12 އަހަރަށް ފަހު، އިމިގްރޭޝަންގެ ސްޓްރެޓިޖިކް ޕްލޭނެއް އެކުލަވާލައިފި

ފާއިތުވި 12 އަހަރު ތެރޭގައި ފުރަތަމަ ފަހަރަށް އިމިގްރޭޝަން އިން ސްޓްރެޓިޖިކް ޕްލޭންއެއް އެކުލަވާލާ އެޔަށް އަމަލު ކުރަން ފަށައިފިއެވެ.

ބުރާސްފައި ދުވަހު ވެލާނާގޭގައި ބޭއްވި ރަސްމިއްޔާތުގައި މި ޕްލޭން އިފްތިތާހްކޮށްދެއްވީ މިނިސްޓަރ އޮފް އިކޮނޮމިކް ޑިވެލޮޕްމަންޓް ފައްޔާޒް އިސްމާއިލްއެވެ.

ރަސްމިއްޔާތުގައި ވާހަކަދައްކަވަމުން މިނިސްޓަރ ފައްޔާޒް ވިދާޅުވީ ސަރުކާރުގެ ކޮންމެ އިދާރާއެއްގައިވެސް ސްޓްރެޓިޖިކް ޕްލޭންއެއް އެކުލަވާލުމުގެ މަސައްކަތް ފުރަތަމަ ފަށާފައި ވަނީ ރައީސް ނަޝީދުގެ ސަރުކާރުގައި ކަމަށެވެ. ނަމަވެސް މި މަސައްކަތުގައި އަމަލީ ސިފަ ޖެހިގެންދިޔައީ ރައީސް އިބްރާހިމް ސޯލިހުގެ ސަރުކާރުން ކަމަށެވެ.

ފައްޔާޒް ވިދާޅުވީ ސްޓްރެޓިޖިކް ޕްލޭންއެއް އޮތުމަކީ ވަރަށް މުހިންމު ކަމަށެވެ. މީގެއިތުރުން ފާއިތުވި ދެ އަހަރު ތެރޭގައި ސަރުކާރުގެ އެކިއެކި އިދާރާތަކަށް ގެނެވިފައިވާ ބަދަލުތައް ފާހަގަކުރައްވަމުން މިނިސްޓަރ ވިދާޅުވީ ސަރުކާރުގެ ވިޝަން އަކީ ވަރަށް ރިވޮލިއުޝަނަރީ ވިޝަންއެއް ކަމަށެވެ.

ކުރީގެ ސަރުކާރުތަކުން ކަންކަން ކުރަމުން އައި ގޮތާއި މި ސަރުކާރުގެ ކަންކަން ކުރަމުން އަންނަ ގޮތް ތަފާތުކަން ފާހަގަކުރައްވާ ފައްޔާޒު ވިދާޅުވީ މިކަމުގެ ސަބަބުން ވަރަށް ގިނަ ގޮންޖެހުން ތަކާއި ފާއިތުވި ދެ އަހަރު ތެރޭގައި ދިމާވި ކަމަށެވެ. ނަމަވެސް މިހާރު ފެނިގެން ދަނީ މުޅި ދައުލަތް އެއް ވިސްނުމަކަށް މިސްރާބު ޖަހާފައިވައި މަންޒަރު ކަމަށެވެ.

އިމިގްރޭޝަން އިން އިގްތިސޯދުގައި ވަރަށް މުހިންމު ދައުރެއް އަދާކުރާކަން ފާހަގަކުރައްވާ މިނިސްޓަރ ވިދާޅުވީ ޒަމާނުއްސުރެއް ކަންތައް ކުރަމުން އައިސްފައިވާގޮތަށް މިއަށް ވުރެއްވެސް ބޮޑަށް ބަދަލުތައް ގެންނަން ޖެހޭ ކަމަށެވެ.

ރާއްޖޭގެ އިޤްތިސާދު، ގައުމަށް އަންނަ މެހެމާނުންނަށް ބަރޯސާވެފައިވާކަން ފާހަގަކުރައްވާ މިނިސްޓަރ ވިދާޅުވީ އަންނަ މެހެމާނުންނަށް ކަމޭހިތަންޖެހޭ ކަމަށާއި، ގައުމަށް އަންނަ އެންމެ މުއްސަނދި މީހާއިން ފެށިގެން ގައުމަށް މަސައްކަތް ކުރަން އަންނަ އެންމެ އާދައިގެ މަސައްކަތްތެރިޔަކާއި ދޭތެރޭގައިވެސް އިހްތިރާމާއެކު އަމަލު ކުރަން ޖެހޭނެ ކަމަށެވެ. މި ވިސްނުމުގައި އިމިގްރޭޝަން އަށް ވަރަށް ގިނަ ބަދަލުތަކެއް ހުށައެޅުފައިވާނެ ކަމަށް މިނިސްޓަރ ވިދާޅުވިއެވެ. އެގޮތުން ވިސާ ދިނުމުގައިވެސް ވަރަށް ބޮޑުތަން ފަސޭހަ ވާނެ ގޮތަކަށް މިހާރު ބަދަލު ކުރެވިފައިވާނެ ކަމަށް ވިދާޅުވިއެވެ.

މީގެ އިތުރުން ބިދޭސީ ވަގު ވިޔަފާރީގެ މައްސަލަ ފާހަގަކުރައްވައި މިނިސްޓަރ ވިދާޅުވީ އެއީ އިމިގްރޭޝަން އަދި އެކޮނޮމިކް މިނިސްޓަރީ އަށް އޮތް ވަރަށް ލަދުވެތި މާޒީއެއް އޮތް ކަމެއްކަމަށެވެ. ނަމަވެސް ދެ މުއައްސަސާ ގުޅިގެން މަސައްކަތްކޮށް މިހާރު ވަރަށް ބައިވަރު ހެޔޮ ބަދަލުތަކެއް ގެނެވިފައިވާކަމަށް މިނިސްޓަރ ވިދާޅުވިއެވެ. މިސްރާބު ހުރީ މިކަންތަށް ދާއިމީކޮށް ހައްލު ކުރުމަށް ކަމަށް މިނިސްޓަރ ވިދާޅުވިއެވެ.

އިމިގްރޭޝަން އާއި ނުލައި މަސްކަތްތައް އެހާ ފުރިހަމަ އަށް ނުދިޔައީސްކަން ފާހަގަކުރައްވާ ދެ މުއައްސަސާ އެކުވެ ކުރެވުނު ކަންތައްތަކަށް މިނިސްޓަރ އިމިގްރޭޝަންގެ އިސްވެރިންނަން ޝުކުރު އަދާ ކުރައްވާފައިވެއެވެ.