ވަކި ދާއިރާއެއް ޚާއްސަކޮށްގެން މެމްބަރުން ވާހަކަދެއްކުމަކީ ޤާނޫނު އަސާސީގައި މަނާކަމެއް: ރައީސް ނަޝީދު
9 ނޮވެމްބަރު 2020 | ހޯމަ 08:45މެމްބަރުން ވަކާލާތު ކުރައްވަންވާނީ މުޅި ރާއްޖެއަށް ކަމަށް ރައީސް ނަޝީދު ވިދާޅުވި
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ވަކި ދާއިރާއެއްގެ ވާހަކަ މެމްބަރުން ޚާއްސަކޮށްގެން ދެއްކުމަކީ ޤާނޫނު އަސާސީ މަނާކުރާ ކަމެއްކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.
ހޯމަ ދުވަހުގެ ޖަލްސާއަށް ފިނޭންސް މިނިސްޓަރ އިބްރާހީމް އަމީރު އަންނަ އަހަރަށްލަފާ ކުރާ ދައުލަތުގެ ބަޖެޓް ހުށަހެޅުއްވުމުން އޭގެ ފަހުން ވާހަކަދައްކަވަމުން މަޖިލީހުގެ ރައީސް ވިދާޅުވީ މެމްބަރުންނަކީ މުޅި ދިވެހިރާއްޖޭގެ ރައްޔިތުންގެ މަޖިލީހުގެ މެމްބަރުން ކަމަށެވެ. މެމްބަރުން އިންތިޚާބުވެ ވަޑައިގަންނަވާފައިވަނީ ވަކިވަކި ދާއިރާތަކުންކަން އެނގިވަޑައިގަންނަވާ ކަމަށް ރައީސް ނަޝީދު ވިދާޅުވިއެވެ.
އެހެންނަމަވެސް މެމްބަރުން ވަކާލާތު ކުރައްވަންވާނީ މުޅި ރާއްޖެއަށް ކަމަށް ރައީސް ނަޝީދު ވިދާޅުވި އެވެ.
އަންނަ އަހަރަށް ލަފާކޮށް ދައުލަތުން ހުށަހަޅާފައިވަނީ 34.7 ބިލިއަން ރުފިޔާގެ ބަޖެޓެކެވެ. މީގެ ތެރެއިން ޚަރަދުގެ ގޮތުގައި ހިނގާނެކަމަށް ބެލެވެނީ 33.3 ބިލިއަން ރުފިޔާ އެވެ. އަންނަ އަހަރު ޖުމްލަ އާމްދަނީ އާއި ހިލޭއެހީގެ ގޮތުގައި ދައުލަތަށް ލިބޭނެކަމަށް ލަފާކުރެވެނީ 17.8 ބިލިއަން ރުފިޔާ އެވެ.
