ގާނޫނާ ހިލާފަށް ފެނާއި ނަރުދަމާގެ ހިދުމަތްދޭނަމަ ފިޔަވަޅު އަޅާނެ ކަމަށް އެންވަޔަރަމެންޓް މިނިސްޓްރީން އިލްތިމާސްކޮށްފިއެވެ.

ރާއްޖެޓީވީގެ ''ފަލަ ސުރުޚީ'' ޕްރޮގްރާމްގައި ވާހަކަ ދައްކަވަމުން ސްޓޭޓް މިނިސްޓަރަ މުޖުތަބާ ވިދާޅުވީ މި ފަހުން އުފެދުނު ފެނާއި ނަރުދަމާގެ ގާނޫނުގެ ސަބަބުން ސްޓްރެޓެޖިކް ޕްލޭންއެއް އެކުލަވާލަން އެންވަޔަރަންމެންޓް މިނިސްޓްރީއަށް ލާޒިމް ކުރާ ކަމަށާއި، އެ ގާނޫނުގެ ދަށުން ބުދަ ދުވަހު އިފްތިތާހުކުރި ސްޓެރީޓިޖިކް ޕްލޭންގެ ސަބަބުން ސަރުކާރުގެ ސިޔާސަތުތައް ތަންފީޒުކުރުމަށް ފަސޭހަވެގެންދާނެ ކަމަށެވެ.

މުޖުތަބާ ވިދާޅުވީ މި ސަރުކާރު ހަވާލުވިއިރު ފެނިގެންދިޔައީ ފެނާއި ނަރުދަމާގެ ޕްރޮޖެކްޓްތައް ހަވާލުކޮށް އެކަމާއި އިތުރަށް އަޅާނުލެވި ހުރިތަން ކަމަށާއި، އެކަމަކު މި ގާނޫނު ނުކުތުމުން ފެނާއި ނަރުދަމާގެ ޕްރޮޖެކްޓްތައް ނިމި ދެމެހެއްޓެނެވި ގޮތެއްގައި ފެނާއި ނަރުދަމާގެ ހިދުމަތްތައް ދެވިގެންދާނެ ކަމަށެވެ. އަދި މި ސަރުކާރުގެ އެންމެ ބޮޑު އަމާޒަކީ ރާއްޖޭގައި މީހުން ދިރިއުޅޭ ހުރިހާ ރަށަކަށް ތަފާތު ކުރުމެއްނެތި ފެނާއި ނަރުދަމާގެ ހިދުމަތް ދިނުން ކަމަށެވެ.

މުޖުތަބާ އިތުރަށް ވިދާޅުވީ ފެނާއި ނަރުދަމާގެ ގާނޫނުގެ ދަށުން ހެދިފައިވާ ސްޓެރީޓިޖިކް ޕްލެނާއި ހިލާފަށް ފެނާއި ނަރުދަމާގެ ހިދުމަތްދޭނަމަ، ފިޔަވަޅު އަޅާނެކަމަށެވެ. އަދި މި ޕްލޭނާއި ހިލާފަށް ހިދުމަތްދޭނަމަ ހަރުކަށި ފިޔަވަޅު އެޅުމަށް މިނިސްޓްރީން ވަނީ ނިންމާފައި ކަމަށް މުޖުތަބާ ވިދާޅުވިއެވެ.

ފެނާއި ނަރުދަމާގެ ޤައުމީ ސްޓްރެޓީޖިކް ޕްލޭނަކީ މިދާއިރާގެ ލަނޑުދަނޑިތައް ހާސިލުކޮށް، ދެމެހެއްޓެނިވި ގޮތެއްގައި މިދާއިރާ ތަރައްޤީކޮށް ކުރިއެރުވުމުގައި މަސައްކަތްކުރާ ހުރިހާ ފަރާތްތަކަށް ބޭނުން ހިފިގެންދާނެ ޕްލޭނެކެވެ. މި ޕްލޭން ތަންފީޒުކުރުމުގެ މަސައްކަތް ކުރިއަށްގެންދާނީ މިކަމާގުޅުންހުރި ވުޒާރާތަކާ ކުންފުނިތަކާ އޮފީސްތަކާ ގުޅިގެން މިނިސްޓްރީ އޮފް އެންވަޔަރަންމަންޓުންނެވެ.

މި އިފްތިތާޙްކުރެވުނު ފެނާއި ނަރުދަމާގެ ޤައުމީ ސްޓްރެޓީޖިކް ޕްލޭނަކީ މިދާއިރާ ތަރައްޤީކޮށް ޚިދުމަތުގެ ފެންވަރު މަތިކުރުމަށް ސަރުކާރުން ކަނޑައަޅާފައިވާ އަމާޒުތަކަށް ވާސިލުވުމަށްޓަކައި ހުޅުވާލެވިގެން ދިޔަ އިތުރު ދޮރެކެވެ. އައި މިއީ ދިވެހިރާއްޖޭގެ ފެނާއި ނަރުދަމާގެ ދާއިރާ އިތުރު ހަރުފަތްތަކަށް ގެންދިއުމަށް ކޮށާލެވުނު މަގެކެވެ.