އިންޑިއާގެ ނެއިބަރހޫޑް ފަސްޓް ސިޔާސަތުގެ ދަށުންވެސް އެންމެ އިސްކަމެއް ދެނީ ރާއްޖެއަށް
އިންޑިއާއިން ރާއްޖެއާ އެކު އޮންނަ ގުޅުން ބިނާވެގެންވަނީ ރާއްޖޭގެ ތަރައްގީގެ މައްޗަށް
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް އަދި އިންޑީއާގެ ބޮޑުވަޒީރު ނަރެންދްރަ މޯދީ
އިންޑިއާގެ "ނެއިބަރހޫޑް ފަސްޓް ޕޮލިސީ" އަކީ އެ ގައުމުން ހާއްސަ އިސްކަމެއްދޭ ސިޔާސަތުކަމަށާއި މި ސިޔާސަތުގެ ދަށުންވެސް އެންމެ އިސްކަމެއް ދެނީ ރާއްޖެއަށް ކަމަށް އިންޑިއާގެ ފޮރިން ސެކްރެޓަރީ ހާރްޝް ވަރްދަން ޝްރިންގްލާ ވިދާޅުވެއްޖެއެވެ.
ހޯމަ ދުވަހު ފޮރިން މިނިސްޓްރީގައި އޮތް ހާއްސަ ހަފްލާއެއްގައި ވާހަކަދައްކަވަމުން ފޮރިން ސެކްރެޓަރީ ޝްރިންގްލާ ވަނީ އިންޑިއާގެ ބޮޑުވަޒީރު ނަރެންދްރަ މޯދީ 2019 ވަނަ އަހަރުގެ ޖޫން މަހު ރާއްޖެއަށް ކުރެއްވި ހާއްސަ ދަތުރުފުޅުގައި ވިދާޅުވި، "ނެއިބަރހޫޑް ފަސްޓް ޕޮލިސީއަކީ އިންޑިއާއިން ހައްސާ އިސްކަމެއްދޭ ސިޔާސަތެއް. މި ސިޔާސަތުގެ ދަށުންވެސް ރާއްޖެއަށް ދެވޭ އިސްކަން ބޮޑުވާނެ" ތަކުރާރުކުރައްވާފައެވެ.
މީގެ އިތުރުން ބޮޑުވަޒީރު މޯދީ ވިދާޅުވެފައިވާ އިތުރު ބަސްފުޅެއް ތަކުރާރު ކުރައްވަމުން ފޮރިން ސެކްރެޓަރީ ވަނީ އިންޑިއާ އާއި ރާއްޖެެއާ ދެމެދު އޮންނަ ގުޅުން ބިނާވެގެން ވަނީ ރާއްޖޭގެ ތަރައްގީގެ މައްޗަށް ކަމަށާއި މި ގުޅުމުގައި އެންމެ އިސްކަމެއް ދޭނީ ދިވެހި ރައްޔިތުންގެ މަންފާއަށް ކަމަށް ވިދާޅުވެފައެވެ. އެހެންކަމުން ކޮވިޑް-19 އާ ގުޅިގެން އިންޑިއާއިން އެންމެ ފުރަތަމަ އަދި އެންމެ ބޮޑު އެހީއެއް ފޯރުކޮށްދިން ގައުމަކަށް ރާއްޖެ ވެގެންދިއުން އެއީ އިއްތިފާގެއް ނޫން ކަމަށް ފޮރިން ސެކްރެޓަރީ ވިދާޅުވިއެވެ.
ކޮވިޑް-19 ގެ ހާލަތް ނިމުމުންވެސް އިންޑިއާއިން ރާއްޖެއަށް ފޯރުކޮށްދެމުން އަންނަ އެހީތެރިކަން ދެމި އޮންނާނެ ކަމުގެ ޔަގީންކަން އަރުވާ ކަމަށާއި ރާއްޖެއިން އިންޑިއާގެ އެހީތެރިކަން ބޭނުންވާ ކޮންމެ ދަނޑިވަޅެއްގައި އެހީތެރިކަން ފޯރުކޮށްދިނުމަށް އިންޑިއާއިން އޮންނާނީ ތައްޔާރަށް ކަމަށް ފޮރިން ސެކްރެޓަރީ ޝްރިންގްލާ ވިދާޅުވިއެވެ.
ބަލިމަޑުކަމުގެ ސަބަބުން ދެ ގައުމަށް ވެސް ގިނަ ގޮންޖެހުންތަކަކާއި ކުރިމަތިލާން ޖެހިފައިވާ ކަމަށާއި މިކަންކަމާއި ގުޅިގެން ކުރިމަތިލައި ރާއްޖެއަށް ދިމާވެފައިވާ ގޮންޖެހުންތަކުން އަރައިގަތުމަށް އެހީތެރިކަން ފޯރުކޮށްދިނުމަކީ އިންޑިއާއަށް ލިބޭ ވަރަށް ބޮޑު އުފަލެއް ކަމަށް ޝްރިންގްލާ ވިދާޅުވިއެވެ.
