ކިންގް ޚާލިދު އިންޓަނެޝަނަލް އެއާޕޯޓަށް ފޮނުވި މިސައިލެއް ސައުދީ އަސްކަރިއްޔާއިން ވައްޓާލައިފި

ކިންގް ޚާލިދު އިންޓަނެޝަނަލް އެއާޕޯޓަށް އަމާޒުކޮށް ފޮނުވި މިސައިލެއް ސައުދީ އަރަބިއްޔާގެ އަސްކަރިއްޔާއިން ވައްޓާލައިފި އެވެ.

ރިޕޯޓްތައް ބުނާ ގޮތުގައި މިސައިލް ފޮނުވާފައިވަނީ ޔަމަނުން ކަމަށް ގަބޫލު ކުރެވެއެވެ. ޔަމަނުގައި ސައުދީ-ކޯލިޝަނުން ދަނީ އެ ގައުމުގެ ހޫޘީ ހަނގުރާމަވެރިންނާ ދެކޮޅަށް އަސްކަރީ އޮޕަރޭޝަންތަކެއް ހިންގަމުން ނެވެ.

އަދި ވެރިރަށް ރިޔާދަށް މިސައިލް ފޮނުވި ކަމުގެ ޒިންމާ ހޫޘީން ވަނީ އެމީހުންގެ ހިންގާ ޓީވީ ޗެނަލެއް މެދުވެރިކޮށް ނަގާފައެވެ.

އެއާޕޯޓްގައި ތިބި ފަސިންޖަރުން ވަނީ އެއާޕޯޓް ކައިރިން ބާރުގަދަ އަޑެއް އިވުނުކަމަށް ބުނެފައެވެ.

މި ހަމަލާގެ ސަބަބުން މީހަކަށް އަނިޔާވެ، ތަނަކަށް ގެއްލުން ލިބިފައިވާކަން އަދި އެނގިފައެއް ނުވެއެވެ.

މީގެ ކުރިންވެސް ސައުދީއަށް އަމާޒުކޮށް ހޫޘީން ފޮނުވާފައިވާ މިސައިލްތައް ހުއްޓުވާފައިވާނެކަމަށް ސައުދީ އަސްކަރިއްޔާއިން ބުނެފައިވެއެވެ.