މީޑިއާ ކައުންސިލްގެ މެންބަރު ކަމަށް 28 ފަރާތަކުން ކުރިމަތިލައިފި
މެންބަރުކަމަށް ހުޅުވާލި ފުރުސަތުގައި 28 ފަރާތަކުން ކުރިމަތިލި
މޯލްޑިވްސް މީޑިއާ ކައުންސިލްގެ އިދާރާ
މޯލްޑިވްސް މީޑިއާ ކައުންސިލް (އެމްއެމްސީ)ގެ މެންބަރުކަމަށް ހުޅުވާލި ފުރުސަތުގައި 28 ފަރާތަކުން ކުރިމަތިލައިފިއެވެ.
އެމްއެމްސީ އަށް ކުރިމަތިލާން ހުޅުވާލުމުން އެކަށީގެންވާ ތަރުހީބެއް ލިބިފައި ނުވާ ކަމަށް ބުނެ، އެ ކައުންސިލްގެ މެމްބަރުކަމަށް ކުރިމަތިލުމުގެ މުއްދަތު ސެޕްޓެމްބަރު މަހުގެ 21 ވަނަ ދުވަހު އަލުން ހުޅުވާލުމަށްފަހު، އިންތިހާބަށް ވާދަކުރާ ކެންޑިޑޭޓުންގެ ލިސްޓު އާދިއްތަ ދުވަހު ހޯމް މިނިސްޓްރީން ވަނީ އާންމުކޮށްފައެވެ.
މީޑިއާ ކައުންސިލްގެ މެންބަރުން ހޮވުމަށް ބާއްވާ އިންތިޚާބު، އަންނަ މަހުގެ 5 ވަނަ ދުވަހު ބޭއްވުމަށް ހަމަޖެހިފައިވާ އިރު، މި އިންތިޚާބުގައި ވޯޓުލެވޭނީ ރަޖިސްޓްރީކޮށްފައިވާ ނޫސްތަކަށާއި އަދި ބްރޯޑް ކާސްޓަރުންގެ ތެރެއިން ކޮންމެ މީޑިއާއެއް ވެސް ތަމްސީލުކުރައްވާ އެއް ފަރާތަކަށެވެ.
މިފަހަރުގެ އިންތިޚާބުގައި މޯލްޑިވްސް މީޑިއާ ކައުންސިލްގެ މީޑިއާގެ މެންބަރުކަމަށް 14 ފަރާތަކުން ވަނީ ކުރިމަތިލާފައެވެ. އަދި މީޑިއާ ކައުންސިލްގެ އާންމުންގެ މެންބަރުކަމުގެ މަގާމަށްވެސް 14 ފަރާތަކުން ކުރިމަތިލާފައިވެއެވެ.
