ޝަހީދު ހުސެއިން އާދަމްގެ ބައްޕައަށް ރައީސް ސޯލިހް ފޯނުން ގުޅުއްވާ، ޝުކުރުއަދާކުރައްވައިފި
މާތްވެގެންވާ އިސްލާމްދީނާއި ދިވެހި ޤައުމާއި ދިވެހި ރައްޔިތުންގެ ޙައްޤުގައި ފުރާނަ ޤުރްބާން ކުރައްވައި، އެކުރެއްވި މަތިވެރި ޖިހާދަކީ، ރާއްޖޭގެ ތާރީޚުން ދުވަހަކުވެސް ފަނޑުވެގެންދާނެ ޖިހާދެއް ނޫން
ރައީސުލްޖުމްހޫރިއްޔާ އިބްރާހީމް މުހައްމަދު ސޯލިސް
ޝަހީދު ޙުސައިން އާދަމްގެ ލޮބުވެތި ބައްޕަ ހދ. ކުޅުދުއްފުށީ މާވާގޭ އާދަމް މުޙައްމަދަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، އަންގާރަ ދުވަހު ފޯނުން ގުޅުއްވައި، ނޮވެންބަރު 3 ގެ ޢުދުވާނީ ޙަމަލާގައި ޙުސައިން އާދަމް ވެވަޑައިގެންނެވި މަތިވެރި ޤުރްބާނީގެ އަގު ވަޒަންކުރައްވައި ޝުކުރުއަދާކުރައްވައިފިއެވެ.
ރައީސުލްޖުމްހޫރިއްޔާ ފޯނުން ގުޅުއްވައި ވާހަކަފުޅު ދައްކަވަމުން، 1988 ވަނަ އަހަރުގެ ނޮވެންބަރު މަހުގެ 3 ވަނަ ދުވަހު ދިވެހިންގެ މަދުބަޔަކާއި ބޭރުގެ ޓެރަރިސްޓް ޖަމާޢަތަކާ ގުޅިގެން ރާއްޖެއަށް ދިން ޢުދުވާނީ ޙަމަލާގައި، މާތްވެގެންވާ އިސްލާމްދީނާއި ދިވެހި ޤައުމާއި ދިވެހި ރައްޔިތުންގެ ޙައްޤުގައި ފުރާނަ ޤުރްބާން ކުރައްވައި، އެކުރެއްވި މަތިވެރި ޖިހާދަކީ، ރާއްޖޭގެ ތާރީޚުން ދުވަހަކުވެސް ފަނޑުވެގެންދާނެ ޖިހާދެއް ނޫންކަން ވަނީ ފާހަގަކުރައްވާފައެވެ. އަދި ޝަހީދު ޙުސައިން އާދަމަށްޓަކައި މުޅި ދިވެހި ޤައުމު ފަޚުރުވެރިވާ ކަމަށް ރައީސް ސޯލިހް ވިދާޅުވިއެވެ.
1988 ވަނަ އަހަރުގެ ނޮވެމްބަރު 3 ވަނަ ދުވަހަކީ، ދިވެހިންގެ ތެރެއިން ބަޔަކާއި، ބޭރުގެ ބަޔަކާއި ގުޅިގެން ރާއްޖޭގެ މިނިވަންކަމާއި، ވެރިކަން ހޯދުމަށް އުދުވާނީ ހަމަލާއެއް ދިން ދުވަހެވެ. ނަމަވެސް ދިވެހި ރައްޔިތުންނާއި ސިފައިން އެދުވަހުގެ އުދުވާނީ ހަމަލާވަނީ ފެއިލް ކޮށްލާފައެވެ. އެދުވަހު 19 ދިވެހިން ވަނީ މިގައުމުގެ މިނިވިންކަމާއި އިސްލާމް ދީނުގެ ދިފާއުގައި ޝަހީދުވެފައެވެ.
