލުކުރީ ސަލާމަތީ ސަބަބުތަކަށްޓަކައެވެ.