ސައުދީގެ އަސްކަރިއްޔާއިން އެގައުމުގެ ރިޔާސީ ގަނޑުވަރު ކައިރިން ކުޅޭކުޅޭ ޑްރޯންއެއް ވައްޓާލައިފި
ހާދިސާ ހިނގީ ސައުދީގެ ގަޑިން ރޭގަނޑު 7:50 ހާއިރު
ޑްރޯން އަރުވާކަން ފާހަގަވީ ޚުޒަމާ ގެ ޗެކްޕޮއިންޓަކާއި ހަމައިން
ސައުދީ އަރަބިއްޔާގެ ވެރިރަށް ރިޔާޟްގައި ހުންނަ އެ ގައުމުގެ ރިޔާސީ ގަނޑުވަރުގެ ކައިރިން ކުޅޭކުޅޭ ޑްރޯން އެއް އެ ގައުމުގެ ސަލާމަތީ ބާރު ތަކުން ވައްޓާލައިފިއެވެ.
އަލް ޖަޒީރާ ރިޕޯޓް ކޮށްފައިވާ ގޮތުގައި އޮންލައިންގައި ޕޯސްޓް ކޮށްފައިވާ ވީޑިއޯއަކީ އެތަނުގައި ބަޑީގެ ވަރުގަދަ ހަމަލާތަކެއް ދެވިފައިވާކަން ދެއްކުމަށް ޕޯސްޓްކޮށްފައިވާ ވީޑިއޯއެކެވެ.
ރިޔާޟްގެ ފުލުހުންގެ ރަސްމީ ތަރުޖަމާނާ ހަވާލާދީ އެގައުމުގެ ދައުލަތުގެ މީޑިއާ އެސްޕީއޭއިން ހޮނިހިރު ދުވަހު ބުނީ ޚުޒަމާ ގެ ޗެކްޕޮއިންޓަކާއި ހަމައިން ހުއްދަ ނެތި ކުޅޭކުޅޭ ކުޑަ ޑްރޯން އެއް އަރުވަނިކޮށް ފެނިގެން ސަލާމަތީ ބާރުތަކުން އޭތި ވައްޓާލާފައިވާ ކަމަށެވެ.
ސައުދީގެ ގަޑިން ރޭގަނޑު 7:50 ހާއިރު ހިނގި މި ހާދިސާގެ ތަހުގީގު ކުރިޔަށްދާކަމަށް ސައުދީ ޕްރެސް އޭޖެންސީން ރިޕޯޓް ކޮށްފައިވެއެވެ.
އެއްވެސް މީހަކު ޒަޚަމްވިކަމެއް ނުވަތަ އެއްވެސް ތަނަކަށް ގެއްލުންތަކެއް ލިބިފައިވާ ކަމަކަށް މިހާތަނަށް ރިޕޯޓް ކޮށްފައެއްނުވެއެވެ.
ސޯޝަލް މީޑިއާގައި ޝެއަރކޮށްފައިވާ ވީޑިއޯއިންވަނީ 30 އަށް ސިކުންތަށް ބަޑީގެ ވަރުގަދަ ހަމަލާތަކެއް ދެވިފަވާ ކަމަށް ދައްކުވާފައެވެ. އެއާއިއެކު ވަނީ ސިޔާސީ ބޮޑު ކޯޅުންގަނޑެއް ހިނގާކަމުގެ ޚަބަރުތަކެއް ފެތުރިފައެވެ.
އަލްޖަޒީރާއިން ބުނެފައިވަނީ އެ ވީޑިއޯގެ ސައްހަކަން އެ އެޖެންސީއަށް ކަށަވަރު ނުކުރެވޭ ކަމަށް ބުނެފައެވެ.
ނަން ހާމަ ނުކޮށް ސައުދީގެ އޮފިޝަލަކު ރޮއިޓަރސްގައި ބުނެފައިވަނީ އެ ހާދިސާ ހިނގިވަގުތު ރަސްގެފާނު ސަލްމާނު ގަނޑުވަރުގައި ނޫޅުއްވާ ކަމަށެވެ.
އޭނާ ބުނީ ރަސްގެފާނު އެވަގުތު ވަޑައިގެން އުޅުއްވީ ދީރިޔާގައި އޮންނަ އެމަނިކުފާނުގެ ދަނޑު ބިމުގައި ކަމަށެވެ.
