ސިއްހީ ނިޒާމަށް ބުރަވެ، ސްވިޒަލެންޑުގެ އަސްކަރިއްޔާއިން ހޮސްޕިޓަލުތަކަށް އެހީތެރިކަން ފޯރުކޮށްދެނީ

ކޮވިޑް-19 ގެ ދެވަނަ ރާޅެއް އައިސް ސްވިޒަލެންޑުގެ ސިއްހީ ނިޒާމަށް ބުރަ ބޮޑުވެ، އެ ގައުމުގެ އަސްކަރިއްޔާއިން ހޮސްޕިޓަލްތަކަށް އެހީތެރިކަން ފޯރުކޮށްދޭން ފަށައިފިއެވެ.

ސްވިޒަލެންޑުގެ ކޮވިޑުގެ ހާލަތު އިހުނަށް ވުރެ ގޯސްވެ، ހަލުވި މިނެއްގައި މި ބަލި އަންނަނީ އެ ގައުމުގައި ފެތުރެމުންނެވެ. އަދި އަސްކަރިއްޔާއިން ހޮސްޕިޓަލުތަކަށް އެހީތެރިކަން ފޯރުކޮށްދޭން ނިންމީ ސިއްހީ ނިޒާމަށް ނުކަތާވަރަށް އެޑްމިޓްކޮށްގެން ފަރުވާދޭން ޖެހޭ މީހުންގެ އަދަދުތައް އިތުރުވަމުން އައުމާއި ގުޅިގެންނެވެ.

ބޭރުގެ މީޑިއާތަކުން ރިޕޯޓްކޮށްފައިވާ ގޮތުގައި، މިހާތަނަށް 2،500 ސިފައިންގެ މީހަކު ވަނީ މި މަސައްކަތަށް ނެރިފައެވެ. އެގޮތުން ބަލި މީހުންނަށް ފަރުވާ ދިނުމާއި، ބަލި މީހުން އެއްތަނުން އަނެއްތަނަށް އުފުލުމުގައި ސިފައިން ދަނީ ހަރަކާތްތެރިވަމުންނެވެ.

ކޮވިޑާއި ގުޅިގެން ސްވިސްގެ އިގްތިސާދަށް ވަނީ ބޮޑު ގެއްލުމެއް ލިބިފައެވެ. އަދި އެހެން ގައުމުތަކުގެ އެހީތެރިކަން އެގައުމަށް ބޭނުންވާ ކަމަށް ސަރުކާރުން ހާމަކޮށްފައިވެއެވެ. އެ ގައުމުގެ ސަރުކާރުން ވަނީ 350 މިލިއަން ޑޮލަރުގެ ލޯނު އެހީ ދޫކުރުމަށް ވެސް ނިންމާފައިވެއެވެ.