އެމެރިކާގެ އިންތިޚާބީ ރައީސް ބައިޑެންއަށް ރައީސް ސޯލިޙުގެ ތަހުނިޔާ!

އެމެރިކާގެ އިންތިޚާބީ ރައީސް ޖޯ ބައިޑެންއަށް ރައީސުލްޖުމްހޫރިއްޔާ އިބްރާޙިމް މުޙަައްމަދު ސޯލިޙު މަރުޙަބާ ވިދާޅުވެއްޖެއެވެ.

ރައީސް ޑޮނަލްޑް ޓްރަމްޕާ ވާދަކުރައްވައި އިލެކްޓޯރަލް ވޯޓުން ކުރި ހޯއްދަވައި، ބައިޑެން ވަނީ މިހާތަނަށް އެންމެ ގިނަ ވޯޓު ލިބިވަޑައިގެންނެވި ރިޔާސީ ކެނޑިޑޭޓްގެ ލަޤަބު ވެސް ހޯއްދަވާފައެވެ.

ބައިޑެންއަށް މަރުޙަބާ ވިދާޅުވެ ރައީސް ސޯލިޙު ކުރެއްވި ޓްވީޓެއްގައި ވަނީ އެމެރިކާގެ 46 ވަނަ ރައީސްކަމުގެ މަޤާމު ކާމިޔާބު ކުރެއްވި ބައިޑެން އަށް މަރުޙަބާ ވިދާޅުވެފައެވެ. އަދި އެމެރިކާއާއި ގުޅިގެން މަސައްކަތް ކުރެއްވުމަށް އުއްމީދު ކުރައްވާ ކަމަށާއި، ޚާއްސަކޮށް ކޮވިޑް-19 އިން އަރައިގަތުމަށް ކުރަމުންދާ މަސައްކަތުން ފެށިގެން މޫސުމީ ބަދަލުތަކުން އަރައިގަތުމަށް ކުރަމުންދާ މަސައްކަތުގައި ވެސް އެކުގައި މަސައްކަތް ކުރެއްވުމަށް އުއްމީދު ކުރައްވާ ކަމަށް ރައީސް ސޯލިޙު ވިދާޅުވިއެވެ.

އިންތިޚާބީ ރައީސްއަކަށް ބައިޑެން ވެވަޑައިގަތުމާއެކު، އިންތިޤާލީ މަރުޙަލާގައި އެ މަނިކުފާނުގެ އައު ވެރިކަން ޤާއިމު ކުރުމަށް ކުރަން ޖެހޭ ކަންކަން ފެށިގެންދާނެއެވެ. އެގޮތުން 3 މަސް ދުވަހުގެ ތެރޭގައި ކެބިނެޓް އެކުލަވާލައި، ކޮވިޑް-19 ގެ ބަލިމަޑުކަމުގެ ތެރޭގައި އެ ޤައުމުގެ އިޤްތިސާދު ކޮޅަށް ނަގައި ރައްޔިތުންނަށް އެންމެ ފައިދާހުރި ސިޔާސަތުތައް ޤާއިމު ކޮށްދެއްވުމަށް ކުރަންޖެހޭ މަސައްކަތްތައް ފެށިގެންދާނެއެވެ.