ރާއްޖެއިން ފެނުނު ކޮވިޑް ކޭސްތަކުގެ އަދަދު 12،000 ފަހަނައަޅާ ގޮސްފި
ފާއިތުވި 24 ގަޑިއިރުގެ ތެރޭގައި ރާއްޖެއިން ރިޕޯޓްކޮށްފައި ވަނީ 23 ކޭސް
ކޮވިޑް ބަލި މީހުންތަކެއް އުފުލުމުގެ މަސައްކަތުގައި އާރްއާރް ޓީމުން ހަރަކާތްތެރި ވަނީ
ރާއްޖެއިން ކޮވިޑް-19 ޖެހިފައިވާ މީހުންގެ އަދަދު 12,009 އަށް އަރައިފި ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފިއެވެ.
އެޗްޕީއޭއިން އެންމެ ފަހުން އާންމުކޮށްފައިވާ ތަފާސްހިސާބުތަކަށް ބަލާއިރު، ފާއިތުވި 24 ގަޑިއިރުގެ ތެރޭގައި ރާއްޖެއިން ރިޕޯޓްކޮށްފައި ވަނީ 23 ކޭސްއެކެވެ. އޭގެ ތެރެއިން 21 ކޭސް މާލެ ސަރަހައްދުން ރިޕޯޓްކުރިއިރު، އަނެއް ދެ ކޭސް ރިޕޯޓްކުރީ އަތޮޅުތެރޭގެ ރަށްތަކުންނާއި ރިސޯޓްތަކުންނެވެ.
ފާއިތުވި 24 ގަޑިއިރު ރާއްޖެއިން 1،342 ސާމްޕަލްގެ ތެރެއިން ޕޮޒިޓިވްވީ 20 މީހުންނަކީ ދިވެހިންނެވެ. ބާކީ ތިން މީހުންނަކީ ބިދޭސީންނެވެ. ރާއްޖެއިން ފެނުނު ކޮވިޑް ބަލި މީހުންގެ ތެރެއިން 63.44 އިންސައްތައަކީ ދިވެހިންނެވެ.
މި ވަގުތު ރާއްޖޭގައި މި ބައްޔަށް ފަރުވާ ހޯދަމުން އަންނަ 830 މީހުންގެ ތެރެއިން 52 މީހަކަށް ފަރުވާދެމުން އަންނަނީ ހޮސްޕިޓަލުގައެވެ. އަދި 225 މީހަކަށް ފަރުވާދެމުން އަންނަނީ އައިސޮލޭޝަން ފެސިލިޓީތަކުގައެވެ.
