ޓެނިސް އެސޯސިއޭޝަނުގެ ރައީސްގެ މަގާމަށް އަޙްމަދު ހަފީޒް އިންތިޚާބުވެއްޖެ

ޓެނިސް އެސޯސިއޭޝަން އޮފް މޯލްޑިވްސްގެ ރައީސްގެ މަގާމަށް އަޙްމަދު ހަފީޒް އިންތިޚާބުވެއްޖެއެވެ.

ހޮނިހިރު ދުވަހުގެ ހަވީރު ޓެނިސް ކޯޓުގައި ބޭއްވި އެ އެސޯސިއޭޝަނުގެ އިންތިޚާބުގައި ވޯޓުން ފަސް މަގާމަކަށް ބޭފުޅުން ވަނީ އިންތިޚާބުކޮށްފައެވެ. އެއީ ރައީސް އާއި ނައިބު ރައީސް އަދި އިތުރު ތިން މެންބަރުންނެވެ. ހަޒާންދާރުގެ މަގާމާއި ޖެނަރަލް ސެކްރެޓަރީއެއް އައްޔަނު ކުރާނީ އިންތިޚާބުވި ހިންގާ ކޮމިޓީންނެވެ.

އިންތިޚާބުގައި ރައީސްގެ މަގާމަށް ކުރިމަތިލެއްވީ ހަފީޒް އެކަންޏެވެ. މަޝްހޫރު ވިޔަފާރިވެރިޔާ ހަފީޒަކީ ފުޅާ ދާއިރާއެއްގައި ރިސޯޓް ވިޔަފާރީ ކުރައްވާ ލިލީ ހޮޓެލްސްގެ މެނޭޖިންގ ޑިރެކްޓަރު (އެމްޑީ) އެވެ. އެހެންކަމުން ފެންނަ ނުފެންނަ ވޯޓުގައި 166 ވޯޓާއެކު ހަފީޒް ވަނީ އިންތިޚާބުވެފައެވެ.

އަދި މި އިންތިޚާބުގައި އެ އެސޯއިއޭޝަނު ނައިބު ރައީސްގެ މަގާމަށް މުޙައްމަދު އަމީން އާއި މުޙައްމަދު ހާނިމް ވަނީ ވާދަކުރައްވާފައެވެ. ނައިބު ރައީސްގެ މަގާމަށް މިހާރުވެސް އެމަގާމުގައި ހުންނެވި އަމީން ހޮވުނުއިރު، އޭނާއަށް ވަނީ 148 ވޯޓު ލިބިވަޑައިގެންފައެވެ. މި މަގާމަށް ދެން ވާދަކުރެއްވި، ހާނިމަށް ލިބިވަޑައިގަތީ 27 ވޯޓެވެ.

މީގެ އިތުރުން މި އިންތިޚާބުގައި ހިންގާ ކޮމިޓީގެ މެންބަރުކަމުގެ މަގާމަށް ހޮވިފައިވާ ތިން މެމްބަރުންނަކީ ހަސަން ޝާމާއި، ޔޫސުފް ރިޒާ އަދި އަޒްމާ އިބްރާހީމެވެ.

ޓެނިސް އެސޯސިއޭޝަނުގެ ރައީސްގެ މަގާމަށް އިންތިޚާބުވުމަށްފަހު ހަފީޒް ވިދާޅުވީ އޭނާ ކުރިއަށްވަޑައިގަންނަވާނީ ކުރީގެ ރައީސް އަޙްމަދު ނަޒީރު ހިންގެވިމަގުން ކަމަށާއި، ނަޒީރަކީ ރާއްޖޭގެ ޓެނިސް މިހާ ހިސާބަށް ގެނައުމުގެ އަސްލު ކަމަށެވެ. އަދި ވިދާޅުވީ އައު ހިންގާ ކޮމިޓީގެ އެންމެ ބޮޑު އަމާޒަކީ ރާއްޖޭގެ ކުޅުންތެރިން ސަރަހައްދީ ފެންވަރުގައި ވާދަކުރެވޭނެ ހިސާބަށް ގެންދިއުން ކަމަށެވެ. އަދި މުޅި ރާއްޖެއަށް ޓެނިސް ފުޅާކުރުމުގެ ވިސްނުން އެބަހުރި ކަމަށްވެސް ހަފީޒް ވިދާޅުވިއެވެ.

ރާއްޖޭގައި ޓެނިސް ކުޅޭތާ ގިނަ އަހަރުތަކެއް ވެފައިވާއިރު، ގައުމީ ކުޅިވަރު އެސޯސިއޭޝަންތަކުގެ ތެރެއިން އެންމެ ރަނގަޅު ކުޅިވަރު ވަސީލަތް ގާއިމުވެފައިވާ ކުޅިވަރަކީ ޓެނިހެވެ. ކޮންމެ އަހަރަކުވެސް ޓެނިހުން ގިނަ މުބާރާތްތަކެއް ބާއްވަމުންދިޔަ ނަމަވެސް، ޓެނިސް ކުޅޭ ކުޅުންތެރިންގެ އަދަދު އިތުރުވަމުންދަނީ ވަރަށް މަދުންނެވެ. އަދި ބައިނަލްއަގުވާމީ މައިދާނުގައި ޓެނިހުން ރާއްޖެއަށް އެކަށީގެންވާ ކާމިޔާބީއެއް ހޯދިފައިނުވާއިރު ޓެނިހަކީ ނިސްބަތުން މަދު އެތްލީޓުން ހިމެނޭ ކުޅިވަރެކެވެ.